* قوتنج مورقن. * طبعاً المريخاب عارفين المعنى. * الترجمة للأهوة الأهلة. * يعنى صباح الخير. * قوتن نخت. * المريخاب برضو عارفنها. * الترجمة للهلالاب على الشريط. * يعنى طاب يومك. * قوتن آبنت. * طبعاً دى المريخاب عارفنها. * الترجمة للمحليين. * يعنى مساء الخير. * كلو يوم حاندى ناس روشا درس فى اللغة الألمانية. * لوكال. * طبعاً المريخاب عارفنها. * الترجمة للأهلة. * يعنى محلى. * بتشبه لوكال يالأنقليزى. * روشا. * يا لوكال. * لاعب فى بانتيو ولا ملكال. * أنتهى درس اليوم. * بصراحة. * مافى زول زعل. * تانى ما بنلعب ضد زول ما عالمى. * الأممالمتحدة ما بتقبل. * يعنى ابوروف وبيت المال والزهرة والزهور والهلال. * مع فائق أحتراماتنا لهم جميعاً. * بس ما بنقدر نلعب ضدهم. * الحكاية مستويات. * الحكاية درجات. * القصة مكانات. * عشان كده. * لازم نشوف لينا لجوء فى دولة أوروبية عشان نلعب هناك. * هنا مستوانا مافى. * دون المستوى. * مستوى(ليس). * العالمى. * يجيب دليل على انو عالمى. * معتمد وموثق. * بعدين يقول داير يلعب ضدنا. * عالمى يا مريخ. * كبير يا مريخ. * وموسى الزومة ردم الخواجة. * الخواجة قال ليهو انت مجنون ولا شنو يا زول. * والخواجة قالها بالسودانى. * ولو كن قابلنا بايرن مينخ بعد الأعداد. * كان الزول ده اتكلم راندوك مع الزومة. * الزومة يا عالمى. * وأكرم حير العالمى. * الغريبة شنو. * ويا بختك يا عالمى. * لكل الجماهير التى شاهدناها بقطر. * صفوة. * أسر محترمة. * ناس بشر. * عالمى يا عالم يا هووووووووو. * والناس القالوا مافى كورة ضد البايرن. * الناس القالوا شعار المباراة فوتوشوب. * الكورة أمس الشفناها فى الشروق دى برضو فوتوشوب؟؟ * وتهديفتين من عنكبة. * برضو فوتوشوب. * وأنتهت الكورة فى خط طمنطاشر بتاع البايرن. * برضو فوتو شوب. * عالمى. * وأتعلمى. * وقال شاعر النجوم بمروى. * البايرن زعيم قابل زعيم مريخنا***هذا أنجاز جديد ضفناهو لى تاريخنا * يا حاسدنا موت بالحسرة قصبك ما بيقاوم سيخنا***تأكل نيم ونحنا نحلى بى بطيخنا. * لكن يا شاعر مروى حاسدنا ياكل بعضو يعنى؟! * نيم ده موش شجرة!!!!! * شجرة دى موش حركة وطنية؟!! * وأتوطنى. * مريخاب شفوت وشرفاء. * الشفت الملازم مهندس على عبيد من كادوقلى. * نزل من الجبل بالليل داك وركب عجلة مشى حضر الكورة. * لن ندعك تسير وحدك يا عالمى. * روشا قال فى العقد مكتوب الكورة واحد صفر. * طبعاً لأنو خايف من المريخ. * أها يا روشا. * الألمان خرقوا العقد؟؟؟؟؟ * وصديقى ودالبلال الليلة ألا يكلمنا عن خليفة المحطة. * لأنو خليفة اللاعب مافى زول بعرفو. * ما عالمى. * موسى عالمى. * أيها الناس. * تسعة ود عبدالماجد سقطت. * تتسيك فى قبولك يا حمادة؟!! * تسعة ساقطة. * تسعة دى سموها ناس الهونفيد. * وفى أرضكم. * ووسط جمهوركم. * وفى قبولكم. * وسيكوكم. * سيك يا حفظه الله ورعاه. * أيها الناس. * تعرفوا. * فى أتنين هلالاب بيحضروا فى الكورة مع ياسر كوكو الشفت فى بيتو. * فى الشوط الأول لما سيدا لماها من تلاتة ألمان. * واحد من الهلالاب بدون ما يشعر قال للتانى. * عندك حبوب حيرقان؟!! * الحيرقان كتلهم. * ناس تعاين للشمس وما تشوفها. * أكيد ناس عميانة. * والشافك يا ودالبلال فى مستشفى مكة للعيون مسجلين عنبر كامل ما كضب. * يا محلى بالألمانى. * يا لوكال. * أنت ما قريت الدرس الفوق ده يا ودالبلال ولا شنو؟!! * أيها الناس. * مجلس الأمن طلع قرار يدين فيه اى عالمى يتكلم مع محلى. * المحليين ينطموا بس. * وفطومة أختى كان عملوا ليك نضارة بتكبرى. * وكان ركبوا ليك عدسات بتشوفى من البايرن لى مانديلا. * وفى الحالة دى بطلعوك من مكة ويحجزوا ليك فى التجانى الماحى. * روشا. * أن شاء الله ما تكون بايت فى المشرحة. * نتمنى ليك طولة العمر. * يمكن الهداية تجى. * زمان قلنا ليكم الما جانا مع سيدا بجى بالركشة. * غايتو بى تفتك دى يا روشا الركشة شيييييييييينة. * أيها الناس. * كنت أتمنى أن يكون التحكيم اوروبياً. * لأن الأحساس بالدونية وعقدة الخواجة المسيطرة على العرب بتأثر علينا. * وفعلاً سكت التحكيم عن حالات مخجلة. * أيها الناس. * من مظاهر العظمة. * أكتر من ألف شفت. * ألف القديم. * حضروا الكورة من داخل الناى. * هنيئاً لك يا عالمى بجمهور عالمى. * وقالوا أوباما يا روشا. * بعد الكورة أستدعى السفير الألمانى بأمريكا. * قال ليهو تجى أسى. * تجى رايت ناووو. * تجى اون ذا اسبورت. * قام السفير قوام قوام غير. * ومشى لى أوباما. * تعرف اوباما قال ليهو شنو يا روشا؟؟؟ * قال ليهو قونين عنكبة ديل لو دخلوا كان أحرجتونا فى مجلس الأمن. * السفير قال ليهو ليه يا ريس؟ * قال ليهو لو دخلوا كانت ألأمم المتحدة حا تضطر الى تعيين أمين عام لها من السودان. * وطبعاً يا روشا امين عام من السودان لازم يكون مريخابى. * لأنو المنصب عالمى. * ولا يوجد فى السودان عالمى غير المريخ والمريخاب. * روشا. * قالوا لى ناسكم ماشين الدوحة!!! * ماشين لى شنو يا روشا؟؟؟ * أنتو قايلين الدوحة دى فيها عمرة؟؟؟؟؟ * أيها الناس قلت ليكم المرفعين بعرف كوراك أخو. * وقلت ليكم أبو القدح بعرف مكان بعضى أخو. * وقلت ليكم البايرن ألمانى وكروجر ألمانى. * ومافى خوف. * والله لو المريخ تم أعداده كروجر كان عضى البايرن فى فى فى. * فى قلبو. * قلبو الكبير ده. * الأخوة المريخاب الشرفاء والأحرار. * طالبنا الأخ الشفت عبدالعظيم حاج عمر ان نكتب العمود من الليلة ولى قدام بالألمانى. * وطبعاً بالطريقة دى حايحرم الأخوة نادى الشجرة من قراءة العمود. * وشفت مريخى حكى لى نكتة. * قال فى شجرابى(هلالابى). * رسل رسالة. * جاتو بت الماشين. * قالت ليهو لأختيار اللغة الألمانية أضغط نجمة. * لأختيار الدورى المحلى أضغط صفر. * أها. * نجى لى شمارات والى الخرتوم. * أكان شفت يا والينا. * نحنا عارفين انو البلد فيها جودة ومواصفات. * أنتو عارفين أنو البلد فيها جودة ومواصفات؟ * طيب لو عارفين ليه يا والينا ساكتين؟؟ * نحنا ساكتين بى سببنا. أنتو ساكتين بى شنو؟؟؟؟* . * ساكتين بى مزاجكم؟ * لو فى جودة ومواصفات يا والينا. * معقولة السوق كلو نى هاااااااااااااو؟ * التوم صينى. * البصل صينى. * حتى القرض ده بقى صينى. * نمشى نشترى ماسورة. * ندفع دم قلبنا. * نركبها يا والينا. * تطلع ماسورة. * حتى الماسورة بقت ماسورة يا والينا!!!! سلك كهربا * ننساك كيف وخايفين يجيبوا لينا نسوان صينيات شهر العسل ما يتمنوا. والى لقاء**********سلك في السلك - بابكر سلك