مشينا كورتنا ضد الامل أول أمس في شي جيد وجديد خفة وحركة وروح ما بطالة والمصري البورسعيدي ده فيهو روح قيادة كويسة وشفت كورة الخبرة برضو ليها اثرها ولكن لمسات الصغار ناس ابراهومة وبطة وشيبون وغيرهم كانت لمسات رائعة وصنع ابراهومة هدف المباراة الوحيد بمجهود واصرار وحرفنة وقاتل شديد لم يقنط من الكرة إطلاقاً استخدم حرفنته واصراره في صناعة الهدف عشان كده كنا بنقول الصغار ديل هم من يستطيع ان يغير الحال لي سنتين بقول ارفعوا لينا من الاشبال خلونا نغير الحال على كل نحمد للمجلس الاستجابة للنداء ونحمد للجهاز الفني اختياراته للقادمين الجدد التي راعى فيها السن قبل كلو شي والدور والباقي علينا نشجع ونساند ونصبر ونصابر بالتأكيد سنجني ثماراً ننتظرها كنا طويلاً وحاتطول فترة الحصاد لان الاعمار يافعة فناس علوق الشدة وتسجيلات النجوم الذين يكونوا قد وصلوا سن التقاعد بالتأكيد ما نفعتنا ولا بتنفع من اساسو ولي قدام المهم امس التلفزيون شغال انا ماجايب خبرو فجأة اسمع ليك شاكيري لي فيليب لام وفيليب لام لي مولر قلت كاس العالم بدأ اسي ولا شنو وجريت على التلفزيون لقيت شغالة قناة النيلين اعادة لمباراة المريخ والبايرن كم انت كبير يا مريخ شاكيري وفيليب لام ومولر ديل في ناس ما شافوهم الا في كاس العالم في الشاشة ويكونوا كمان سارقين الكورة كبير انت يا مريخ ناس كاس العالم بشحمهم ولحمهم لعبوا ضدنا والعالم كلو بتفرج غوارديولا في زول شافوا غير في دوري ابطال اوروبا والدوري الاسباني ؟؟؟ وريناكم ليهو يوم كورة المريخ وعشت يا مريخ ايها الناس كتبت عن الخلافات في المريخ ووصفت المريخ بأبيي ولكن هناك جوانب اخرى مشرقة هناك رجال وشباب يقومون بمجهودات رائعة من اجل المريخ لا ينتمون لشخص ضد شخص ولكن المريخ هو انتماؤهم الوحيد منهم ناس منتدى الجماهير تبرعوا بنفق اللاعبين اعدوا اجمل نفق اكتمل في هدوء مضاء ومغطى وبصل الى خط المرمى ومفروش كمان وهم برضو يقيمون مائدة الافطار بمسجد النادي من سنين ويجهزون كيس الصائم من سنين كل ذلك في صمت شديد لانهم يؤمنون بانتمائهم للكيان انتماء بدون مصالح ولا يجرون خلف مناصب ولا يهرولون خلف الاضواء لكم التحية إخوتي اعضاء منتدى الجماهير الناس قدامكم صغار شديد وبمناسبة الاختلاف دي اجدد النداء لاخوة نحترمهم كثيراً أستاذنا إسماعيل حسن والسيد حاتم عبدالغفار القامات جمالها لما تقيف جمب بعض شاهقة ننبذ بعض افكار الشيطان ونتعانق فكلاكما محبوب ومرغوب في دنيا المريخ وكلاكما اكبر من اي خلاف او اختلاف وكلاكما تدعون للائتلاف دوماً وأشكركما على الاستجابة أيها الناس رسالة للجهاز الفني قبل اي شي اعيدوا الينا روح المريخ وجسارة لاعب المريخ وقوة وخشونة لاعب المريخ ولكم ان تجتروا من التاريخ ما يعينكم والحكاية ساهلة فاغلب من في الكشف صغار السن وطينة لينة يسهل تشكيلها وبعد ذلك التكتيك ملحوق كنا إذا احرز المريخ هدفاً رأسياً من عكسية نسأل ونحن داخل الاستاد الجابو منو كل الاستاد يسأل الجابو منو الجهاز الفني ذاتو يسأل الجابو منو لان روح المريخ كانت تدفع تلاتة لاعبين نحو الكرة وما نشوف الا الفنايل الحمر فووووق والكورة في الشبكة وناسنا جاريين كلو زول جاري محل براهو وجماعتنا واقعين في واطات الله دي يلوموا في بعضهم يا برهان و يا محسن اعيدوا الينا تلك الايام الجميلة المهم المجلس قام بدوره والجهاز الفني يقوم بدوره واللاعبون لم يقصروا الدور والباقي علينا يا جماهير المريخ أها نجي لي شمارات والي الخرتوم كان شفت يا والينا أول أمس بعد الكتمة والكتاحة نتلفت نلقى ليك السحاب جايينا المطرة صبت لدينا وصبت فينا تكون محليتنا دفعت رسوم المطر يا والينا ؟؟؟ لكن أظنها دفعت القسط الاول بس لانو المطرة جاتنا رشه يا والينا وقفلوا البلف البصب لينا خلوها دفع مؤخر وفكوها تصب لينا وشيلوا رسوم المطرة من الرغيف اصلو وزنو خف علينا ختوا جنيه في اي رغيفة كيتا علينا بس المهم تشيلوا رسوم المطرة وتخلوها تصب لينا سلك كهربا ننساك كيف والمطرة كانت مجاني أيام بنغني ليها يا مطيرة صبي لينا في عينينا وكانت بتصب الغبيانة والى لقاء