السيد زنكلوني (بقّوه والي)، وكان في عهدتو الشخصية (13) مليارًا، قام وضّبا، يعني قطعها النفس، بعد ما اكتشفوا الحكاية دي، قاموا أعفوه من منصبو كوالي... بعد ما شالوه بقى ينق فيهم: يعني خلاص نسيتوا مجاهداتي الزمان ديك كلها من زمن جامعة الخرطوم ضد الشيوعيين، وأعداء الإسلام، ونسيتوا مجاهداتي ضد العملاء والخونة، وأذيال الإمبريالية والصهيونية العالمية، يعني عشان ملاليم اصدقتا بيها على الفقراء والمساكين، وأصحاب الحاجات، ونافحتا بيها لرفعة الدين والتمكين ليهو، يكون جزاي جزاء سنمار ثم طفق يبكي، ويبكي.. قال ليك بعد ما أخد بكيتو ودوه مؤسسة (الهبرو ملو)، وهناك ما كضّب، قام باع كل شيء حتى (خط غرينتش)، وخطوط الطول والعرض الأخرى، يعني أفقي ورأسي.. منشار بس طالع ياكل ونازل ياكل... قاموا دايرين يعاقبوه شالوه من مؤسسة (الهبرو ملو)، وشبَكُم تاني بكا، نسيتوا تاريخي الجهادي، واتنكرتوا لي مجاهداتي الفاتت، والله صحيح البتاعة بتاكل بنيها... قاموا ودوه محل القروش ذاتا، نزل فيها أكِل زي الهدّام، ما خلى حاجة واقفة، شافوه كدي، قاموا شالوه، وشبَكُم بكا بدموع التماسيح نسيتوا تاريخي الجهادي ومجاهداتي مع الشيوعية والإلحاد، قاموا تاني ودوه رئيس مجلس إدارة (السجم) سجّم خشُمها للأبد.. دايرين نشوف تاني ح يودوه وين، السجن ولاّ مؤسسة تاني... أيامك ساكوبيس .!!!!! مرسي والبشير والخضر تقول الطرفة إنو الرئيس مرسي قال للبشير، والله يا أخي أنا تعبت من الشعب المصري دا، أنا مش عارف أتعامل معاه إزاي، عملت ليهو أيُّها حاقة، هو مش عايز يخليني أشوف شغلي.. قالو البشير همس ليهو في أضانو: أمشي للخضر، أمشي للخضر.. هاآآآ يا الخضر أعمل إيه؟...! قالوا الخضر قال ليهو غيِّر ليهم (المواقف) خلي الواحد لو داير يمشي بيتو يركب من وين ما يعرف.