منافسة الرديف هي منافسة لها اغرضها واهدافها السامية من تلك الاهداف هي مرحلة من المراحل السنية التي تصقل المواهب وتأهلها عشان يجي يوم يكون عندنا الف لاعب دولي في عمر صغير الف لاعب تلقوا التدريب السليم والعناية والرعاية من عمرا بدري والرديف هو آخر سلمة في سلم الترقي للفريق الكبير السنة الفاتت كانت اول منافسة لعبت بنظام المجموعات ونجحت المنافسة اكتملت حلقاتها حتى النهاية برغم محاولات البعض الزوغان من المباراة النهائية لاغراض الانتماء الرخيص ولكنها بكل المقاييس كانت منافسة ناجحة في هذا الموسم لعبت المنافسة بنظام الدوري سفر يا عمك يعني رديف الرابطه كوستي يجي من كوستي عشان يلعب مع رديف هلال الفاشر بالفاشر ورديف مريخ الفاشر يسافر يسافر عشان يقابل رديف اتحاد مدني بمدني وهكذا تكاليف على الاندية في بلد لا تدعم الرياضة النادي ما قادر يوفر منصرفات تمرين للفريق الكبير كمان جابت ليها سفر شفع للولايات ؟؟؟ عشان كده معظم مباريات الرديف هذا العام انتهت بغياب طرف وفيهن مباريات الغاب فيها الرديف صاحب الارض وممكن نتفاجأ بغياب الفريقين عن المباراة يبقى حاتفشل المنافسة سيتبدد الهدف من الفرق الرديفة سنفقد الامل في الفرق الرديفة كما فقدنا الامل في الرغيفة ونعود للمربع الاول ويتطور الناس ونحن في القاع نضحك على سياداتنا التي اوصلتنا بغبائها وجهلها لذلك القاع المضحك يحدث ذلك لان النظام يعيق النظام بتاع الاتحاد ما تجيبوا لينا الكلام ساي نظام الاتحاد يعيق ايها الناس طالما الدولة لا تدعم الرياضة بل تأخذ من الرياضة ضرائب وجمارك وعوائد حقو نعيد منافسات الرديف الى نظام المجموعات عشان نحافظ على الهدف الرسالي ونبقي على مراحلنا السنية الى ان تضع الدولة الرياضة في المراتب المتقدمة من فقه الاولويات او الى ان يقضي الله امرا كان مفعولا ونتطور ولكن اياكم والتفريط في الاشبال والرديف بسبب إحجام الدولة المهم مباراة القمة قربت ومباراة مازيمبي برضو قربت هزيمتين ورا بعض كتار على كامبوس اعملوا ليهو كورة ضد الشجرة بعد كورة المريخ وقبل كورة مازيمبي عشان يدرن فيها مع الشجرة ووارغو يجيب قون الدرون اصلو متخصص في الشجرة وبي كده يكون الهلال اتغلب ودرن واتغلب يفصل بالدرون بين الهزيمتين ايها الناس نادي الحركة الوطنية سابقا نادي الشجرة حاليا يعتمد كثيرا على المجاملات يدخل القصر بدون انجاز يستلم دعومات بدون اساس فقط شعارهم اوعك تقطع صفقة شجرة ومن يوم ما استلم عطا المنان انقطعت سيرة الحركة الوطنية ونادي الخريجين طلعت لا حركة وطنية ولا شي طلعت حركة شفع ساااااااي ومن حينها انا ما بقول فلان هلالابي بقيت اقول فلان شجرابي مع تحياتي للاستاذ عبدالمنعم شجرابي الزول الوحيد العرفها بدري وعلق اللافتة واااااااضحة فعبد المنعم شجرابي والرشيد شجرابي وفطومة اختي برضو شجرابية والشجر الكتير بدور ليهو جنايني حانوريكم البستنة قريب ده نحلق لكل الاشجار مقص الشجر اسمو تراوري اها نجي لي شمارات والي الخرتوم كان شفت يا والينا قالوا السارس جا السعودية ومصر وجايينا لكن اطمنك يا والينا واطمن اهلنا الهنا والبره الشفقانين علينا انو السارس ابدا ما بجينا فالسارس بجي في البلدان النضيفة وابادت كل ضبابينة ونحنا بي ضبانا السارس ما بجينا شكرا لحسن القيادة يا والينا شكرا لانك فوق راي خليت ضبابينا حايمة فينا شكرا ليك وانت من السارس حامينا سلك كهربا ننساك كيف وحتى السارس كان جانا تلغفوا ليك ضبابيننا ، بلد كلها لغف والى لقاء