بقوا زي التاية الله يرحمها التاية دي جارتنا زمان اضانها تقيلة لي بهناك جا واحد خطب بتها سهام عقدت ليهو على بتها التانية الرضية كان عندها برج حمام وعندنا برج حمام مرات حمامها بجي برجنا وحمامنا بمشي برجها لما حمامها يجينا بنرجعوا ليها بالحيطة ولما حمامنا يجيها الا نمشي ليها التاية حمامنا جاكم ؟؟؟ تقول لينا والله الليلة ما عسنا التاية دي بتذكرني الجارات القالوا كانن اضنينهن تقال قالوا عشة كوركت للتانية بالحيطة فاطنة فاطنة هوي ماشه السوق ؟؟؟ فاطمة قالت ليها لا لا ماشه السوق عشه عقبت بقولها .... كدي ! كنت قايلاك ماشه السوق ده حال مجلسنا ومجالسنا المتعاقبة يقولوا ليهو الفريق داير اطراف يجيبوا اربعة حراس مرمى كنت قايلاك ماشه السوق يقولوا ليهم الفريق داير صانع لعب يقولوا ما عسنا يجيبوا لينا محور يقولوا ليهم محتاجين حارس مرمى ممتاز يسجلوا لينا اربعة باكات شتر يقولوا ليهم رفعوا من الرديف لا لا ماشه السوق يجيبوا لينا ناس فوق الاربعين حيرونا ناسنا ديل التاية لو قعدت في الدنيا دي قدر ما ديل قعدوا في المجلس كان اضانها فتحت وسمعت الكلام يا مجلسنا يا تايتنا وتايوتتنا اسمعنا مرة الاشبال الاشبال الاشبال لانو الروح اهم شي والروح الفي الاشبال ما دايرة نقاش يكفي انهم هم من اختار النادي وجوا براهم بل من شدة انتمائهم قعدوا في الصفوف للاختبارات ايها الناس الشغل بردة الفعل بخلق نوع من التهور والشغل بحماقة برضو بجهجه الاستراتيجية والشغل بي مكابرة واصرار على اشخاص اثبتوا فشلهم بودي لي كارثة فالجماهير وصلت الحد المحطة الاخيرة يبقى البناء بعتمد كتير على صغار السن ممكن نطعمهم بخبرات لكن شويه لما يكون سبعين في المائة من الفريق بين عشرين الى خمسة وعشرين سنة بنكون فعلا بنينا فريق بطولات والفرصة متاحة لاضافة جوية جديدة تعانق مانديلا لانو مستوى الزمالك والمتهالك والاصلاً هالك الشايفنو في المجموعات ده براحة بنطبق كاسنا ونجي راجعين ده اذا اشتغلنا صاح سامعين يا ناس التاية ؟؟؟ ولا ما عستوا ؟؟؟؟ كان ماعستوا حمامكم كان جانا بعد ده بنضبحوا المهم امس شفت قون عبدالشافي التاني تاني اتمعنتو ياخ مبالغة دراويش لاقو مداح عبدالشافي ينقز وخليفة ينقز في الفاضي عبدالشافي ينقز واتير ينقز بره الحلقة زفة المولد بس وبعد داك ولا عليك بيها رقد واتكي ودردقها درديق سااااااي والله يا محمد عبدالماجد اقصد يا محمد عبدالشافي عمليتك غريبة وحركتك جبانة ايها الناس تصريح راموس بعد النهائي الأوروبي مفروض نقيف عندو زول احرز هدف التعادل في الوقت القاتل وفتح الطريق للنصر الكبير قال بعد الكورة بعد كده كان اتوفيت ما مشكلة لاني حققت هدفي يا ناس مجلسنا ما بتعرفوا لاعبين عندهم اهداف يصرون عليها مثل راموس ؟؟؟ طواااالي الجايبنهم عندهم اهداف ضائعة !!! ماشه السوق !!!!! كنت قايلاك ماشه السوق!! اها نجي لي شمارات والي الخرتوم كان شفت يا والينا امس غنينا يا بلد مهموم ومثقل بي همومك ... يابلد مجروح وتنزف في دمومك يا بلد عريان مسولب رغم خيرك ... وغيرك اللابسين هدومك بكيت على ارواح ولادك ... ضحكت من شر البلية بنستبيح حرمات ظلالك ... ونذرف الدمعات سخية ولما زاد فوقنا الهجير ... لمانا ضل البندقية يا بلد سامحت ياما ... وفي الختام كنت الضحية في الختام كنت الضحية ... في الختااااااام لست الضحية يا بلد سلك كهربا ننساك كيف ولسه نحنا بنغني للبلد والى لقاء سلك