من بين الحكايات الطريفة التى يتداولها الناس ..هو ان احد الناس (البسيطين) ذهب الي دعوة جمعته مع اخرين. زول بسيط وعفوي ...ولابس ليه (نضارة) نظر ...بشوف بيها الحاجات العاوز يشوفها ...والحاجات الما عاوز يشوفها ..ما بشوفها. بطارشها ...تجاوزا. نضارة صممت خصيصا للقيام بهذا الدور. لذلك انت احيانا تشعر بي (دغالة) ما ...عند الزول البكون لابس ليه نضارة نظر. لا اعرف لماذا يسمون النضارة ..نضارة (نظر). يا جماعة في (نضارة)..نضارة (سمع). حصل في واحد فيكم شاف ليه (نضارة)...نضارة (شم). يمكن عشان تفاصيل النضارات فيها نضارة نظر ونضارة شمسية ونضارة هوا... ونضارة القراية ..يمكن. في الكل ..هذه النضارات هي نضارات (نظر). هسع يا ود الناس ...ما تفك الموضوع الرئيسي ..وتمسك لينا في موضوع هامشي. شنو عاوز تعملها ..لينا كلها (نضارات)؟. اختصر. المهم يا جماعة زولكم ابو نضارة النظر دا ...مشي الدعوة ...واتوهط بين الناس. أي موضوع يفتحوه ...بمسكو وبتولاه. عندما جاءت (الصينة) محملة بالماكولات الشعبية .استعصم صاحبنا ..ورفض ياكل مع الناس. قال شبعان. اثناء رفضه هذا ..صاحبنا شاف (الفرخة) في الصينية..زولكم ما كضب مد ايدو على وسط الصينية وشال (الفرخة) وقام بيها ...وهو يعلل للجالسين في الصنية مستكفيا : (انا كفاي الطويرة دي). علما ان السمين والغث في الصينية يتمثل في تلك (الطويرة)..وما بقي في الصينة غير العدس والبامية المفروكة ، بعد ان طب (الفرخة) ومشي قعد بيها في كرسي قدام الباب. وخلى ليك الجماعة في الصنية يتلفتوا..المغصة كاتلاهم ..وما في زول قادر يقول حاجة. شال (قلبهم) مع الفرخة. الكدائس الموجودة في البيت ...كلها ..فكت الصينية ..ومشت مع الزول الشال الفرخة دي ..وصاقرتو في خشم الباب. باقي الصينية بعد (الفرخة) ...ما فيها شيء عشان تصاقرها الكدائس. غارزيتو ..هسع ..عمل نفس العملية. غارزيتو ..ذاتو خطف (الفرخة)...وقال : (انا كفاي الطويرة دي). انت يا غارزيتو ...خليت شنو بعد (الطويرة) دي؟. غارزيتو قبل ما يصعد لدور الاربعة ..قال انا بتمني (دجوليبا). ناس الهلال ما كضبوا جابوا ليه (دجوليبا)...حسب الطلب. غارزيتو ..انفرد بي (دجوليبا)...وقال انا كفاي (الطويرة) دي. دجوليبا دا ..ما هو (الطويرة) ذاتها. طويرة سمينة. عارفين (الطويرة)...البفكر فيها غارزيتو في نهائي الكونفدرالية؟. اكيد عارفين ...عشان غارزيتو من هسع قعد يخطط للطويرة دي في نهائي الكونفدرالية. عاوز يشيل كرسيهو ..ويقعد بيها برة. والحاجات البطلبها غارزيتو ..ناس الهلال بجيبوها ليه؟. بيجبوها ليه بي الاسم. غارزيتو دا قال عاوز محمد احمد من الخرطوم. ناس الهلال جابوا ليه محمد احمد. قال عاوز (كايا). جابوا ليه (كايا). قال عاوز فداسي من (فداسي) ذاتها .....من جوة. ناس الهلال جابوا ليه (فداسي). غارزيتو ..شطح قال عاوز (سانيه) من فرنسا. ناس الهلال قالوا ليه ..ما في حاجة كتيرة عليك. جابوا ليه سانيه. بعد سانيه ..غارزيتو قال انتوا لو عاوزين تحققوا البطولة جيبوا لي لاعب مازمبي (ايكانغا). الزول الجنو حوامة دا. قالوا ليك ايكانغا دا بين الشوطين ما بقعد. بين الشوطين بكون حايم. ناس الهلال جابوا ليه (ايكانغا). حسب الطلب. اها غارزيتو في الكونفدرالية ..قال عاوز (دجوليبا) في نصف النهائي. يا غارزيتو ..دجوليبا دا يجبوه ليك كيف؟. دجوليبا دا حسم صدارة مجموعته ...لو عاوز تقابل دجوليبا في نصف النهائي يا غارزيتو ..إلا تجي التاني. دي عاوزة ليها (تضحية). خلاص ضحوا ب (الجلاكسي). المهم الاتحاد الافريقي جاب ليه حكم لمباراة القمة الافريقية ..تقول واقع من برج حمام. ما فاهم أي حاجة. تحضرني في ذلك الجانب حكاية بحكوها عن لاعب في الديوم ..اهل الدويم في الصحافة السودانية حكوا بانفسهم هذه الحكاية. وانا انقلها اليوم بتصرف...مع الاحتفاظ بحقوق الطبع لاخرين. قالوا في الديوم زمان كان في لاعب صعب شديد. لاعب (هارش) الحكام كلهم. لاعب أي حكم بخاف منو؟. مراقب المباراة ذاتو كان بخاف من اللاعب دا. هذا اللاعب كان مع فريقو لاعب مباراة مهمة وفاصلة ..ونتيجتها سوف تنعكس بشكل كبير على الدوري كلو. الحكم الذي كان يدير مباراة بين فريق ذلك اللاعب ..والفريق المنافس الاخر ..احتسب في اوخر اوقات المباراة (ضربة جزاء) ضد فريق اللاعب الهارش الحكام. ضربة جزاء صحيحة ..ما فيها أي حاجة. اللاعب الصعب ..الحكاية دي ما عجبتو ..مسك الكورة ..وحلف الكورة دي ما تنشات (ضربة جزاء). ضربة جزاء في الوقت دا انتوا مجانين. الحلة كلها نزلت في الميدان تقنع في ذلك اللاعب بي صحة ضربة الجزاء. اللاعب حالف بي دينو وايمانو ضربة الجزاء دي ما بتتلعب. انتوا مجانين. اخر حاجة ...اللاعب شال الكورة ومشي راية الكورنر ..ووضع الكورة في الكورنر ..وقال للاعبي الفريق الاخر ..ضربة الجزاء الحسبوها ليكم دي ألعبوها (كورنر). ثم اضاف ..عاوزنها (كورنر) شوتوها وإلا يمين نمشي نلعبها ضربة مرمى. الجماعة بي حكمهم بخافوا من اللاعب ..نفذوا الكورة ..(كورنر)..واتجاوزوا ضربة الجزاء. يمين يتأخروا شوية (كورنر) ذاتها ما يلموا فيها. المهم بي جاي ..وجاي ...الهلال جاء التاني ..عشان يلاقي (دجوليبا) في نصف النهائي. على كدا يا جماعة ...(الجلاكسي) دا ..يكون جابوه ناس الهلال ..عشان يصرف ليهم ضربة جزاء ..ويحسب ضدهم ضربتي جزاء. نحن ساكت اتهمنا ناس المريخ. ناس الهلال طلعوا شفوت. نصف النهائي دا ان شاءالله نتجاوزه ..ونصعد للنهائي. وحسب خطة غارزتيو ..المدرب الفرنسي دا عاوز ليه (طويرة) تانية في النهائي. اصلو الشغل نحن عندنا بي نظام. أي حاجة عندنا بي نظام. نحن ما عندنا حاجة ساكت. من هسع (قنصنا) للطويرة ديك في النهائي. لكن انت يا غارزيتو بعد ما شلت (الطويرة) المالية دي في نصف النهائي ..خليت شنو للمريخاب؟. ان شاءالله الطويرة الشلتوها يا ناس الهلال تنفعكم. وكلنا باذن الله وتوفيقه في انتظار (الطويرة) التانية في النهائي. الطويرة (الطاعمة). ولي معلوميتكم ...غارزيتو دا أي حاجة بطلبها ..ناس هاشم ملاح ديل بجيوبها ليه. لو عاوز (فالنسيا) الاسباني ذاتو ..ح يجيبوها ليه. اصلو نحن ما عندنا حاجة مستحيلة. عارفين بنعمل في شنو؟. والشغل كلو ماشي زي ما بقول الكتاب. ملحوظة : طبعا الكونفدرالية دي كلها (حمام). هوامش تصوروا ..ناس المريخ الي الان بدافعوا عن (الحضري). خلوا الحكم الزامبي (جاني)..وقعدوا يدافعوا عن الحضري. دفاعكم دا لو كان عملتوا عن (هجليج)...ما كان في (عدو) واحد دخل فيها. الجماعة ديل فكوا (طابقهم التاني)..وقعدوا يدافعوا عن (الحضري). لدرجة اني ظننت ان يكون جد الحضري مؤسس المريخ. مسكين اكرم الهادي سليم. لو عمل غلطة زي دي ..كان هسع يكون بيلعب في ابوعنجة. الظاهر كدا ..الحضري دا (هارش) الجماعة كلهم. بما في ذلك الاعلام السالب. الجماعة ..ما قدروا يقولوا أي حاجة. انا اول مرة اشوف لي (غلطة) بصفقوا ليها كدا. والله اخير (تورتة) عادل ابوجريشة. خلاص تعالوا نحتفل بغلطة الحضري دي. ولعوا ليكم (شمع)..وجيبوا ليكم (تورتة). ولعوا (الكشافات). والا اقول ليكم ..جيبوا (كاظم الساهر). اصلو نحن طالبنكم (كاظم الساهر). انتوا قايلننا بننسي. غلطة الحضري دي ..ح تكون سبب في خروج المريخ من الكونفدرالية. اقعدوا احتفلوا بالغلط كدا ...لمن باسكال تعجبو الفكره. ضفر جاب قون في الهلال ما لقي الاحتفال دا. الحضري يغلط ..يحفزوه. طيب انتوا وقت عندكم حس فني بالشكل دا ..بهاءالدين دا زمان وقت كان بيلعب معاكم ...ليه بتنتظروه (يسهو) ساكت وتقومو فيه. عمار مكي ما كنتوا بتريحوه. هسع الحضري بقى (بطل). خلاص زولكم دا في ايامو الاخيرة. المشكلة ما اعلام الهلال ...العالم كلو دور في الحضري. الجزيرة سخرت من غلطة الحضري. والاعلام المصري سماها (فضيحة). والكاف والفيفا ..الكل بضحك على الحضري. غايتو يا الحضري ..ختمت حياتك بي حاجة شينة. قلنا ليك اعتزل قبل ما تصل سن ال (44). ما سمعت الكلام. سادومبا يبجيب فيك هدف على الطائر. سانيه بيجب فيك هدف بي عين واحدة. مهند الطاهر ..جاب فيك هدفين في مباراة واحدة من غير أي (جلاكسي). وبعد دا تمشي تعملها في الكنغو. لو اعتزلت دا كلو ما كان حصل. ولسه في انتظارك الكثير من الفضائح. الطريف ناس المريخ عاوزين يخلوا الحضري يكون كابتن مباراة المريخ وليوبار. شفتوا النفاق دا وصل لي وين؟. والله دا استهتار اكتر من استهتار الحضري. عشان الحركات دي ..سيون انهي خدمة الحضري. وعشان الحركات دي الحضري لم يستمر في الاسماعيلي 6 شهور. وعشان نفس الحركات ..الزمالك باع الحضري بعد 6 شهور بالخسارة. والاهلي رفض بكاء الحضري في الفضائيات وكل الرجاءات من اجل العودة. والمريخاب هنا بحتفلوا بي غلطة الحضري. خلاص ان شاءالله يا رب الحضري دا يغلط ليكم في أي مباراة. طول ما الغلطة بتعجبكم لهذه الدرجة. مسكين اكرم الهادي سليم ..ابوه لعب في المريخ دا لمن فتر. واكرم براهو اتقطع في حراسة المرمي. وفوق دا لو اتأخر شوية من التمرين ..بتشيلو بره. الحضري ليه سنة ونص في المريخ بقى كابتنا لفريق المريخ بالغلطات. يا قلق انتوا الكلام دا مفروض ما تقبلوه. يا سعيد السعودي ..لو عاوز تحافظ على (كابتنيتك)...ابقى اغلط. متوكل احمد علي ..الي الان دوره في المريخ ..يلبس جلابيتو السمينية دي ..وعمتو ويقعد يصرح. يا متوكل ..لو دا حارسكم ..انت ذاتك ممكن تبقى حارس مرمي. الموضوع دا ما صعب. يمين انت بي غلطاتك دي تبقى كابتن للمريخ في 10 ايام. انتوا ما شفتوا (جمعة). فعلا ..الما شاف (جمعة) بخلعوا (الحضري). المريخ بي طريقتو دي ما بصعد. الحضري تاني عندو غلطة. الكبر حصل. خلاص ..الحضري بعد اربعة تاني ما بشوف. المشكلة البشوفها ...بقى يفكها. عاجل : يا جمعة (الصغر) نعمة. وإن طال السفر - صحيفة قوون
