العم العزيز الأستاذ الفاتح جبرا المحترم السلام عليكم ورحمة الله تعالى وبركاته وكل عام وأنتم بخير وإن شاء الله السنة دي (واواتك) تعمل شغل كويس وملف خط هيثرو الليهو سنة وشوية عند النائب العام تعرف أخبارو شنو؟ أستاذي : أنا ابنك (ع.م) أحمل بكالريوس في الهندسة وكباقي الخريجين المساكين انتظرت في صف الوظيفة لحدي الصبر قالي انا بكرهك ؛ وجريت جري مارثوني لحدي ماحسيت باني سوف اذهل العالم اذا خشيت في مسابقة جري لاني متاكد حكسر اي رقم قياسي ؛ وبعد الواسطات وكسير التلج وياريس ويابوص وياكومندان ويامدير و؛و؛و؛و في الآخر طلعت كعادة جميع أقراني (البدون ضهر) ولا (تزكيات ولا توصيات) طلعتا بخفي حنين ! طيب اعمل شنو ؟ عشان ما أخش في مجال السوق الكترت مشاكلو وشيكاتو الضاربه وسماسرتو ولصوصو اللي بقو اكتر من الناس الفيها خير ؛ بديت افكر في عمل يكون حلال مافيهو اي شبهة حرام ولا حتي يجمعني باولاد الحرام المابعرفو الله والرسول ؛ اخترت مجال صيد الاسماك. الوالدة ربنا يخليها داخلة ليها في (صندوق) قمتا (حنكتها) أدتني (قريشاتو) وكمان ما قصرت قامت (فكت) ليها غويشة وقمتا بالقروش دي إشتريت ليا (مركبين) بتوعين سمك وباقي أدوات الصيد من (شباك) وخلافه ولميت اولاد اهلي الظروفهم تعبانة ودايرين رزق حلال واتجهنا صوب اقصي شمال السودان ويالبحر جاك زول ؛ في البداية الناس بدت تضحك في فكرتي لكني ما إشتغلت بى زول المهم بعد 15 يوم من العمل الشاق فتح الله لي بشحنة (سمك) ماكنت بحلم بيها ؛ وانا جاي علي العاصمة وفي منطقة خلوية صادفتنا نقطة عبور افتكرت ح أدفع رسوم العبور اللهي 10 جنيه لكن فجأة ظهر واحد وقف قدامي وبعد ما أخد ليهو لفة حول العربية قال لي ياابو الشباب انت شايل سمك (وهو عارف كويس اني شايل سمك وشكل التلاجة ظاهر) قلت ليهو ايوة والله بنيتي الطيبه افتكرتو عاوز ليهو سمكة سمكايتين قلت زول قاعد في الخلاء ده اكيد مشتهي سمك ؛ فجاءة دخل أيدو في جيبو وقام مطلع ليا ايصال مالي وقال لي في برود شديد : ( 50 ألف جنيه) ؛ قلت ليهو: ( 50 بتاعت شنو؟) قال لي : (زكاة ) ماتستغرب يااستاذ زكااااة ؛ قلت ليهو : (لكن السمك ده حال عليهو الحول متين؟) قال ليا : ( يازول انا موظف ومابعرف شي ) ؛ دحين ياجبرا انا واقف في العبور ده وبعد مشاكل وتحانيس ابيت ادفع ال50 دي قلت حتي ولو اخسر الشحنة كلها ؛ عليك الله يااستاذ أسال ليا شيخ بس مامن السودان يكون من اي دولة ثانية لانو اكيد حيعرف ويكون ملم بابسط الاحكام في شريعتنا الاسلامية اكتر من الشخص ده قوليهو هل هسه في حالتي دي مفروض يشيلو مني زكاة ؟ وبيحسبوها كيف؟ يعني الشايل طن سمك زي الشايل نص طن ؛ والشايب سمك (بلطي) زي الشايل (كبروس) وللا (قرقور) وانا مستعد ادفع اذا في شيخ افتي ليك هسه ؛ حتي في الحلال عاوزين يحاربوني ؛ رد علي هسه ياجبرا واستشير مشتركينك لانو رواد صفحتك ماحبوك الا عشان وضوحك ودفاعك عن الحق ؛ وارجو عدم ذكر الاسماء ماخوف لكن شئ في نفس يعقوب ؛ وجزاك الله خيرا الرد : الإبن العزيز (ع . م) : الثابت أن زكاة السمك 5% لكن مسألة الحول والكمية والنوع وكيفية تقديرهم فعاوزة ليها فتوى لذلك نرفع فتواك لأهل الإختصاص وللإخوة في ديوان الزكاة على وجه الخصوص علهم يردون على أسئلتك .. بس ما بطريقة (سياسة بسمارك الداخلية) ! كسرة : العبدلله عموما يرى أن أموال الزكاة عندنا كما شحنات (الكهرباء) .. موجودة لكنها (لا ترى) !! كسرة ثابتة : أخبار ملف خط هيثرو العند النائب العام شنو(وووو وووو وووو)+(وو)
