الكلام دا زمان ...عشان ما تغالطوا ساكت ..زمن (كوم الطماطم) نصو (تفاح). هسع كوم الطمام بقى كلو (قش). زمان البلد بي خيرها. الخواجة لو جا البلد دي اسبوع ...الجماعة بلموا فيهو (يشلخو). ما عندنا زول ما مشلخ. الخواجة بتشلخ. بلد كانت ماشية زي الطلقة. بتذكر ...الكلام دا بدري. زمن الكهربا (شمع) ساكت. بتذكر في الوقت داك جابو لينا مدرب (هندي). الفرح عاوز يشقنا. الوقت داك ما في حاجة اسمها مدرب اجنبي. ناس الفاتح النقر ديل كانوا عندنا زي (السير أليكس فيرغسون). اعلى حاجة في البلد (الفاتح النقر). اكتر من كدا ما عندنا. بلد ما فيها مدرب اجنبي يقدل فيها (فاروق جبرة). اها يا جبرة شالوك ..عشان تاني ما تتفاصح فينا. فاروق جبرة اتعادل مع الهلال ..صدق ..ملأ الجرايد كلها تصريحات. فرحان ..تقول اتعادل مع (ريال مدريد). اسمع يا ابوالشباب ..نحن الهلال عندنا افضل من الريال. ريال شنو؟. الريال فيهو (البرنس). جبرة اتعادل مع الهلال واشتغل (تصريحات). ركب ماكينة (همد). جبرة مع تصريحاته قعد (ينظر). ونحن جننا وجن (التنظير). ما بنكره في الدنيا دي شيء اكتر من (التنظير). تجيب لينا (عدس) مسيخ ..ما فيهو حاجة غير الملح ..اخير لينا من (التنظير). ف () (). ف اوعك تقعد (تنظر) لينا. هسع (العدس) ذنبو شنو؟. خليك هسع في المدرب الاجنبي. اها قلت ليكم زمان جابوا لينا مدرب اجنبي. مدرب هندي. ونحن كنا بنلعب في السنترليق ..عاوزين نصعد. المدرب الهندي دخل بينا معسكر مقفول. 45 يوم نحن معسكرين. أي زول بسمع بي معسكرنا دا بقول نحن ح نشيل الكأس. قطر ما بقيف قدامنا. صعبين شديد. قلت ليكم كنا معسكرين 45 يوم. بعد ال (45) يوم طلعنا الشارع. هنود بس. أي واحد فينا عامل فيها (اميتاب). الزول الكعب والبيلعب (باك) عامل فيها (شورخان). قلت ليكم مدربنا (هندي). اول حاجة دورنا ليكم في الشارع (نهي) ساكت. أي زول يلاقينا نقول ليهو (نهي). نمشي الدكان ...نقول لبتاع الدكان ...نهي ..نهي طحنية. نمشي المكتبة ..نقول لبتاع المكتبة ..نهي ..نهي (المصري اليوم). نمشي الجزارة ..نهي ..نهي ربع كيلو لحمة ..ويكون ما فيهو (عضم). نهي دي دخلناها ليك في أي جمل. عندنا واحد مشي يفحص الملاريا. عارفين نتيجة الفصح طلعت شنو؟. نهي ملاريا. أي حاجة نهي. في واحد قال لينا والله فريق (الصوقعاب) يلاقيكم بي (نهي) حقتكم دي يديكم تسعة. نهي شنو كمان. والله اخر زمن ..عاوزين تدخلوا لينا (النهي) في الكورة. هو شنو المخلي الكورة تتراجع غير (نهيكم) دا. ف (). ف ما اشتغلنا بالموضوع. شغالين بس نهي ..نهي. يوم المباراة ...تقول لاعب الهلال..الاستاد من الساعة اتنين قفل. جمهور غفير. شيء مبالغ فيهو. الاعمى شايل المكسر. المباراة بدأت. المباراة مولعة نار. موت احمر. السرباك المتكلين عليه (شيال التقيلة)..اول خمس دقائق عمل لينا (ضربة جزاء). يا ود الناس ..حالتو دي موصنك. عارفين عمل (ضربة الجزاء) ليه؟. سرباكنا الهميم افتكر (مهاجم ) الفريق المنافس (خائن). طبعا هو افتكر نفسو (البطل). غمض وكشاهو ليك. خلى ليك زي يوم الخميس العصر ...(حتة) كدة. في علبة حلاقة ما بتلقط. اتفكفك. قلت ليكم مدربنا (هندي) قعدتوا تغالطوا. هندي صعب. النوع البقع من الطابق العاشر ..وما بتجيهو أي حاجة. هندي صعب شديد. بعد عشرة دقايق من المباراة الفريق المنافس سجل فينا الهدف الثاني. عارفين ليه؟. عشان المدافعين الاربعة مشوا يغنوا ليهم لي (بنت) جات مارة ورا العراضات. خلوا الكورة ومشوا يغنوا للبنت. الاربعة طلعوا. قلت ليكم مدربنا (هندي) قعدتوا تغالطوا. في الدقيقة الرابعة والعشرين الفريق المنافس سجل فينا الهدف الثالث. عارفين ليه؟. عشان حارس المرمي بتاعنا اكتشف انو المهاجم الانفرد بيهو (اخوه). ف . ف فيها دا. حارسنا ما كان عارف الكلام دا. حارسنا لما المهاجم انفرد بيهو ..شاف (الوشم). تصوروا المهاجم دا مفقود من اهلو من زمن كان برضع. ما تستغربوا. قلت ليكم مدربنا هندي. ما تقعدوا تغالطوا ساكت. في الدقيقة الخامسة والتلاتين ..الفريق المنافس جاب فينا الهدف الرابع. عارفين ليه؟. عشان نص لاعبي الفريق مشوا يشربوا موية. بقينا ما بنستحمل العطش. قلت ليكم مدربنا هندي. البقعدنا بي عطشنا شنو؟. قبل نهاية الشوط الاول كنا مغلوبين خمسة. عارفين الهدف الخامس جا فينا كيف؟. الاستوبر اتذكر (امو). واتفقع فينا بكا. الهنود حُنان شديد. ما تستغربوا مدربنا (هندي). بالطريقة دي انتهت المباراة 15- صفر. وتفاصيل الشوط التاني تابعوها في نشرة فضائية قوون في (المحصلة). انا فترت من الحكي. الهنود ضيعونا. اخدنا 15 ..وعسكرنا لمباراة الرد. عندنا امل. غيرنا المدرب والسرباك. اصلوا زمان وقت تحصل كارثة زي دي بقيلوا المدرب وبشطبوا السرباك. انا ما عارف الرسباك ذنبو شنو؟. عشان كدا منطقتنا كان فيها ازمة (سرباكات). السرباك زي لبن الطير. هسع دا ما موضوعنا. ف دا موضوعنا. موضوعنا نحن الليلة (غارزيتو). قالوا ليك المدرب دا لا معروف ايطالي..لا معروف فرنسي. ناس قالوا فرنسي. وناس قالوا اصلوا ايطالي. يعني هجوم ودفاع. دي صعبة عليكم يا مريخاب. دي ما بتفهموها لينا بالساهل. انا عارفة صعبة عليكم. دي عاوزة ليها شرح شديد. انا بتوقع ناس يعينوا ليهم مساعد مدرب (ارجنتيني). عشان يقولوا نحن زي ناس الهلال عندنا مدرب برازيلي ومدرب ارجنتيني. البرير دا صعب. جاب ليك المدرب الايطالي والفرنسي في (صمة) واحدة. ودا بتعقادوا معاهو كيف؟. قالوا ليك العقد مع المدرب الفرنسي اكتمل. فاضل بس الاتفاق مع الشق الايطالي. قلت ليكم نحن صعبين. يا ربي مدربكم دا عندو كم وكيل يا هاشم ملاح. دا ما مدرب واحد. دا جهاز فني كامل. دا طاقم مكتمل. ما عاوز ليهو (مساعد). خلاص يا ناس الهلال عاوزين تسحروا لينا. قولوا ما شاءالله. المريخاب ديل عينهم حارة. ما تنقوا لينا في الموضوع. خلوا الموضوع يمشي بي سلام. شوفوا (ريكاردويكم) وين؟. قلن ليكم نحن (ريكاردو) دا بنخلى ليكم ...ملح ..ملح. تاني بترجعوا لي فاروق جبرة. يا جبرة خليك قريب. ف بصبروا ليهو. اقول ليكم حاجة ..نحن مبسوطين شديد بي (غارزيتو). اخر انبساطة. ان شاءالله الافراح دائمة. ودامت الافراح ..والانتصارات. ملحوظة : بكرة بكتب ليكم عمود بالفرنسي. هوامش ف من (غارزيتو)..عاوزين نعرف منو ...غلبت الهلال خمسة كيف؟. نحن الموضوع دا الي الان ما واقع لينا. ما فاهمنو. في واحد قال لي الهلال جاب ليهو مدرب قدر مجدي ام بدة. قلت ليهم كمان ما تبالغوا للدرجة دي. انتوا قايلين غارزيتو دا بدأ التدريب متين؟. الزول دا ما طول في مجال التدريب. ما تصعبوا لينا الموضوع. بتاع ركشة دخل فيهو(قندران).. زولكم قام بعد 12 يوم عاوز يضرب تلاتة تسعات. تفتكر بتاع القندران بكون منتظرك للوقت دا. يا زول قوم امشي ساكت. خليها على الله. ان شاءالله مؤتمر الهلال اليوم يكون على قدر هذا المدرب الكبير. بالمناسبة المدرب دا ما عاوز لخبطة. أي لخبطة بتحصل بفوت طوالي. خلوا الشرط الجزائي كبير. ما تعطوا أي فرصة. نتمني ان يكون القعد لمدة ثلاث سنوات. اهم شيء استقرار الجهاز الفني. لو مبارك سليمان قبل يشتغل مع المدرب دا بكون تاني ما عندنا أي مشكلة. ما في أي عوجة. بس عاوزين لينا مدرب احمال. الاندية الكبيرة كلها بتهتم بمدرب الاحمال هذا. مدرب الاحمال ممكن يعمل نقلة كبيرة في المستوى البدني. مدرب فرنسي ايطالي. عارفين يعني شنو؟. يعني شوط بنلعبوا (فرنسي). والشوط التاني ح نقفل ..نلعبوا (ايطالي). شفتوا النظام دا كيف؟. قلت ليكم ..نحن أي حاجة عندنا بي نظام. هيع. ف . ف في محكمة الاستئنافات ..وفي تدريب الهلال. دا الكلام الصاح. بالتوفيق ان شاءالله. قالوا ليك غارزيتو اول زول سأل منو؟..مهند الطاهر. مدرب فاهم. وعارف بعمل في شنو؟. ابالغ ليكم شوية؟. الزول دا بصمتو ظهرت. ظهرت في الهلال. شغلو واضح. بكرة تعالوا بدري. عاجل : في شنو كمان؟.
