ما عارف ...الاتغير شنو في الدنيا دي؟ ...اي حاجة مسكها ليك (تقشف) رئوي. تقشف (فجأة) كدا.
التقشف ..ظهر ليك في ناس المريخ ..بشكل واضح ...المريخاب الايامات دي كلهم شغالين ب (المسكول).
الواحد لو ضرب ليك ..بقول ليك جملة واحدة : (اسمع ارجع لي في الرقم دا).
ويقطع الاتصال.
الكلام دا ..قالوا كدا ...(من باب الخيال السينمائي) قالوا الامين العام لمجلس ادارة نادي المريخ لاحد اللاعبون المنضمون حديثا للمريخ.
شفتوا لو جاتك رسالة بتقول (صاحب هذه الرقم يرجو الاتصال به) ..اعرف طوالي ان الرسالة دي من مريخابي.
الفلس ظاهر في مسكولاتهم.
يا حليل زمن جمال الوالي ...الواحد كان بشغل اف ام 104 ..وبفتح خط التلفون.
زمان المريخاب ...كانوا في كل تسجيلات ..بفلقونا ليك بي حاجة كدا زي وارغو او الحضري.
او متل لاعب مازمبي الكنغولي (مبينزا)..جابوه شالوه في الخرطوم ..واتصوروا معاه ناس ابوجريشة وصديق علي صالح ..ورجعوه اهلو.
تقول نحن ناقصين (صور).
مبينزا دا زي (الصيوان)...تجيبو ..وترجعو.
انتوا وين الزول دا؟.
المريخاب زمان مع جمال الوالي كانوا (متجدعين) في الدنيا دي ...(تسجيلاتهم) كانت صور ساكت..ودراريب.
ناس ابوجريشة ..وصديق على صالح وابراهومة ..شبعوا في (الصور).
هسع ابراهومة ..انسحب من الموضوع دا.
الموضوع بقى زي فطور الداخليات فيه (شيلن).
وابراهومة ما بحب الحاجات دي.
ابراهومة ..ما بتصور مع لاعب بورندي ..(والله اسمو ما عارفو).
مع عصام الحاج ...المريخاب ...اللاعب بقوا يدخلوا كشوفات المريخ ..بعد ما يقعدوه مع جمال الوالي ويوعدوه (وعد) ساكت ..ويجبوه الاتحاد.
يشبعوه كلام ..ونظريات ...ومثل وقيم.
جمال الوالي استقال طبعا ..لكن برضو ما بقصر مع المريخ ..اللاعب العاوز يسجلو المريخ بقعد ليكم معاه.
نكاية كدا في عصام الحاج.
طبعا أي لاعب بقعد مع جمال الوالي (مغمض) بيلعب في المريخ.
ثقة ساكت بيلعب.
عصام الحاج ..(مفتح)..بجيب اللاعب (يقعد) مع جمال الوالي ..ويلبد ليه في شارع عبيد ختم..اول ما يطلع من حي الصفا ..عصام الحاج بسوق اللاعب وجري على الاتحاد العام.
اللاعب بكون منتشي بالكلام.
بعدين ..بيني وبينكم (والكلام دا ما يطلع من العمود دا)...انا من شفت ليك اجتماعات مجلس المريخ كترت ..عرفت ليك طوالي انو الناس ديل (فلسو).
اصلو الاجتماعات في السودان مربوطة بالفلس.
الجماعة من يقعدوا ينظروا ..وكلامهم يكتر ..واللاعب يقولوا ليك ما اجتاز (الكشف الطبي) اعرف طوالي انو في (فلس) حاصل في (البنكرياس).
البنكرياس ..هسع ذنبو شنو؟.
والله في البرد دا ما عندو أي ذنب.
لكن مع دا ..والله اخير ناس المريخ...ناس الهلال بقوا (الشطب) يعملوا ليه (شيلن).
قروش الشطب ..يلقطوها ..لقيط ..تقول نحن في موسم الفيضانات والسيول والامطار.
ناس الهلال جابوا ليهم عضو جديد اسمو (العسقلاني)..زي الزول البيجب ليك نتيجة الفحص.
الزول دا مفروض تصرفوا معاه (بندول).
وإلا توزعوا ليكم معاه (قفة ليمون).
زولكم دا لي هسع شغال بي نظام (اركان النقاش).
انت يا العسقلاني ..قايل الناس لسه واقفين في حتة التخرج من الجامعة.
الهلالاب ديل مشوا ..مشي صاح.
يعني ما تقعد تنظر لينا ساكت.
زول فرحان ..اول ما دخل مجلس الهلال قال انا عاوز اطبق نظام ريال مدريد في الهلال.
والله دي صلاح ادريس ما سبقك عليها يا العسقلاني.
تذكروا صلاح ادريس وقت قال ح اجيب طيارات تأخذ الخرط لاستاد الهلال من فوق.
ونحن صدقنا.
اخر حاجة اكتشفنا ان صلاح ادريس عاوز يبيع الاستاد ويعمل لينا استاد في (صالحة).
يعني لو كنت ماشي تمرين للهلال ..إلا تتحرك قبل تلاتة يوم.
استاد جوار المطار الجديد ..لو ماشي تشاهد فيه مباراة ..إلا تشيل ليك (شنطة) فيها 4 غيارات.