البرهان يطلق تصريحات جديدة مدويّة بشأن الحرب    انطلاقًا من الأراضي الإثيوبية..الجيش السوداني يتحسّب لهجوم    الصادق الرزيقي يكتب: البرهان وحديث انقرة    الأهلي مروي يستعين بجبل البركل وعقد الفرقة يكتمل اليوم    عبدالصمد : الفريق جاهز ونراهن على جماهيرنا    المريخ بورتسودان يكسب النيل سنجة ويرتقي للوصافة.. والقوز أبوحمد والمريخ أم روابة "حبايب"    الوطن بين احداثيات عركي (بخاف) و(اضحكي)    شاهد بالفيديو.. مطرب سوداني يرد على سخرية الجمهور بعد أن شبهه بقائد الدعم السريع: (بالنسبة للناس البتقول بشبه حميدتي.. ركزوا مع الفلجة قبل أعمل تقويم)    "صومالاند حضرموت الساحلية" ليست صدفة!    الخرطوم وأنقرة .. من ذاكرة التاريخ إلى الأمن والتنمية    السودان يعرب عن قلقه البالغ إزاء التطورات والإجراءات الاحادية التي قام بها المجلس الإنتقالي الجنوبي في محافظتي المهرة وحضرموت في اليمن    شاهد بالفيديو.. (ما تمشي.. يشيلوا المدرسين كلهم ويخلوك انت بس) طلاب بمدرسة إبتدائية بالسودان يرفضون مغادرة معلمهم بعد أن قامت الوزارة بنقله ويتمسكون به في مشهد مؤثر    مدرب المنتخب السوداني : مباراة غينيا ستكون صعبة    لميس الحديدي في منشورها الأول بعد الطلاق من عمرو أديب    شاهد بالفيديو.. مشجعة المنتخب السوداني الحسناء التي اشتهرت بالبكاء في المدرجات تعود لأرض الوطن وتوثق لجمال الطبيعة بسنكات    تحولا لحالة يرثى لها.. شاهد أحدث صور لملاعب القمة السودانية الهلال والمريخ "الجوهرة" و "القلعة الحمراء"    القوات المسلحة: هجوم الطينة بطائرة مسيّرة عملٌ عدائي لمليشيا آل دقلو ويهدد أمن الإقليم    رقم تاريخي وآخر سلبي لياسين بونو في مباراة المغرب ومالي    شرطة ولاية القضارف تضع حدًا للنشاط الإجرامي لعصابة نهب بالمشروعات الزراعية    استخدام وسائل التواصل الاجتماعي وراء تزايد تشتت انتباه المراهقين    بدء أعمال ورشة مساحة الإعلام في ظل الحكومة المدنية    مشروبات تخفف الإمساك وتسهل حركة الأمعاء    منى أبو زيد يكتب: جرائم الظل في السودان والسلاح الحاسم في المعركة    «صقر» يقود رجلين إلى المحكمة    شرطة محلية بحري تنجح في فك طلاسم إختطاف طالب جامعي وتوقف (4) متهمين متورطين في البلاغ خلال 72ساعة    بالفيديو.. بعد هروب ومطاردة ليلاً.. شاهد لحظة قبض الشرطة السودانية على أكبر مروج لمخدر "الآيس" بأم درمان بعد كمين ناجح    ناشط سوداني يحكي تفاصيل الحوار الذي دار بينه وبين شيخ الأمين بعد أن وصلت الخلافات بينهما إلى "بلاغات جنائية": (والله لم اجد ما اقوله له بعد كلامه سوى العفو والعافية)    منتخب مصر أول المتأهلين إلى ثمن النهائي بعد الفوز على جنوب أفريقيا    كيف واجه القطاع المصرفي في السودان تحديات الحرب خلال 2025    إبراهيم شقلاوي يكتب: وحدة السدود تعيد الدولة إلى سؤال التنمية المؤجَّل    كامل إدريس في نيويورك ... عندما يتفوق الشكل ع المحتوى    مباحث قسم الصناعات تنهي نشاط شبكة النصب والاحتيال عبر إستخدام تطبيق بنكك المزيف    وحدة السدود تعيد الدولة إلى سؤال التنمية المؤجَّل    تراجع أسعار الذهب عقب موجة ارتفاع قياسية    وزير الداخلية التركي يكشف تفاصيل اختفاء طائرة رئيس أركان الجيش الليبي    "سر صحي" في حبات التمر لا يظهر سريعا.. تعرف عليه    والي الخرطوم: عودة المؤسسات الاتحادية خطوة مهمة تعكس تحسن الأوضاع الأمنية والخدمية بالعاصمة    فيديو يثير الجدل في السودان    ولاية الجزيرة تبحث تمليك الجمعيات التعاونية الزراعية طلمبات ري تعمل بنظام الطاقة الشمسية    شرطة ولاية نهر النيل تضبط كمية من المخدرات في عمليتين نوعيتين    الكابلي ووردي.. نفس الزول!!    استقالة مدير بنك شهير في السودان بعد أيام من تعيينه    كيف تكيف مستهلكو القهوة بالعالم مع موجة الغلاء؟    اكتشاف هجوم احتيالي يخترق حسابك على "واتسآب" دون أن تشعر    قبور مرعبة وخطيرة!    عزمي عبد الرازق يكتب: عودة لنظام (ACD).. محاولة اختراق السودان مستمرة!    البرهان يصل الرياض    مسيّرتان انتحاريتان للميليشيا في الخرطوم والقبض على المتّهمين    إسحق أحمد فضل الله يكتب: (حديث نفس...)    مياه الخرطوم تكشف تفاصيل بشأن محطة سوبا وتنويه للمواطنين    الصحة الاتحادية تُشدد الرقابة بمطار بورتسودان لمواجهة خطر ماربورغ القادم من إثيوبيا    مقترح برلماني بريطاني: توفير مسار آمن لدخول السودانيين إلى بريطانيا بسهولة    الشتاء واكتئاب حواء الموسمي    عثمان ميرغني يكتب: تصريحات ترامب المفاجئة ..    "كرتي والكلاب".. ومأساة شعب!    ما الحكم الشرعى فى زوجة قالت لزوجها: "من اليوم أنا حرام عليك"؟    حسين خوجلي: (إن أردت أن تنظر لرجل من أهل النار فأنظر لعبد الرحيم دقلو)    حسين خوجلي يكتب: عبد الرجيم دقلو.. إن أردت أن تنظر لرجل من أهل النار!!    







شكرا على الإبلاغ!
سيتم حجب هذه الصورة تلقائيا عندما يتم الإبلاغ عنها من طرف عدة أشخاص.



يَا (غَرِيب) يَلّا لي بَلَدَك
صابنها نشر في كورة سودانية يوم 28 - 05 - 2025


محمد عبد الماجد
يَا (غَرِيب) يَلّا لي بَلَدَك
سانت جورج الإثيوبي 9، الوحدات الأردني 7، اتحاد اب اليمني 6، تفرغ زينة الموريتاني 4 رقم جديد يُضاف في سجلات المريخ.
غرائب هذه الهزائم أنها كانت أمام فرق ليس من الفرق الأفريقية أو العربية المعروفة في المنطقة، الموسومة بالتاريخ الكبير، أو المُصنّفة في أفريقيا أو آسيا، مثل الأهلي المصري والترجي التونسي والهلال السعودي والاتحاد، وكلها كانت في ظروف غامضة وكلها أمام المريخ. وكلها انطبقت على المريخ فيها (خرج ولم يعد).
أربعة في الدوري الموريتاني بتعادل 13 في الدوري الإنجليزي براكم قلتوا دوري ضعيف.
عندنا قريبنا زول صعب شديد، النوع الما بنزل بي (تِريس)، ولا بتم النزول بي جوكر، ولا برمي قريب غطا، ولو باللفة، زول صعب جد، اسمو (حسن خيط الجماعة)، اسمه كدا، ما تقيفوا كتير في الاسم، (ما بحب زول يراجعني في الأسماء)، الزول دا كان وقت يكون عاوز يكرم ليه زول بمشي معاه السوق الكبير، وبقيف جوار مطعم السمك، وبقول ليه: أسمع أنا السمك ما عندي ليه قروش، لكن شوف ليك أي واحد طالع من المطعم دا وشاكلو وسمِّعو مية كلمة فارغة، وما تعاين لي حجمه وأبعد ليّ منو.
يمين أشربو ليك شراب، وارميهو قدامك متل فوانيس العربية العاملة حادث، واطرِّشو ليك السمك الما عندنا ليه قروش دا، سمكة سمكة.
في ناس بتموا الشَّكلة (نضمي).
وفي ناس في الدنيا دي عندهم مشكلة مع (السمك).
الزول بعد ما يشم ريحة السمك بقول ليه: أنا رجالتك ما عندي فيها كلام يا (حسن خيط الجماعة)، بس كلامك دا كان ممكن تعملو في الحلة أو في الموقف أو الدكان أو النادي، يعني ما في داعي تجيبنى المشوار دا كله لي مطعم السمك عشان تعزمني (شكلة).
الدنيا ما طارت!!
كان ممكن تشاكل في حِلّتك، ما في داعي للسمك وقت ما ح نأكلو.. إنت عارف أنا ضعيف قدام السمك.
هسع (حسن خيط الجماعة) دا ذكّرتني ليه هزيمة المريخ في آخر مباراة للمريخ في الدوري الموريتاني 0 / 4 أمام تفرغ زينة (فضيحة السواد)، والله أنا فترت من الهزائم الكتيرة للمريخ، بقيت أخجل ليهم.. اتخيّلت ناس الهلال يعملوا نفس الشئ مع ناس المريخ ويقولوا ليهم، أعملوا ليكم شكلة في أي زقاق فيك يا موريتانيا أو نظموا ليكم أي مباراة مع أي فريق موريتاني وابعدوا لينا منها.
إن شاء الله مباراة (شرفية).
يمين نجيب ليكم حقكم تالت ومتلت.
نجيب ليكم حقكم لغاية عندكم.
الموريتانيون ديل لقوا المريخ لا حول له ولا قوة نزلوا فيه هزائم.
مفروض الشناقيط ديل يعملوا لينا نحن الهلالاب أبطال الدوري حساب، لو ما عاوزين يعملوا حساب للمريخ.
معقولة بس فريق يخسر في الدوري الموريتاني (10) مباريات ويتعادلوا (8) مباريات!!
ويقولوا ليك دوري ضعيف والمشاركة (شرفية).
المريخ من 30 مباراة حقق (44) نقطة وجاء في المركز السادس في الدوري الموريتاني.
في دوري ضعيف وما عندو قيمة.
وزينة وعاجباني.
المريخ فقد (46) نقطة، دي حاجة كتيرة شديد، الكلام دا حصل في الدوري الموريتاني؟ ما في الدوري الإنجليزي.
عشان نشرح ليهم الحتة دي، نوقعها ليهم كيف؟
نقول ليهم شنو؟
ولله نحن احترنا معاهم.
جيبوا ورقة وقلم.
شوفوا أبسِّط ليكم الحكاية شديد، أشرحها ليكم بي فهم ناس سنة رابعة ابتدائي، عشان بعدين ما يطلع لينا واحد يقعد يغالط فينا بعد كم سنة ناس المريخ يمكن ينكروا الموضوع دا ويقولوا مريخ أم درمان أصلاً ما شارك في الدوري الموريتاني، يمكن يرموها في مريخ بورتسودان أو مريخ الحصاحيصا أو مريخ بانتيو ويقولوا ديل ما نحن.
ما عارف ليه حاسس أن الليلة دي ممكن يشيلها كلها مريخ بانتيو.
مريخ بانتيو ذنبو شنو؟
بعملوها، دي حاجة أسألوني منها أنا.
عشان ما أنسى، وعشان ما تجوا يوم وتنكروا الكلام دا، بحسابات ناس سنة رابعة ابتدائي أو أساس نتيجة المريخ في الدوري الموريتاني (رسوب)!!
المريخ رسب!!
رسوب عديل كدا، نقاط المريخ في الدوري الموريتاني 44 نقطة والمجموع كله 90 نقطة، يعني المريخ نص الدرجة الكاملة ما جابها.. زمان كان الطالب وقت يجيب في الرياضيات 29 درجة، من 60 بقولوا عليه راسب في الرياضيات، مدير المدرسة بسمِّعو كلام زي السم، وأستاذ الرياضيات بسمِّعو كلام زي السم، وبعدين وقت يمشي البيت أبوه بسمِّعو كلام زي السم.. ومرات يلاقيهو زول شليق في مناسبة ما عندو معاه أي علاقة، علاقتو معاه بس عاوز يغسِّل ليه إيده، يقوم يسأله من النتيجة ويقول ليه جبت كم في الرياضيات؟ وقت يقول ليه سقطت في الرياضيات، عمك يشيل إيده من الغسيل ويسمِّع ليك الولد كلام زي السم.
في المناسبات وقت عمك يسأل الولد البغسِّل ليه ويقول ليه: إنت ولد منو؟ أو يقول ليه شبّهتك، السؤال التاني طوالي بكون: إنت جيت الكم يا ولد؟ والسؤال دا ممكن يضايق المريخاب.
أوعكم مريخابي يغسِّل ليه لي زول في مناسبة.
ابعدوا من المغاسل.
المركز السادس (الشرفي) في الدوري الموريتاني ح يلصق في المريخ، ح يبقى رتبة رسمية، أقصد شرفية.
ح يبقى (زينة وعاجباني).
المريخ رسب في الدوري الموريتاني الدوري الضعيف، الدوري الذي شارك فيه المريخ بصورة (شرفية).. المريخ (سقط) فيه!!
وزينة وعاجباني.
هو في زول بتمرمط قدر المرمطة دي في حاجة (شرفية).
أنا عارف بعد أربع سنوات بيرموها في مريخ بورتسودان أو مريخ الحصاحيصا أو مريخ بانتيو ويقولوا ديل ما نحن.
عشان كدا لازم نثبت الموضوع دا المريخ جاء في المركز السادس في الدوري الموريتاني.. الهلال طبعاً في المركز الأول، وهو بطل الدوري (الشرفي) وبفصلنا عن المريخ أربعة مراكز، و(20) نقطة قابلة بإذن الله وفضله للارتفاع في مباراة الهلال اليوم ليصبح الفارق بين الهلال والمريخ (23) نقطة. نقول إن شاء الله.
ناس مزمل أبوالقاسم بكونوا اشتهوا (الوصافة) في الحرب دي، ديل الوصافة ما لموا فيها.
يا ربي مزمل أبوالقاسم لو بكتب عن المريخ في الأيّامات دي كان كتب شنو؟
كان قال ليهم لازم نقدم شكوى، ناس تفرغ زينة ديل عندهم لاعب ود خالة أمه (دعامي) عديل كدا.
الشئ دا فيه ذكاء اصطناعي واللا طبيعي؟
الواحد ذاتو بقي يلخبط.
حميدتي دا مرة جابوه لينا (ميت حي)، ومرة جابوه لينا (حي ميت).
فعلاً جنجويد.
الشئ الما وقع لي لغاية الآن، أكرر ليكم الكلام عشان بعدين ما ينكروه، ناس المريخ ديل سخروا من الدوري الموريتاني وسخروا من فوز الهلال به، وقالوا دا دوري ضعيف وما فيه مُستوى!!
أها الدوري الضعيف دا المريخ حقّق فيه المركز السادس!!
الدوري الضعيف دا المريخ خسر فيه (10) مباريات بأربعة أجهزة فنية مختلفة، (إيطالي، سوداني، صربي رمصري) وبعد دا جاءوا في المركز السادس في موسم شارك فيه مع المريخ أكثر من (14) محترفاً أجنبياً.. بقوم يصل إلى أكثر من (40) لاعباً، شئ محلي وشئ أجنبي.
الحاجة الما قادر أبلعها، تفرغ زينة من الدقيقة 37 من عمر الشوط الأول ناقصين لاعب، بيلعبوا بعشرة من الشوط الأول وهزموا المريخ أربعة.
فضيحة السواد.
وزينة وعاجباني.
يا زينة.
قريبنا (حسن خيط الجماعة)، كنا وقت نمشي ليه زيارة ونلقاه راقد عيان، بنقول ليه يا حسن خيط الجماعة مالك بقيت ضعيف كدا؟ وحاصل عليك شنو؟ دي ما عادتك بتشعر بي شنو؟ إن شاء الله خير.
حسن خيط الجماعة بعاين في السقف وبقول لينا: شاعر زي الواقعة فيني حيطة!!
الزول دا تجيهو ملاريا، تجيهو نزلة، يشعر بي برد بي حمى بي صداع ساكت بقول ليك نفس الكلام، يجيه زول عاوز منو قروش بقول: (شاعر زي الواقعة فيني حيطة).
يوم المريخ كان مغلوب، وأنا ما عارف نتيجة المباراة، قمت الصباح أيام الجرائد، وقلت أجيب الجرائد، وأشوف الحاصل، والأيامات ديك ناس خالد عزالدين والرشيد علي عمر يشهُّوك هزيمة المريخ، في الشارع لقيت (حسن خيط الجماعة) وشو يلعن قفاه، قلت ليه يا حسن خيط الجماعة مالك، إن شاء الله خير، شكلك ما عاجبني؟
حسن خيط الجماعة، قال لي: والله شاعر زي الواقعة فيني حيطة، عرفت ليك طوالي أنه المريخ مضروب.
أصلو الزول دا ما بتقع فيه حيطة ساكت.
وزينة وعاجباني.
عندنا جارنا مريخابي وقت المريخ يكون مهزوم، وقت يلاقيك في الشارع بدون ما تسأله بقول ليك: الليلة حماس قالت ح تضرب إسرائيل، عشان ما تجيب ليه سيرة الكورة.
تفوت تخليه، تقول ليه شنو عاد بعد ما جاب ليك سيرة (حماس)؟
لكن لو جينا للجد فإنّ هزائم المريخ في الدوري الموريتاني منطقية، رئيس النادي قال نحن ما عندنا فريق ما عندنا صف أول.
والمريخ لياقتو كلها كباها في (التهاني) والمباركة لفريق نواذيبو.. عشان كدا الكورة طارت ليهم!!
بأمانة لو سوداكال كان ماسك الفريق دا كله ما كان بحصل.
البعمل فيه النمير دا، سوداكال ما بعمله، في زول بقول نحن ما عندنا صف أول؟
وقت ما عندك صف أول منتظر شنو غير الأربعات؟
لكن ما سوف تندهش له أن المريخ الذي خسر (10) مباريات في الدوري الموريتاني آخرها كانت الخسارة 0 / 4 من تفرغ زينة، وقت الهلال يتعادل في الدوري الذي تصدره الهلال وجاء فيه المريخ في المركز السادس، بتّهموا الهلال بالتواطؤ!!
المريخ يخسر عشر مباريات عادي.
يخسر بالأربعة عادي.
الهلال يتعادل (تواطؤ) طوالي، ولا بتلفتوا.
يمين الكلام دا لو سمع بيه (حسن خيط الجماعة)، يمشي على أكبر مطعم سمك فيك يا بلد، ويقول للزول المعاهو شوف أتخن تخين من الخارجين من المطعم دا واعمل معاهو شكلة وأبعد منها بعيد.
الباقي خليهو علينا ما عندك قضية.
وزينة وعاجباني.
...
متاريس
الواحد بقي بسبب هزائم المريخ بكتب في اليوم عمودين.
كتبت عمود عن التسجيلات وعن ضرورية استمرارية جان كلود وكوليبالي مع الهلال، وأجّلته بعد خسارة المريخ الكبيرة، ننشره في الغد إن شاء الله.
أوعكم من التفريط في جان كلود وكوليبالي.
معقولة تفرغوا الهلال من المدرب ومن المحترفين كمان؟
ما تعملوا لينا (تفرغ) زينة في الهلال.
كدا مشروع الهلال ببقى مشروع ترحال عديل كدا.
أي تسجيلات جديدة مقابل بيع جان كلود وكوليبالي يبقى ما عملنا حاجة.
بكرة نشوف الموضوع دا ونثبِّته بالورقة والقلم.
شعرت بي واحد مريخابي في التعليقات يقول لي وإنت مالك ومال هزيمة المريخ؟ وأرد على هذا المريخابي الذي أعطى لنفسه الحق للتعليق على العمود، ويريد أن يحرمنا نحن من التعليق على الهزيمة، إذا كان المريخاب عندهم رأي في بطولة الهلال وفوزه بالدوري الموريتاني وبقلِّلوا في قيمة فوزه، نحن ما يكون عندنا رأي في هزيمَة المريخ بالأربعة.
إذا كان المريخاب عندهم رأي في المركز الأول الذي حقّقه الهلال في جدول الدوري الموريتاني، نحن ما يكون عندنا رأي في صاحب المركز السادس.
بتتكلّموا كيف إنتوا؟
..
ترس أخير: في حيطَة وَقَعَت!!

انقر هنا لقراءة الخبر من مصدره.