وضع خضاره وفاكهته في سيارة بوكس عتيقة بدت وكأنها من بقايا الحرب العالمية الثانية إن لم تكن الأولى، وحين كان منهمكاً في البيع وقف موظف المحلية قائلاً: + عايزين رسوم الترخيص ورسوم النفايات ورسوم الملاريا قال حاج حمد: * واحدة واحدة كدي نبدأ برسوم الترخيص أنا مرخص يا خوي. + عندك رسوم عربية متحركة. * عندي رسوم بيع عادي لأنو العربية ما متحركة. + المهم اتحركت وقفت لحدي هنا. * جينا جارينها لحدي هنا بكومر وهي مجرد طبلية ما عندها علاقة بالعربية غير اللساتك بتاعتها دي. + ونتأكد كيف؟ * جيبو مكنيكي + يا خوي دي ما مهمتنا المهم عندنا هي عربية فيها لساتك وخلاص * طيب بفك اللساتك وأرفها بالطوب؟ + ما تتعب نفسك ساكت لو ما عايز تدفع جيب طبلية بدل العربية دي * خلاص ما مشكلة. + طيب ادفع حق النفايات. * يا جماعة أنا يا دوب بادي وقشاية واحدة ما بتقع من خضاري ده. + طيب أنت وللا ناس الاتصالات الماعندهم نفايات برضو بدفعو. * خلاص مرو علي بعد أسبوع أكون دبَّرت ليكم المبلغ. + طيب أدفع رسوم الملاريا. * أدفع كيف رسوم ملاريا والبركة الجمبي دي جابت لي ملاريا وعايزين تدفعوني بدل ما تعالجوني؟! + حتى لو دخلت مستشفى برضو حتدفع إلا إذا اتلحست. * لا بالله ما أحسن تقاضي الورثة كمان! + يمكن يدخلوها في اللائحة السنة الجابة لكن المهم هسه ادفع. * ادفع كيف المفروض تعوضوني لأنو جاتني ملاريا من بركتكم دي مش أدفع. + يا خوي نحن لو بندفع لضحايا الملاريا كان فلسنا زمان. * خلاص أدوني كمان يومين. + ما في طريقة أديناك فرصة في رسوم النفايات والترخيص. * لكن هسه ما عندي قروش. + يا زول ما تكتر كلامك كان ما دفعت حنشيل الميزان. «ثم يمسك بالميزان». * كدي فك يا زول الميزان أنا ما قلت ليك ما عندي قروش هسي. + تعال شيلو من المحلية بعد ما تدفع. ويمسك حاج حمد بالميزان مما يثير غضب موظف المحلية ويقول متوعداً + فك يا زول ولا نفتح ليك بلاغ تعدي واعتراض موظف عام. وهنا يصحو حاج حمد من نومه وأنفاسه تعلو وتهبط ثم جلس على السرير وفرك عينيه وقال «أستغفر الله العظيم شكيتكم الله يا ناس المحلية حتى في النوم ما مريحنّنا.!
