صبرنا على هزيمة بهدف من الشوط الاول وحتى الدقيقة تمنية وتلتين من الشوط التاني الصبر جاب حقو برغم ان بعضنا تفلت غلبو الصبر ولكن الصبر جاب حقو نحنا بنبني في فريق عشان كده نصبر بس هناك بعض الهنات واداء سلبي من الباشا وتراوري بالتحديد ولكن نعذرهما نصبر حتى نهاية الموسم عشان نعرف ثغراتنا وين ونعالجها عشان نعرف الما بشبهنا منو ونفارقو وهدف راجي اعاد لنا ذكريات هدفو في ابو الهل كتل بيهو الاخوة الاهلة ويوم كورة الأهلي دخلهم غيبوبة والهدف التاني قضى على اخوتنا الاهلة ايها الناس التحكيم يصر على تعويض الهلال ما يفقده من نقاط ورجل الخط من الناحية الشرقية علاقة بالكورة ماعندو الزول ده التسلل كان بحسبو ليهو حارسنا الجديد وحكم الوسط المحترم بخل بالبطاقات على اولاد الاهلي لذا عملوا حركات جيش كتيرة وتغاضى عن ضربة جزاء لصالح المريخ وتغاضى عن التانية ولكن التانية لقاها قون ايها الناس احلى انتصار للمريخ كان على الاهلي انتصار عذب العزابة شديد لعبنا ضد الاهلي الفنان وضد التحكيم بتاع حركات زمان وبفريق جديد لسه وانتصرنا عليهم جميعا ايها الناس السيسي قائد ميداني محنك ويستحق نجومية المباراة لكن هناك مشكلة لسه في صناعة اللعب الصبر بحلها نصبر شوية ايها الناس نحمد الله على سلامة رمضان عجب وفي حاجة محيرانا المرمى الشمالي اصيب هيثم طمبل جواره اصيب كليتشي جواره رحل ايداهور جواره اللهم احفظنا من التنجيم وشغل الشيطان الرجيم اللهم ورد كيد اي ساحر للزول الشغل الساحر وورينا فيهم يا كريم المهم كان الشفوت في الميعاد لم ييأسوا وواصلوا التشجيع بكل صبر لانهم وجدوا روح المريخ وجدوا لاعبين يسعون للتعديل بجدية ودي كانت غايبة زمن طويل مننا المهم تبديل عنكبة كان فيه شجاعة من الجهاز الفني ودخول راجي كان اضافة للفريق ولكن افتقدنا شيبوب وتراوري يؤدي باستهتار عجيب ونصبر الى ان نصل للتشكيل الامثل المهم الاهلي فريق كبير ولكن المريخ ليس الهلال ولا اهلي شندي فانتزاع نقطة من المريخ صعب شديد واتوقع ان يشكل الاهلي معانا طرف القمة التاني ويشكل الهلال اذا شد حيلو مع اهلي شندي وصيفا طرفي القمة اي شنكبة عنكبة الخرطوم الوطني بركب فيها ايها الناس نجم المباراة بعد السيسي هو الجمهور الوفي هم الشفوت وعفارم عليكم يا حلوين اها رمضان قرب ينتهي والسرير التاني برد شدييييد حلات الرقدة في الهبابي بالقميص الكنغولي هبوبك يا الله سؤال شرعي هل يجوز افطار الزعلان ؟؟؟؟ لو زعل بالليل وما اتسحر !!! يفطر ؟؟؟؟ يصوم بس !!! حارة لكن اها نجي لي شمارات والي الخرتوم كان شفت يا والينا الشبكة كعبة والكهربا كعبة والمويه ما بتجينا دي دولة يا والينا ولا اجدادنا القدماء !!!!!! سلك كهربا ننساك كيف ورمضان قطع قلبنا والى لقاء سلك
