* شفتوا بص المريخ الجديد فى الصفحة الأولى؟؟ * قولوا ماشاء الله. * بص عالمى بيشبه العالمى. * أسلام شافت البص. * قالت لى يا باب كلم بابا جمال يجيب لينا بص تانى أحمر. * عشان نطقم البص مع اللبس. * وأتطقمى. * تمرين الهلال والروس الكان فى تمر ابونا بتاع قطر. * لى أسى الناس بتضحك فيهو. * قائمة لاعبى الهلال مكتوبة بخط اليد. * يد خلاوى ساكت. * الأسن نصو(كابيتال)ونصو(أصمول). * وممكن يبدا بالأصمول وينتهى بالكابيتال. * خليفة مكتوبة بحرف(الأس). * سليفة. * بكرى المدينة مكتوبة بالجى. * أجتمال قاصد(جيرنى). * جيرنى يعنى رحلة. * الروس ديل أظنهم عندهم واتساب. * المعز محجوب. * المعز فى ورقة. * محجوب بالعربى. * عبداللطيف بوى. * كان ما اللطيف كان وقع من الورقة عبداللطيف. * الحروف مكبوبة كب. * المهم. * لو لقيت الكشف واقع فى الشارع تحلف تقول منفستو بتاع بص ما سياحى. * بص بلدى ساااااااااى. * ما زى بصنا الفى الصفحة الأولى ده. * فرق يا أبراهومة ولا شنو يا مزمل؟؟ * أيها الناس. * عصمت محمد الحسن. * عصمت سيد الهلال. * مستغرب جداً من الترويج لأخبار غير صحيحة تتعلق بسلبه شعاره وأعادته للهلال. * سألتو. * صحى الهلال أستعاد شعارو؟ * ضحك. * تانى ضحك. * قال لى هو الهلال أساساً عندو شعار عشان يستعيدو؟؟ * ضحكت معاهو. * هييييي يكا. * ضحكنا الأتنين بى سبب. * لأنو الضحك بدون سبب قلة أدب. * ونحنا ناس أدب. * الموضوع..طلب من عصمت لأضافة سلع للماركة هلال عصمت. * ده كل الموضوع. * وحلو القول فى خشم سيدو. * وحلوة الكلمة فى خشم سيدا. * وسيدا يا سيدا. * والهلال ماركة وعندها سيدا. * المريخ برضو عندو سيدا. * المريخ عالمى. * ماركة. * فطومة أختى. * بالغتى فى الكتبتى. * أمس ده كلام تكتبيهو يا فطومة!؟! * أيها الناس. * فطومة أمس كتبت الآتى:. * ومجلس الهلال يحقق أنجازه فى مكان آخر. * السلطان وأخوانه يوجهون ضربة قاضية لعصمت أفندى بتاع الشعار. * (بتاع الشعار ده أعتراف من فطومة بملكية عصمت للشعار,زى مثلاً بتاع البوكس هو سيد البوكس وبتاع العجلة هو سيد العجلة وبتاع البقالة هو سيد البقالة). * نرجع لباقى كلام فطومة. * عصمت مازال يعتقد أن رئيس الهلال البرير لذلك يبرطع عبر الصحف ويدعى ان الشعار ملكاً له رغم أنف القانون. * (لاحظوا رغم أنف القانون دى). * الدبابير دى أظنو ما شافها. * ما كلموك بعطا المنان يا عصمت ولا ما سمعت بوزير الدولة فى الدفاع؟ * حكومة الهلال تحسم النزال. * والقادم حالك السواد. * فى الأيام القادمة حتى يتعظ عصمت وغيره (غيره ديل نحنا خلى بالك)أن الهلال أصبح دولة متكاملة ولا يمكن أن يتعدى على حقوقها أى شخص. * أنتهى كلام فطومة. * فطومة. * القانون قال فى حكم المحكمة العليا بالرقم1774\2010 أنو الشعار حق عصمت. * وبرضو القانون قال فى قرار المراجعة من المحكمة العليا(أعلى سلطة قضائية بالبلاد بالرقم99\2011أنو الشعار شعار عصمت). * بعد ده تانى لا ولاية للقضاء على النزاع. * تانى الشكية الا لله. * والشكية لغير الله مذلة. * يبقى رغم أنف القانون دى بتعملوا فيها أنتوا. * فى يا فطومة حاجة أسمها حجية الأمر المقضى به. * وفى حاجة أسمها القرار النهائى. * وفى حاجة أسمها القرار البات. * بات يا فطومة. * بات الشعار عن عصمت. * أما حكاية الدبابير دى يا فطومة. * بالغتى فيها. * بلد فيها قانون وبرلمان وحقوق وقضاء وحيكومة تقولى لى دبابير؟؟؟ * بالمناسبة عصمت برضو زول دبابير وكبير وخطير وأسألى سعادة المشير. * دى بلد قانون. * أتحذوا من الشجرة شعاراً وفضوها سيرة يا أختى. * أما قصة حالك السواد دى فما أظنك يا أختى قصدتى بيها التهديد والوعيد لمخالفة القانون فى بلد قضى قضاؤه بقراره الأخير. * قرار محكمة ما قرار دبابير. * بعد ده الشكية لغير الله مذلة. * أقول ليك يا أختى. * أحتسبوهو. * أها. * نجى لى شمارات والى الخرطوم. * أكان شفت يا والينا. * الواتساب حوالينا وما علينا. * اليومين دى بقى يجيب حاجات غريبة بقى يلقط لينا. * والغريبة أولاد يا والينا. * كريمات ومكياج وفاونديشن. * وحاجات ما بتشبه جدوداً لينا. * حقوا يا والينا البرلمان سريع يناقشوا لينا. * ويصدروا قوانين بأعدام أى حاجات مشينة. * فنحن نتحمل الجوع ولكن لن نتحمل ولد يسئ لينا. * قالوا يا والينا. * واحد من أياهم قاعد مع صديقه ليهو. * قالت ليهو يا هناى تعال نتزوج. * قال ليها والله فكرة يا هناية لكن نتزوج منو؟! سلك كهربا * ننساك كيف والكلمة صعبة لكن أخير نقولها قبل يقولوها لينا. والى لقاء**********سلك لن ننساااااااااااااااااااااااااااااااااااااك في السلك - بابكر سلك