قامت الثورة البلشفية في العام 1917.. معلنة قيام الاتحاد السوفيتي وولادة المعسكر الشيوعي وانقسام العالم إلى معسكرين راسمالي وشيوعي.. وكان التوازن العالمي لوجود قطبين قويين متنافرين.. جاء ميخائيل غروباتشوف إلى الحكم في الاتحاد السوفيتي.. اتلفت جاي واتلفت جاي.. وقال النظام الاقتصادي دا ما نافع.. وعمل حاجة اسمها البيريسترويكا.. ومعناها (إعادة البناء).. ويقصد إعادة بناء الاقتصاد الروسي.. ومعاها حاجة اسمها (الغلاسنوست) ومعناها الشفافية.. والشفافية يعني كل شي يبقى وااااضح وفي السهلة.. وأي زول يشوفو.. يعني بالواضح كدي (كشف حال) وشر غسيل.. وما في دسديس وغتغيت.. السياستين البيريسترويكا والغلاسنوست.. غتسن حجر غروباتشوف قبال ما يغتسن حجر الاتحاد السوفيتي ويفرتكنو ويبقى كل ستة في حتة.. وكل جركانة في مكانها.. ودخلت الراسمالية.. واتربعت.. واستفاد من استفاد منها.. حتى الكدايس استفادت منها.. في الاخبار تعاقدت شركة (إنكور ديفولبمنت) الروسية.. تعاقدت مع الكديس (بلين) على ان يقوم الكديس المذكور بمحاربة ومساككة الفيران والجرذان الموجودة بمباني الشركة مقابل اجر شهري مقداره 120 علبة اكل كدايس.. واصرّت الشركة على توقيع العقد.. لكنني أنا اعتبر العقد دا غشة للكديس المسكين دا.. هو أصلاً ح يسك الفيران وح يقبضن وياكلن.. علب الأكل لزومها شنو؟.. ويوديها وين؟.. غايتو الا يكسرها في السوق.. وقبال ما ناس حقوق الحيوان ياخدو خبر ،حقو الشركة تسرع وتغير العقد دا بدل علب اكل.. الي قروش كااااااش.. يسلموها ل"بلين".. في ايدو.. في ضنبو في لسانو في اي حتة يمدها ليهم عشان يشيل القروش.. غايتو يا الروس أنا احبطت فيكم ما قايل يصل بيكم الفساد لحدي ما تدقسو ليكم كديس؟.. لكن برضو فيكم الخير.. دايرين تشغلوهو بي مقابل.. عندنا نحن وليدات وبنيات الخدمة الالزامية تلقى الواحد شايل كل شغل المحل البيشتغل فيهو.. وآخر الشهر يدوهو خمسين جنيه.. وفي محلات يدوهو الفاتحة بس.. وفي خبر اخر في بريطانيا الكلاب البوليسية الاشتغلت في الشرطة وخدمت دايرين يدوها معاش قدره 1500 جنيه استرليني.. (استغفر الله العظيم.. الواحد بعد مرات بفكر افكار بايخة خلاص.. لكن ارجع اقول كل حاجة قسمة ونصيب).. قالو عشان خدمت ووقتها كلو تشمشم.. وتقبض في المخدرات وفي الحرامية والمجرمين.. معاش للكلاب.. وفي بلادي ناس المعاشات قاعدين يدوهم صح لكن ما قدر حق الكلاب.. يمكن الكلب من ديل معاشو يساوي معاش سبعين معاشي من عندنا.. الاسبوع الفات.. معاشي زهجوهو ناس المعاشات في احد دواووين المعاشات بالخرتوم.. امشي وتعال.. وتعال وامشي.. وورقك وين؟.. وورقك هناك.. زهج واتوكل علي الله وملّص هدومو جت.. كما ولدته امه.. وقعد يحوم قدام الناس.. كابسوهو ضايروهو وستروهو.. الواحد عمرو كلو عايش مستور بعد يكبر، يكشفو حالو ناس المعاشات؟.. يزهجوهو لحدي ما يمرق من هدومو؟.. ولو انتشرت ثقافة احتجاج (الميطي) دي.. ادونا ستة شهور بس.. وتعالو اتفرجو.. ان لقيتو زول لابس لوموني!! الباب البجيب الريح- صحيفة اليوم التالي
