احتل الهلال المركز الثاني على المستوى العربي، والثالث على قارة افريقيا وال(103) على مستوى العالم، بعد أن جمع في رصيده (118) نقطة!!. جاء ذلك من خلال تصنيف الاتحاد الدولي لتاريخ وإحصاء كرة القدم التابع للاتحاد الدولي (فيفا)، بينما حل فريق الوصيف في المركز (135) عالمياً!!. *على الرغم من أن تصنيف الفريقين فاق المائة إلا أننا سنضحك تحت شعار أن أبو مية وتلاتة بضحك على أبو مية خمسة وتلتين، حيث يمكننا القول إن الهلال أفضل من المريخ ب32 نادياً، (نادي ينطح نادي) والفرق بين الهلال والمركز الأول (100) نادي (فقط)- حلوة فقط دي- (إن شاء الله يوم (فقطكم ما يجي) عكس المريخ الذي يفصله عن المركز الأول مائة واربعة وثلاثون نادياً (غير نادي العمال، ونادي المحامين، والنادي القبطي).. ناس الاحصاء ديل لو دخلوا ليكم الأندية دي كان المريخ جا في المركز ال1035!!. *أكتر حاجتين عاجبني في احتلال المريخ للمركز ال(135) أول حاجة إنو رقم التصنيف دا رقم مميز، يعني ناس الاتحاد ديل بكونوا اختاروا ليهم الرقم دا وفق حاجات كويسة، لانو لو القصة نتائج فالمريخ مفروض يحتل المرتبة ال3500، انتو عارفين بكون ال(كاف) ادخل في الموضوع، وكلم ناس الاتحاد الدولي للتاريخ والاحصاء بي إنهم ينظروا للوصيف بعين الشفقة، ويضعوا في اعتبارهم إنو مهما حصل فالمريخ موضوع على رأس المجموعة الأولى في بطولة الأندية الافريقية الأبطال، فقاموا ناس التاريخ ديل اختاروا ليكم الرقم المميز دا، عشان يليق ب(طيش المجموعات)، والنصيحة الرقم دا أنا حسدتكم عليه، يعني لو سبقتوه بي صفر تسعة على كم تلاتة كدا ممكن تدخلوا بيه موسوعة غينس للطياشة القياسية.. وعادي تختوه تلفون في اليافطة بتاعة ال(رد كاسل)!!. الحاجة التانية العجبتني في احتلال فريق الوصيف للمركز ال(135) دا إنو اتصنف من (العشرة الأواخر)، ودي فرصة حقو تستثمروها في (قيام ليل).. خاصة إنو عندكم مقومات القيام دا، يعني إنتو النادي الوحيد في السودان العندو اضاءة حديثة مطابقة لمواصفات الفيفا، أهو تقولوا عملتو بيها حاجة!!. *لن استبعد أن يخرج علينا الإعلام السالب كما يحلو لمجلس المريخ مناداته طاعناً في نتائج الاحصاء هذه، ويحدث أنصاره ب(مزيد) من التخدير والأسى عن أن الاتحاد الدولي لتاريخ واحصاء كرة القدم اغفل تفوق المريخ في هذا الموسم على عدة أندية منها (نادي التنس)، و(نادي الزوارق)، و(نادي الضباط)، و(نادي العامل البحراوي)، و(نادي النفط)، والتفوق يتمثل في احراز فريق الوصيف لكأس اللعب النظيف لبطولة شرق ووسط افريقيا!!. *احتلال الوصيف للمركز ال(135) كان بالأفضلية على عدة أندية نافسته على هذا المركز منها نادي توسكر، ونادي فريق شيخ محمد الصومالي، ونادي عمال النظافة، وتفوق المريخ عليهم بلقب الوصافة الذي احرزه في النسخة (35) من بطولة شرق ووسط افريقيا!!
