بسم الله الرحمن الرحيم في السلك • قال لي صحي ايداهو ماشي الهلال ؟ • قلت ليهو ايداهو ناقصو شنو عشان يمشي يلقاهو في الهلال ؟ • قال لي ناقصو فلس وبشتنه • قلت ليهو وتيب ! • تسعه في خط سته • شغلهم تطفيش وتشليت • تمشي قدام نفر واحد يسكها • اسي دي طريقة لعب دايره ليها مدرب برازيلي • قال لي السنه دي طلعتوا كيت • قلت ليهو ابدا • اول حاجه في المواجهات المباشره معاك لم تتفوق علينا بل تساوينا في النتائج والاهداف وتفوقنا في اللعب والاخلاق • وقلت ليهو اقيف لسه اقيف واسمع , ايداهو مهاجمنا هو هداف البطوله الافريقيه انتوا في الافريقيه غير خمسه في استادكم طلعتوا بي شنو ؟ • وقلت ليهو عدد ضربات الجزاء التي احتسبت لك في الممتاز اكبر من عدد النقاط التي فزت بها بالممتاز • وقلت ليهو مجدي لو وجد التقرير كان سته نقاط اتخصمت منك • حكم مباراتكم مع الخرطوم لو احتسب ضربة الجزاء التي كتل فيها المعز مهاجم الخرطوم كان فقدت نقطتين تاني , يعني تفقد تمانيه نقاط , يعني تفقد الكاس زاتو • ده حالتو لم نتطرق لمباريات اخريات • واذا كنت تعتقد انك حققت نتائج طيبه في الانديه الافريقيه تعال نتمعن بهدوء • مباراة زيسكو ضربة مرمي بقدرة قادر اصبحت ركنيه وسبحان الله خليفه جابها قون • خليفه يا ناس جاب قون • ضربة جزاء لصالح زيسكو الشوط التاني الحكم دخلت ليهو باعوضه في عينو ماشافها • مباراة كانو بلايزر ضربة جزاء والكوره ضربت في ضهر مدافع • استفاده قصوي من قرارات تحكيميه غريبه دفعت الاتحاد الافريقي لاختيار حكام من الاممالمتحده لمبارياتكم • تقول لي انجزنا • تشكيلة الهلال التي فازت بالصدفه والكدايس في ختام السودان معظمها طالع شطب • خليفه , كابوندي , امبيلي , المدير ,وسادومبا , وده غير اسامه التهاون وبقية العقد الفريد الكان قاعد كنب • قال لي مدربنا واقف الكوره كلها ويكوك ومدربكم قاعد ساكت ساي • قلت ليهو الابو لو ولدو قاطع الشارع وكان الولد غشيم بقيف ليهو في طرف الزلط ويكورك , اقيف اصبر يلا اجري , واذا كان الولد لماح وتفتيحه الابو بخليهو يقطع الزلط براهو • اما انجاز كأس السودان فلو احتسبت ضربة الجزاء التي ارتكبت في بداية الشوط الاول كان لي اسي الكوره ما انتهت 0 وحتي لو تم الفصل فيها بضربات الجزاء كان مديركم لي اسي قاعد راجي دورو زي السنه الفاتت • قالوا كاس السودان الساكن اربعه سنين في الكندشه والطوابق والسسراميك وحوض السباحه والزجاج المظلل زعل وحلف مايسكن الزريبه المريبه المسخنه , وقال في الحر ده ما بقدر اقعد , مامتعود • اقول ليكم عشان يقدر كاس السودان يقعد في سخانتكم دي كسروا ليهو تلج • كان ماعندكم قروش التلج ماتخجلوا اتصلوا بحبيب • قبل الكوره بيوم محمد علي صاحب البقاله الهلالابي ولانه زول كوره قديم عرف انه مهزوم عشان كده قال لي ناس الكوره اوعكم تجوني هنا بعد الكوره بخسركم • محمد علي براهو • متوكل عثمان عبدالمجيد اتعشي الساعه العصر ونام • لما صحوهو وقالوا ليهو الكوره اتنين قال شويه والله , الله سترنا , كلتشي مالاعب ولا شنو ؟ في المعز ولا في الدعيع • هضربه شديده • والله بدي الجنه • اكرم ترافولتا • يقترح الرقصات ويقلده الآخرون • ارقص يا اكرم • طالما يكره الهلالاب اكرم اذن اكرم لعاااااااااب • رقص اكرم رقصت كديابا برشاقه كانه كان راكب مكنة قص النجيل او راكب عربة الملاهي • والمقلدون الرواكيب رقصوها كزحف افعي مصابه في سهول جدباء دون ادني شكل من الرشاقه • الدور الجاي ارقص يا اكرم رقصه كديا شعر • شوف منو البقدر يقلدها • ها000 ها 000 ها00 • الا يقولوا زي ماعمل اكرم • الله بدي الجنه يا اخوي • لا اعتقد ان البونيه في الميدان تحتاج لحمايه تحكيميه • علي اي لاعب في المريخ ان يعرف كيف يقتص الاعتداءات الخارجه عن القانون ويحمي نفسه • دونكم قلق في مباراة كاس السودان الماضي مع نفس اللاعب • تتذكروا القطنه • البادئ اظلم • الذين سكتوا عن البونيه حاليا سينتقدونها عندما يستفحل الامر • زي ما سكتوا عن التوابيت اول الامر وحرقتهم يوم مازيمبي • واول الساكتون الاذاعه الهلاليه • لن نتدخل في عمل المجلس في هذه المرحله • اعملوا بهدوء وسجلوا من تتوافر فيه روح المريخ • ميسي يا والي لسه صغير خليهو موسم تاني • ماتستغربوا • جمال لو قال ميسي بجي • ميسي حا يجي • موش زي قودوين الخرفان ( بضم الخاء ) لي اسي في المطار • اكرم الرقصه الجايه معاها قصه معينه لزوم عدم التقليد • تقليد اكرم ده ذكرني كلام بقولوهوا عن الفنان المرحوم حسن عطيه امير العود • قالوا سألوهو يا استاذ انت بتاكل الكلام ليه ؟ • قال ليهم عشان الناس الساي ما يقلدوني • اكرم 000 ارقص سلك كهربا هديه من الله والله بدي الجنه والي لقاء