عزيزي مارك روزينبيرج أو كيفما يكتب اسمك .. بعد التحية أرفع اليك تظلمي اليوم بصورة شخصية بعد القرار الجائر الذي يتداوله رواد موقعكم العامر ( الفيسبوك ) والقاضي بامكانية اطلاع أياً كان على الرسائل الخاصة .. أكرر الخاصة !! حتى لو كان القرار مجرد اشاعة من الواجب ذكره أننا ظللنا مراراً وتكراراً نكتب ( أكثر من مقال يمكن الاطلاع عليها بالصفحة ) عن التغيرات التي تطرأ من وقت الى ... آخر على الموقع والتي لم تنل استحساناً من لدن زوار ومتابعي الموقع عزيزي مارك عليك أن تعرف أن هذا الموقع قد قام على أكتافنا حيث أننا من أوائل المشتركين فيه الى أن تخطى عدد المشتركين حاجز المائة مليون شخص وقفز رأس مال الشركة الى مائة مليار دولار .. ولاتنسى ياسيد مارك صبرنا على الموقع في تلك الأيام التي كنا نحتاج فيها - لأيام - لتنزيل مجرد صورة .. وصورنا زااااتا الوقت داك ماكانت على قدر كدا !! في تلك الأيام الخوالي يامارك ( شايفين بدينا نرفع الكلفة حبة حبة ) كنا في هذا الموقع أنا وسامي حسين ونانسي عجاج .. فقط ومع ذلك لم نتذمر ولم نشتكي الملل .. بل صبرنا وطفقنا بعمل دعاية عبر الماسنجر والايميل والأسافير الى أن وصل الحال الى ماهو عليه الآن .... صفحة لكل مواطن شي تصوير وشي كتابات وشي نكت مساطيل و أغاني هابطة وكدا حتى ناس شماراتنا وهجيج خالاتنا بي النهار وكتمات بالليل عملوا صفحة !!! .. دا غير القروبات .. يعني مثلاً زمان كان بتلقى أربعة خمسة قروبات لكل بلد والناس كلها بتكون ملمومة فيها أظرف سوداني ع الفيس بوك .. ناس الخرطوم بتحبو .. سودان بوك وهكذا تعال شوف حسة .. بتلقى الزول عندو خمسة قروبات قاعد فيها الله ورقبتو !! بدأ الموقع بتغيير جلده رويداً رويداً مع هذا التطور الملحوظ ... عملتوا حكاية اللايك دي بدون ماتستشيرونا قلنا ماشي .. غيرتوا شكل الموقع أكتر من مرة وأبدينا نوع من الاعتراض اللطيف ولم تلتفتوا لآرائنا .. قلنا يمكن مشغولين زدتم حدة الشفافية وبقى الواحد يكتب ( status ) السودان كلو يعرف انت قاعد في ياتو حي !!!! يعني لو ناس بنو اسرائيل زعلوا منك وعايزين يلحقوك سيد السوناتا ممكن يرسلوا ليك زول عديييل خلي ساروخ !!! قلنا اهو الواحد ( حتى الآن ) ماشي في السليم ف بالتالي ما اعترضنا الى أن وصل الموضوع لحكاية المربع المصيبة الأعلى يمين الشاشة دا ياخ دا بقى يكتبوا فيهو ... فلان الفلاني بيدردم ليهو في سفة !!!! عاد دا كلام ياحاج مارك ؟؟؟ وبسبب هذا المربع أكاد أجزم أن العدد المتواجد بالموقع يفوق ال عشرة أضعاف العدد الظاهر وبيمارس في نشاطات من لايكات وكومنتات وهمية وما الى ذلك أها الجماعة ديل انت قايل المقعدهم شنو ترا مسجاتكم دي حتى في دي عايزين تشيلوا حالهم ؟؟؟ ياخ اتقوا الله علي اليمين توروا الناس المسجات دي فيها شنو .. أمانة ماتتخرب بيوت !! ولا أقول ليك .. أحسن زاتو ( كيتن ) في ناس انبوكس سويتيييييي وانبوكس بيبي ديل أصلو بيني وبينك الشمار دا حارقني من وانا ئاااااااد كدا هو !!!!!!!!!!!! ................... الخوف الجماعة ديل يقلبوها : تعالي وتس اب هنييييي xoxo !! تبقى دي العوجة الكاتب / د.خالد عبدالكريم
