نظر الجميع الى شنباوي بخوف متجنبين أن يطلق عليهم صفات مثل التي قالها لحاج خضر من أنه نصير الامبريالية العالمية والامريكان وانهم كفار ومنافقين.. فضحك شنباوي وقال لحاج خضر وهو يغادر: شوف ليك طريقة تخارجك يا نصير الظالمين ومصاص دماء الفقراء والمساكين!! فنظر حاج خضر الى حاج احمد وقال له: يا حاج احمد الزول دا ضيعني خلاص.. عاد بعد السنين دي كلها ابقى ضنب للامريكان والكفار.. قول لي البخارجني شنو؟؟ فبدت على حاج احمد الحير فرد قائلاً: المشكلة الحقيقية انو كلام شنباوي مسموع بين الناس وبصراحة كدا لازم تحاول تمنع الكلام دا ما ينتشر بين الناس وتبقى لبانة في لسان أهل الحلة.. عشان كدا أنا شايف أنك تضبح ليك عجل وتقسموا على الناس وتشيل ليك خروف كبير وتوديهو لشنباوي.. ودا الحل الوحيد!! فبدى على حاج خضر الغضب وقال لحاج احمد: لو الامر كدا خلي شنباوي يعمل الدايرو والناس التقول العايزاهو.. يبقى يا حاج احمد عاوزني افرط في مالي واكل عيشي عشان المخبول دا.. دا انا اموت وما اعملا.. قال اضبح عجل واوزعو قال!! وفجأة اجتمع مجموعة من صبيان المدارس واتجهوا نحو جزارة حاج خضر واخذوا يصيحون: حاج خضر مصامي الدماء.. حاج خضر ضنب الامريكان والكفار.. حاج خضر حطب النار!! وكاد حاج خضر أن يبكي وقال بصوت مسموع: شكيتك على الله يا شنباوي يا حاقد كان شوهت سمعتي وعملتني مضحكة بين الأطفال!! وهنا قال له حاج أحمد: ألحق نفسك يا حاج خضر قبل ما الموضوع يبقى حقيقي.. يا أخي أفدي سمعتك ونفسك بقروشك!!. فرد حاج خضر قائلاً باستسلام: المضطر يركب الصعب.. حاضر يا حاج أحمد حا أضبح عجل وأوزعوا على ناس الحلة وادي خروف كبير لشنباوي!!.. وبعد قليل سمع أهل الحي صوت ود الفكي وهو يصيح بأعلى صوته: يا ناس الحلة هووووووي حاج خضر ضابح عجل كرامة وسلامة لجميع أهل الحلة يلا اسرعوا وشيلوا نصيبكم قبل اللحم الرخص ما يخلص!! وفي لحظات اجتمع اهل الحي في جزارة حاج خضر بعد ما ذبح العجل وأخذ يوزع اللحم عليهم فسمع الناس يتكلمون: والله حاج خضر دا راجل كريم.. والله حاج خضر دا بحب ناسو وأهلو ومستعد يدي الماعندو كرم ساكت!! فضحك حاج احمد وقال لحاج خضر: الحق شنباوي قبل ما يلغم الجو من جديد!! فأسرع حاج خضر الى حظيرة مواشيه وأحضر خروف كبير وسمين وذهب به الى منزل شنباوي وطرق الباب فحضر شنباوي وفتحه ووجد حاج خضر فقاله له بسخرية: حاج خضر نصير الامريكان والكفرة!! مرحب خير جاي تبيع لي اللحم في بيتي ولا شنو؟؟ فرد حاج خضر بحماس: جايب الخروف الكبير دا لسيد الناس شنباوي نصير الفقراء والمساكين اها برضو انا مصاص دماء وكافر؟؟ فضحك شنباوي وقال: ابداً يا حاج خضر انت رجل كريم ومؤمن ونصير للفقراء والمساكين!! فقال حاج خضر في نفسه: مش دا اللحم العملتني بيهو كافر.. نفسو خلاني بقيت مؤمن.. اه يا مسيلمة الكذاب!!. يوميات ساخرة - الوطن [email protected]
