زول اغبش ...كادح ..وتعبان ..واليوم كلو ساكي رزقو ...(رغم ان الارزق ما بتجي بالسك). هي مكتوبة ..ومسطرة ...ما عاوزة ليها زول يقوم من النباه الاول عشان ينزل في (السقط دا). هو وين (السقط)؟. حليل (السقط) الكان بخلينا ندك طابور الصباح ..والحصة الاولى ..والتانية ...ونجي (نتلبد) من وراء (بطانية) بعد الفطور ...ندخل الفصل ...ونعد باقي اليوم ...نرجف زي (عبدالمولي الصديق). استاذنا عبدالمولي برجف حبا في الهلال ...نحن بنرجف من (البرد) في السخانة دي. يمكن دا شكل من اشكال الحب. يمكن دي حاجة (اسفورية)....نحن ما عارفينها. ويمكن (كوسكة). يمكن ..اي حاجة جائزة. عندنا زول (شاعر) ..ملخبط ..لخبطة شديدة ...زي اخر الصينية ..الناس وقت (تجدع) في الدنيا دي...تقوم تقلب البامية المفروكة في الازر ...في السلطة الخضراء. يلخبطوا الصينية كلها ...زي اللوحة (السيريالية)...ما بتفهم فيها أي شيء. لو جبت ليك اشطر (كلب بوليسي) في الدنيا ..ما بعرف الصينية دي كان فيها شنو؟. الزول الشاعر دا ...كان ملخبط ...كالصنية ديك ...(شفتوا اللغة العربية دي كيف؟). عليكم الله هسع (ك) الصينية دي في زول بقدر يختها ...لو ما عندو دبلوم عالي في (الحزن النبيل). وخبرة و21 سنة في (الحزن القديم). عليك الله ..ما تجيب لينا سيرة (الدوش). نحن ما فاضين للمواجع دي ....الحزن هنا اعرض من سطح البحر الابيض المتوسط. ما عاوز (اتحازن) ليكم ..الليلة اليوم ...يوم فرح ...فرح خالص. لكن الدوش في نفس الحتة (الفرائحية) كتب ..(كبرت كراعي من الفرح ..نص في الارض ونص في النعال). اشهد انا ...في كل المحاكم ..والاقسام والمنتديات الشعرية ..واللا شعرية ..انني لم اجد معاونا للفرح اوسع من (كبرت كراعي من الفرح ..نص في الارض ..ونص في النعال). ان شاءالله كراعك دي يا علاءالدين يوسف. قول يا امين. ارجع ليكم للزول المتلخبط ...لخبطة شديدة ...(انا كنت عاوز اقول عنو شنو والله العظيم نسيت). الكلام طار من رأسي. أ....أ...أ... اتذكرت. عندنا زول شاعر ...ومتلخبط ..لخبطة شديدة ..زي العريس البكون عاوز يتقدم اول مرة. يجيبوا ليه (البيبسي)...يتشطف بيه. تلفونو يضرب ....يرفع (المخدة). زول متلخبط ...لخبطة شديدة ..لكن (مبسوط). عليك الله ..لو سمحت ..عشان خاطرنا ..وعشان خاطر البلد ...اتجاوز لينا (اللخبطة) دي. ادخل لينا في المقطع التاني. الشاعر المتلخبط دا ...كان وقت يكون عاوز يقول ليه (قصيدة)..زي أي شاعر حديث (ومستعصر)..بقول مدخل اول. ساعة الشاعر يقول (مدخل اول)..نحن كلنا نفتح خشومنا ..زي (البرندات). وشعرنا يقيف زي (الشعيرية) ..قُبيل الغلية الاولى. شفتوا (قُبيل) دي كيف؟. قلت ليكم انا الليلة مبسوط شديد ..والله ..كورة الليلة دي ضامنها عديل في جيبي. في زول بقول الكلام دا. انا بقولو ...الليلة المباراة دي باذن الله وتوفيقه ..منتصر فيها الهلال. بتشوفوا كلامي دا وترجعوا لي. لكن بصراحة...بصراحة شديدة ..(قُبيل) دي زول ما صارف ما بكتبها. زول ما منتصر ما بقولها. نحن شفوت. الشفاته ما خلت لينا (زرارة)...قطعت لينا زراير المقيص جت. الزول الشفت ..قميصو زرارة ما بتكون فيه. المهم يا جماعة ...ما عاوز اضايقكم ب (قُبيل) دي...ح اتجاوزها ليكم. والله دي حاجة مفروض تشكروني عليها. امشي ليكم على الشاعر ...المتلخبط. نحن واقفين وين؟. أ...أ...أ.. اتذكرت ..نحن واقفين في مدخل اول. الشاعر بقول : (مدخل اول)....افتحوا المروحة. يا ود الناس دا مدخل. دا مدخل شنو؟...مدخل استبالية. هسع (المروحة) دي عاوزة ليها (مدخل). طيب قول النص. نص: الشبكة كعبة. دا النص. ما بنفهم حاجة ..بنقعد نصفق. يمكن عشان ما في حريات. يمكن عشان الوضع ما بسعيد على اكتر من كدا ..بقوم الشاعر يكتفى بهذا النص ..وينزل من المسرح. ونحن (ندلق) في الصفقة. دقيقة ..دقيقة ..دقيقة. شوفتوا (ندلق) دي كيف؟. دا شغل ناس فايزين ساكت ان شاءالله. انا مشيت كتير ..وإلا شنو؟. سرحت...الظاهر عليّ. الي الان ما دخلت على ناس بلة جابر وموسي الزومة واكرم الهادي سليم...رغم من ان هذا الثلاثي عنوان للعمود. لسع ما دخلت في الموضوع. مالك انت زي الزول البين عقدو وعرسو 7 شهور. وانا الي الان ما جبت لي سيرة لمباراة اليوم. شكلي كدا ..مبسوط شديد. ارجع ليكم للزول الاول. يا جماعة ..امسكوا العدد ..عشان ما تتلخبطوا. باقي نحن أي حاجة عندنا بي نظام. تسرحوا ..تردوا على التلفون ..بتطلعوا من الشبكة. الزول (الكادح)...الاغبش زي (عيش الفتريتة) ..الحدثتكم عنو في بداية العمود. اها ح اقعد اذكر فيكم كدا. الزول الكادح ..الاغبش دا ...البطلع من بيتو مع النجمة...وقت تجيب ليه سيرة الهلال. برتاح في عضمو. بحس انو تعب الدنيا دا كلو طلع منو. لونو بفتح. بنسي أي حاجة ..اتعابو ..فلسو ..وظروفو العصبة ..وبقعد يضحك..صدرو بنشرح. الزول دا انا ما بشوف (ابتسامتو) إلا وقت يجيبوا ليه سيرة الهلال. تاني ما في حاجة بضحكو فى الدنيا. قلبو بنفتح ..مع الهلال. بقول ليك ما شفت تمريرة (سيدا)...والله هيثم دا حفظه الله ورعاه عندو تمريرة زي محصول القطن في مشروع الجزيرة سنة 1978م. حاجة تفرح. ومدثر كاريكا ...جاب ليه قون زي (بين جناين الشاطيء). كاريكا دا الهدف ..ما فاضل ليه إلا يلبسوا ليكم (عراقي وسروال وسديرية)..ويريحوا ليكم (يطيبو) يعني..ويتشري ليه (مناديل ورق)..ويقول ليكم هاكم صوروه. كاريكا اهدافو فيها (اخلاق). اهداف بي ادب. الاهداف عند مدثر كاريكا زي القيادة ..(فن وذوق وادب). انا اهداف مدثر كاريكا دي بشوف فيها (الناس القيافة)..اغنية الفنان الراحل محمد وردي. يا كاريكا ..الليلة يومك. ممكن تجيب اكتر من هدف. خليك عارف. واحسبها صاح. وزولكم الاغبش ..(الكادح)..وقت يتحدث عن فييرا علاءالدين يوسف ..بقوم على حيلو ..وبنبسط في الدنيا دي جنس ابساط. بحس بي عزة ..وقوة. الليلة ..كلكم ممكن تشوفوا الحاجات دي. الحاجات دي انا ما بقطع فيها من رأسي. نخش على العنوان ..ونخلى باقى الكلام بعد المباراة. جاء الحضري بعد هروب (6) شهور ...سموها هم (اعارة). وبعد ما وصل اكرم الهادي سليم بالجماعة للمرحلة دي ..ناس المريخ قالوا ليه خلاص شكرا. نسوا (حصواتو). نسوا (تضحياتو). نسوا أي حاجة. قعدوه في الكنبة. اكرم الهادي سليم قال ما بقعد. جمال الوالي قال ليه ما مشكلة ..طول ما الدولار موجود ..انت ممكن تقعد في أي حتة. صرفوا ليه 20 الف دولار. اكرم قعد في الكنبة. ما عارف انا يا اكرم ...جمال الوالي دا حسب ليكم ال (20) الف دولار دي كيف؟. يا ربي ال (20) الف دولار مقابل الكنبة ..وإلا فيها كمان انك مقابلها ممكن تقعد في بيتكم. انا ما عارف. اكرم الهادي سليم ..بقى في الكنبة مافي. ريكاردو بقى يشيلوا من التشكيلة كلها. الحضري عرف كيف ينتهي ليك من مستوى اكرم. اكرم الهادي سليم ظهر مع المنتخب الوطني زي (محمد المهدي الفادني) ما عندو أي علاقة بالكورة. يا اكرم معليش. الشافك في الميناء البري شايل شنطتك وماشي (الحصاحيصا) ما كضب. تصوروا اكرم الهادي سليم دا قبل الحضري كان مرشح للاحتراف في مازمبي. مازمبي عندو طيارتين. واكرم بخاف من الطيارات ..عشان كدا ..اكرم رفض مازمبي. شفتوا (الفسلفة) دي كيف؟. دا اكرم. بلة جابر. بلة جابر دا انا ما عارف الحاصل عليه شنو؟. بنشوفو بسخن..لكن بيلعب وين؟..ما تسألوني. مرات بدخلو في اخر 5 دقائق ..مع ناس السواري. اقصد مع ناس الملح. يا بلة ..يا حليلك ...البوفيه عملها فيك. لكن البوفيه هسع بقول ليك : (لقد نفد رصيدك). يا بلة جابر ..انت ذاتك بقيت زول سفر. خلاص اتخارج. شيل شنطتك ..واطلع. الشافك في الميناء البري ..متجه الي بورتسودان ..ما كضب. ألحق (سمك) بورتسودان. البوفيه ما دايم ليه لي زول. ندخل على الزول التالت. الزول المختفي..تقول عاوزين منو قروش. موسي الزومة دا ..اختفى اختفاء نهائي. في الكنبة بقى يقعد بالبنطلون والقميص. اخير بلة جابر ..بقعد بالزي الرياضي. لكن موسي الزومة ...بقى في الكنبة بالبنطلون والقميص. واحتمال في أي لحظة ...يظهر في الكنبة بالجلابية والعمة. الشيء المحير ..ان موسي الزومة ..شالو من التشكيلة ..(ليما). ليما اطاح بيه ...خارج التشكيلة. والله انتوا يا الهلالاب مفروض تشكروا (ليما). ريحنا من موسي كشافات. زول 9 سنوات بيلعب طرف شمال ..يجي محترف من البرازيل الما هنا ..ويطيح بيك يا موسي. حليل موسي يا حليل موسي. حليل موسي للرجال خوصه. انت يا موسي الزومة مفروض تعتزل. مفروض يعملوا ليك (مرثية). خلاص ..القصة انتهت. يا موسي الزول الشافك شايل شنطتك وحايم في الميناء البري ..وماشي مدني ..ما كضب. ملحوظة : ابقوا بعيدا!!. هوامش مباراة اليوم ..نوصي الهلالاب ان يحرصوا على مشاهدتها من الاستاد. انتصار الهلال اكيد اليوم ان شاءالله. أي واحد الليلة لازم يشارك في الانتصار دا. تعالوا اتمتعوا ساكت. الليلة ...ح نرد على الحضري. وح يكون باذن الله وتوفيقه (الحضري) السبب الرئيس في خسارة المريخ. تعالوا شوفوا واتذكروا كلامي دا. مهند الطاهر بعيدا عن الضغوط بكون افضل. دفاع المريخ ..كله ما بمسك (سانيه). سادومبا مشكلة تانية. الصاقعة نزار حامد ...دا يعملوا ليه شنو؟. اخلصوا حقكم في كراسي استاد المريخ ..(اقوان). ريكاردو ...المباراة الاخيرة. يا جماعة الكورة دي مضمونة. في زول بضمن ليه كورة. في اكتر من كدا. يعملوا ليكم شنو تاني؟. احلي انتصارات الهلال في (الرد كاسل). التشجيع والمساندة طول ال (90) ...طريقنا للانتصار. غارزيتو ..ادعموه بشكل خاص. واتفرجوا. واحكموا براكم. يا ربي الليلة غارزيتو لاعب بي ياتو صف. ريكاردو (14) لاعب ما بغيرهم. كوتشينة بس. انت يا ود الناس ما شفت غارزيتو دا ..كل مناسبة عندها ناسها. كل بطولة ..بتشكيلة مختلفة. اقول ليكم حاجة. خلوا باقى الكلام بعد المباراة. عاجل : الله يكتر الهوبات. وإن طال السفر - صحيفة قوون
