] الشيء الوحيد الجميل في فايروس كورونا ] اننا ولاول مرة في التاريخ نأخذ امراً بمثل هذه الجدية ] على الاقل على المستوى الحكومي ] ونتمنى نفس الجدية على المستوى الشعبي ] فما زال شعبي يركلس حول ستات الشاي ] ويعطس ليك جوة حنانك ذاتو ] بعضنا اهتم بالامر ] قام لبس كمامة ] ولكنها كمامة لزوم القشرة ] زي سيجارة الحفلة زمان ] وزي النضارة البرفعها سيدها علي راسو ] تلقى الكمامة معلقة على الاضنين ] وباقيها علي الرقبة ] والخشيم والنخيرة بره الجك ] بس عريان ولابسلو صديري ] اما بعضنا الآخر ] فيعتمد على عبارة الكاتل الله والمحي الله ] وهم بذلك لا يفرقون بين التوكل والتواكل ] اعقلها وتوكل يا اخي الكريم ] ولا تدعها مطلوقة وتعتمد على المولى في حفظها ] ستجفل بالتأكيد ] ومع كورونا الجفلة من الدنيا للآخرة طوالي ] اذن علينا بالاحتياط اللازم ] وعلينا الاشادة بالجهود الحكومية في هذه الكارثة ] وقبل كل ذلك نحمد الله انو كورونا جات بعد الجماعة فاتوا ] كان شبكونا ليك البعد عن الله هو السبب ] لو عالجناكم بتموتوا ولو خليناكم بتموتوا ] وكان انبثقت كم لجنة كده تضرب العون الانساني العالمي جوة الطيارة ] ثم يطل علينا آخر ] هي الكورونا شنو!!!! ] ما ياها ام تكشو حقتنا القديييمة ديك وسمير بتاع الجداد ] ايها الناس ] نرجو التعامل مع الامر بجدية شعبية واعية ] البس كمامة ] ما تصافح ] تجنب التجمعات قدر الامكان ] اغسل يديك بمطهر كم مرة يومياً ] لا تقح في وش زول لا تخلي زول يقح في وشك ] ما تاكل في الشارع ] ولو زول عطس عطستين بينهما شهقة ] قبل يعمل فييييط قول يا فكيك وبلغ بالاتصال باحد ارقام الجهات المعنية ] حاتقولوا لي ده كتير ] وكورونوك ولا جوك جوك ] ولكن تذكر ] كورونوك ما بشهدوك ] شتاااااات يا فردة والامة المهملة منقرضة ] المهم ] موضوع لجنة الاستثمار نزع الاهمية من موضوع كورونا ] وتحدث الناس في القروبات وعبر الاذاعات عن رهن اصول المريخ ] حديث بالطبع مخجل ] ويفيد بان الذين يلوكونه يجهلون مواد النظام الاساسي الذي بموجبه تم تعيين لجنة الاستثمار .. ونجد العذر على الجهل والتجاهل والجهالة ] لان الناس وقتها كانت تعارض في نظام اساسي بالتبعية او الوكالة ] دون الاطلاع على بنوده ] لذا كانت العبارات المضحكة تخرج بين كي بورداتهم منسابة من فرط الجهالة ] ايها الناس ] لجنة الاستثمار لجنة طموحة ] وقائد ركبها ابو اواب شهدت له الايام بمواقف كريمة ومشرفة ومشرفة ] لذا على المجلس واللجنة تحكيم العقل والجلوس بهدوء وبنفوس نظيفة لإزالة اي لبس في الموضوع .. كفانا الكورونا ] أيها الناس ] النجيلة قررربت تقوم ] ولو قامت في ناس حاتقوم صوف ] اما السياج ] فسياج عالمي يشبه العالمي بحق وحقيقة ] تاني الكاف يشوف ليهو محل غرامات يعيش منها ] فكل مبارياتنا الافريقية ] كان الكاف بقطع لينا ايصالنا من قبل الكورة ] مخالفة سياج وخور كاشف حول الملعب ] كنا زي الحافلة الما مرخصة ] من الصباح نقطع الايصال عشان نسترزق ونشتغل ] ايها الناس ] ان تنصروا الله ينصركم ] اها ] نجي لي شمارات والي الخرتوم ] والينا ] لو عطسنا ] بتجري تخلينا؟؟؟؟ ] ولا بتعطس معانا ] ولا بتداوينا؟؟؟؟ سلك كهربا ننساك كيف والكلب قال كدي واحد فيكم بس يقول اتشوووووو شوفوني كان تلقوني والى لقاء سلك