من أشكال أكل أموال المواطنين بالباطل والتي إنتهجتها كثير من المؤسسات الخدمية الحكومية أن يقوم المواطن بدفع رسوم ما فيفاجأ بأن المكتوب في الإيصال يقل عما قام بدفعة .. وبالطبع لو أن المواطن عاوز يعمل فيها (تفتيحة) فإن معاملته لن تمر ! سبق أن نبهت أخواننا في قيادات الشرطة عبر مقال عن مثل هذا التجاوز بأحد مكاتب السجل المدني بمدينة سنار .. وطلبو منا بعض المعلومات وقاموا بإستجواب الشخص الذي قام بالتبليغ .. وبعد أشهر من الواقعة علمت من نفس المواطن إنو (الشغلانية مدورة لسه) فقمت على الفور بكتابة مقال أنبه فيه إلى ذلك واطلب فيه من أخواننا في الشرطة الرد لكن للاسف (صهينوا) ! لم يمض على ذلك وقت (قليل) حتي أخبرني مواطن بانه قد تعرض (للشئ ذاتو) في مكتب إستخراج البطاقة الشخصية بمدينة بحري إذ وجد أن المبلغ المسجل بالإيصال يقل عما دفعه حقيقة .. فكتبت منبها الإخوة في الشرطة بان هنالك مبلغا من المال لا يظهر في (الإيصال) .. وبرضو لم يرد علينا إخواننا في قيادة الشرطة حتى هذه اللحظة ... والعبد لله لن يندهش لو ان (الشغلانه) لسه مدورة فالتعامل مع (حال سنار) السابق يغنينا عن (سؤال بحري) اللاحق ! وكما أن هنالك فساد مالي فهنالك فساد (إداري) وهو الإهمال وعدم القيام بالمسئولية كما يجب والذي يتضح في هذه القصة والتي تكون قد واجهت الكثيرين مثلي .. في بداية شهر يناير الماضي قمت بترخيص عربتي بمجمع الترخيص بالمنطقة الصناعية بحري .. وبعد دفع الرسوم (المتلتلة) والملف (الإجباري) أبو عشرة الف والذي لا يساوي ثمنه (ألف جنيه) (البدون إيصال) والما معروف قروشو بتمشي وين ؟ إنتهيت من كل مراحل الترخيص وتم تسليمي (اللوحة) : - ممكن تدوني شهادة الملكية الممغنطة ؟ - والله يا استاذ (حبر مافي) ممكن تجيها بعد كم يوم ! بعد كم يوم إستقطعت من وقتي و(بنزيني) وقطعت المسافة من منزلي (أم درمان) إلى مجمع الترخيص المزدحم (بحري) وبعد مدافرة ونحنا ناس (عيانين وكده) وصلت إلى الشرطي : - يا إبني أنا جيت رخصتا ... (وحكيت ليهو الحكاية) - والله يا حاج (الحبر لسه ما وصل) تعال لينا بعد كم يوم عندما تكررت المسألة حوالى أربع مرات أقسمت بألا اذهب مرة أخرى إذ ليس من المنظق ولا العدل ان أهدر وقتي ومالي وصحتي من أجل خطأ يرتكبه غيري . عن طريق الصدفة وفي تلك الأيام (يناير) إكتشفت أن (رخصة قيادتي) تحتاج إلى تجديد فحملتها وذهبت إلى (البينية) بالملازمين حيث وجدت ضابطاً برتية (رائد) - عاوز أجدد رخصتي لو ممكن الإجراءآت شنو؟ - والله يا استاذ (حبر مافي) !! بالطبع لم أذهب مرة أخري .. إنتظرت متوقعاً أن يصدر الإخوة في الشرطة تنويها للمواطنين عبر وسائل الإعلام تخطرهم بوصول (الحبر) عشان يجو يستلموا شهادات عرباتهم أو يجددوا رخصهم لكن ذلك لم يحدث إذ يبدو أن (الشرطة) عايزه المواطن كل يوم يومين يمشي هو يسال ! أخي مدير عام الشرطة : لو قلتا ليك إنو (العبدلله) كل يوم والتاني ح يقوم يبطل شغلو ويقطع (المسافات دي) عشان يمشي يسأل ناس الترخيص (جبتو الحبر) .. أو ناس رخص القيادة (الحبر جاكم) ويقولو ليهو (لسه ) يكون بيكضب عليك .. أنا الآن اقود عربتي دون (شهادة بحث ممغنطة) وبرخصة قيادة (غير مجددة) وأجد نفسي غير مخالفاً للقانون ولو تصرفي ده (غلت) قولو ليا فالعبد لله ليس مسئولاً عن أخطاء من بيده مقاليد (الحبر) !! كسرة : نرجو من الأخ مدير عام الشرطة التعليق على هذا المقال .. وهل (الحبر جا) وللا (لسه) وبالمرة الرد على حكاية (سنار) و(بحري) دي والحصل فيهم شنو عشان نطمئن وكده؟ كسرة ثابتة (قديمة) : أخبار ملف خط هيثرو العند النائب العام شنو(وووو وووو وووو وووو)+(و) كسرة ثابتة (جديدة) : أخبار تنفيذ توجيهات السيد الرئيس بخصوص ملف خط هيثرو شنو(و)؟
