بسم الله الرحمن الرحيم في السلك (4) • احمد يدخل يحمل القهوه الماخمج ويضعها امام جده وعبد الستار ويهم في صبها • احمد مخاطبا عبد الستار : سكرك كيف ياعمو ؟ • عبد الستار : مظبوط • حاج احمد مازحا : انت لي اسي بتشرب سكر مظبوط ياعبد الستار ؟ ماجاك سكري ؟ • عبد الستار يرشف من القهوه بعمق وكيف شديد ويضع الفنجال بلطف • عبد الستار : السكري جاني كم مره وما لقاني واخيرا قنع مني • الجميع يضحك • حاج احمد : لسه دمك خفيف يا عبد الستار • عبد الستار : الخفه سمحه • الجميع يضحك من جديد • احمد : اسمحوا لي يا جدو , داير اخش النت • حاج احمد : النت ده خاشيهو بالباسبورت ؟ وينها الكهربا ؟ • احمد : اللاب توب مشحون • حاج احمد : اريتم لو عملوا لاب توب للمويه عشان نجيبها لو النور قطع 000 امشي يا ولدي 000 اخد راحتك • احمد يذهب الي داخل المنزل • حاج احمد لعبد الستار : اديك التني • عبد الستار : تني وين ! يا حليل لما كنا بنتني 00 القرحه والضغط ديل بخلو زول يتني تاني 000 تاني تتني رقبتك بس وتعيش في الذكريات • حاج احمد : اخير نحنا عندنا ذكريات حلوه بنجتراها 00 الصغار ديل لما يكبروا يجتروا شنو ؟ • عبد الستار : يجتروا ذكريات زمنهم يا احمد 000 كل زول بزمنو وكل فكره بتبقي واقع وكل واقع ببقي ذكري • حاج احمد : اخد ليك تكيه انبطح يا عبد الستار • عبد الستار : مره تانيه يا احمد يا اخوي 000 انا ماشي 0000 طالما عرفت البيت بجيك طوالي • عبد الستار يهم بالخروج , احمد الصغير يأتي ويوصله للباب ويعود ويجلس مع جده حاج احمد • احمد : ده صاحبك يا جدو ؟ • حاج احمد : صاحبي ساي , ده اخوي عديل كده , كنا ما بنتفارق , كور المريخ دي كلها بندخلها مع بعض و كنا بنحرق العمم التوتل بعد الكور فرحه بالمريخ , توتل اصلي انجليزي • احمد : بالله كنتوا بتحرقوا عممكم ؟ • حاج احمد : لاعب المريخ زمان يجبرك علي حرق العمه من الهمه والولاء والاداء الجاد , اسي الاعب يحرق اعصابك ويحرق حشاك بالتراخي والاهمال • احمد : قصدك اللاعب اتغير ياجدي ؟ • حاج احمد : طبعا اتغير , واتبدل كمان • احمد : والسبب شنو ؟ • حاج احمد : الاسباب خفيه يا ولدي , في الجريده يقولوا كلام , وفي الاستاد يقولوا كلام , وفي الشارع يقولوا كلام , والبحصل كلام مختلف عن القالوهوا كلو وتفضل الحقيقه غائبه والواقع تردي في المستوي , لكن انا تاني ما بسأل زول , بنوم في الخيره وبعرف اي شئ في المريخ سببو شنو ؟ • احمد باستغراب : بتعرف تنوم في الخيره يا جدي ؟ • حاج احمد : كيفن مابعرف , والنوم في الخيره اخير من النوم في الغرفه والنور قاطع واخير من النوم في الحوش والباعوض صاحي واخير من النوم في الخط وانت عارف الخلل وين • احمد : قبل كده نمت في الخيره يا جدي • حاج احمد : كتير , واخر مره نمت في الخيره يوم كورة الاردن وعرفت سبب الهزيمه الاليمه • احمد : البرد طبعا • حاج احمد : ابدا • احمد : المطر • حاج احمد : ابدا • احمد : الجليد • حاج احمد : تلجه واحده ما قابلتني في الخيره • احمد : طيب سبب الهزيمه الفضيحه شنو الانت شفتو في الخيره ياجدي ؟ • حاج احمد يؤشر لاحمد كي يقترب منه ويتلفت ثم يخبره بالشافو في الخيره همسا • احمد يضع يديه علي راسه من الهول ويقع ارضا وينهض ثم يضع يديه علي راسه ويردد لاحوله ولا قوه الا بالله • حاج احمد : انت شفت شئ ؟ دي الخطوط العريضه • احمد : قول لي بالتفاصيل ياجدي • حاج احمد : السبب الحقيقي يا ولدي 000000000 • برق عبادي ثم رعده وسحب تأتي مسرعه , احمد يحمل مرتبه ويجري بها للداخل وهو يصيح ياجدي ادخل المطره شديده , حاج احمد يدخل مسرعا للداخل والرعد يزأر بشده • حاج احمد تحت البطانيه وعينيه فقط خارج البطانيه واحمد في نفس المنظر , • احمد : احكي لي ياجدي تفاصيل الاردن • حاج احمد : حتي السماء ابت لنا اكمال القصه , لو تميتها ليك الصاعقه بتقع فينا , خلي المطره تقيف وبحكي ليك • احمد مهمهما لنفسه : معقوله البحصل ده ؟ طيب باقي المجلس عارف بالحصل ده ؟ طيب لو عارف اتخذ شنو من القرارات ؟ طيب لو اتخذ قرارات ليه ما نفذها ؟ طيب لو نفذها لزوموا شنو يحصل الحصل في الاردن تاني ؟ طيب لو حصل تاني الجمهور ذنبو شنو يتحمل الحاجات دي ؟ طيب لو الجمهور اتحملها الزعيم ليه يدفع التمن من سمعتو ؟ • حاج احمد : قول بسم الله يا احمد , الباروا الكلام زيك كده اسي حايمين في الشوارع من صينيه لصينيه , واصلو صواني المرور فاضيه عدمانه العسكري , كلهم شغالين حملات • احمد : وسيكافا ؟ وكروجر اتشال ليه وحاجات كتير ؟ • حاج احمد : الليله بنوم ليك في الخيره اوريك سيكافا سببها الحقيقي منو 000 اقصد شنو 000 نوم في العصريه دي يمكن الخيره تجمع معانا ونعرف حقيقة سيكافا وكروجر , لكن الجميل الجو داااااافي • ملحوظه • بكره الحلقه الاخيره • الخيره جمعت مع حاج احمد • حقائق مطر • يا صواني المرور جوك ناس • والي لقاء
