أغاني الحماس.. كترت علينا.. وبقت تأثر في نفسياتنا.. وفي سلوكنا.. عليكم الله خففو الجرعة شوية.. عشان نعرف نتفاهم مع بعض.. نحترم بعض.. ونحترم القانون.. ممكن واحد يكون متأثر بغنية "الما بيقودو زمام جاموس الخلا ال للرجال كزام .. صدرو فيهو كلام".. أها زي دا لو سايق عربية.. باقي لكم بي يقيف للإشارة.. واللا بوليس الحركة لو صفر ليهو بيقيف لو؟.. زول مشبّع بالما بيقودو زمام.. يمشي في الإشارة فوووووو تقول ليهو الإشارة حمراء يا زول.. يقول ليك "حمراء علي أنا؟ حمراء علي رقبتا .. هيع".. واللا يكون سايق والشارع زحمة.. ويتجاوز في العربيات لو كنت جنبو يقول ليك عد معاي.. تعد معاهو يتجاوز تسعين عربية.. يقبل عليك ويقول لك "كيفني ليك؟ ما الفارس البي يقود تسعين؟.. ديل جت وراي.. هيع ونص".. واللا يكون جاي بعربية خاصة وجديدة وعاجباهو ويسمع في غنية "صقر الجو البي يخوي حقيقة القادر بسوي" ويدوس بنزين ويخوي.. ويكون معاهو أخوهو يشجع فيهو ويقول ليهو"سو.. سو.. سو" .. ويجي في ملف ويتقلب ويلحق الرقدو.. واللا غنية زي "صدرك موشح بالدمي.. ما بيخاف فارس الحديد أن حمي".. والعربية تحمى وهو جاري.. ويعمل حادث ويبقى صدرو موشح بالدمي هيع.. نحن لي حسي نعاني من تمجيد الهمباتة.. والثقافة بتاعة الهمباتنة.. في السبعينيات.. كان هناك حقن منظّم ومنتظم بجرعات اشعار الهمباتة ورجالة الهمباتة.. الهمباتة هم ربابيط.. او رباطين مهما حاولنا ان نمجدهم.. ونتكلم عن ضكرنتهم.. وانهم بيقلعو ويوزعو.. الهَمْبَاتَه نِحْنَا أَصْلَنَا مَعْرُوفينْ بَلا حَقْ الرجال مَا عِنْدَنَا تعْيينْ ما بنْدبّى ليٌهُو بِنْسُوقُو حُمْرَةْ عَينْ .. قلع عديل.. والهمباتة الجداد شغالين قلع بلا حق البلد ما عندهم تعيين.. حتى انه ثمّ تحوير الأغاني العاطفية للتماشى مع السلوك الهمباتي.. كانت غنية زي غنية ترباس "العندي انا ما بدي.. وبحر الشوق أنا بعدي".. حورت وأصبحت "العندي ما بدي وحق الناس بقالع في".. فترعرع وكبر جيل من الهمباتة الأفندية.. يقلعو ساااااااكت وتكتِّر تقلل الله قال بي قولك.. فاصبحنا قوم نصهم همباتة والنص الآخر مهبت عليهم.. أغاني الحماس ليها وقتها.. لكن ما طوااااااالي في اضنينا.. محل ما نقبل.. (سيفك للفقر قلاّم).. وزول مليان بحماس زي دا بي يدور حتة يفرغ فيها الحماس.. في وسيلة مواصلات.. شغال غنا حماس الغنية في ضهر الغنية.. اكترنفرين كانو متأثرين بالأغاني.. السواق والكمساري.. واحد غالطهم في التعريفة بتاعة المشوار.. هبو فيهو وكانت جملة واحدة بس جملة تنضح رجالة وتحدي" يا زول ماداير تدينا حقنا؟.. واللا ما عندك؟ لو ما عندك بنخليك .. ولو ما داير تدينا حقنا عندنا نضم تاني".. قلت للراجل براااااحة "يا اخي قول لهم ما عندي وبس" الراجل بطول حسو قال لي "عندي .. وعلي الطلاق ما اديهم زيادة فوق الجنيه دا".. ودخّل يدو في جيبو ومرق ربطة قروش من ابوخمسين جنيه.. و رفعن فووووق. وأردف مفاخرا "اها تراهن ديل القروش".. لكن قطع شك، لو الحافلة فيها نشال بيكون جاب خبرِّن!! الباب البجيب الريح- صحيفة اليوم التالي
