وانا ماشي في الشارع.. مريت بعندهم بيتناقشو.. واحد أقروب (ماشي كداري).. وواحد سايق عربية اتوس.. قال سيد العربية لسيد الكداري: ماشي في نص الشارع كدي.. اصلك عربية؟.. عربية انت؟.. "قالها وهو يعضي على سنونو". رد سيد الكداري وبرضو عاضي سنونو.- أنا محظوظ عشان أبقى عربية؟.. يا ريت.. ملاحظة جديرة بالتسجيل:- لاحظت إنو نحن أكتر شعب يعضي سنونو وشلوفتو التحتانية حين شكلة.. ضحك سائق الاتوس وهزّ راسو.. مستعجبا.. مستنكرا.. ثم تاورتني شلاقتي.. والتي اتيقن منها تمام اليقين انه في يوم من الايام .ح تجيبها لي ضقلها يكركب.. وح تدخلني في حيص بيص. تاورتني شلاقتي فسلمت على الرجل الذي يتمنى ان يكون عربية:- (أزيك) "عليكم السلام" "يا أخي الناس دي والله عجيبة خلاص.. المشي في شارع الله دا ،ما دايرننا نمشيهو؟.. خلي بالك سمعت نضمك مع سواق الاتوس داك" "آآآي.. بالله شفت كيف؟.. " "لكن يا اخوي كدي كلام بيني وبينك كلام اخوان في الله.. انت داير تتقلب عربية لي شنو؟؟؟.. " عاين لي شديد.. حمّر فيني "ها.. أنت ماك نصيح؟.. حسي الاتوس دي.. سعرها كم؟" قلت ليهو.. "يمكن.. مية وعشرين مليون" بأطراف أصابعين يدو الشمال لزاني في سدري، وقال لي:- "انت دا حسي لو طصتّك عربية ومتّ.. ديتك كم؟" وأنا في سري "إن شاء الله تطُصك انت دا.. عامل اضنيك الدايرات يطيرّن من راسك ديل".. ثم بالخاطر مقارنة سريعة بين اضنيهو ومريات الاتوس قلت ليهو: "انت لو طصتك عربية ديتك تلاتين مليون بس" "أها ما قلت لك؟.. جاك نضمي..عان العربية بي كم، وانت بكم؟" قلت ليهو فعلا العربية أغلى منك.. ثم كربّت كراعي ومشيت بسرعة من الزول البداية معرفتي بيهو صدمة عربية دا.. وانا ماشي قعدت أحسب.. والله نضمو صاح.. يعني الاتوس المستعملة تساوي اربعة سودانيين ضكور.. أو تمانية اناتي.. الغريبة فيهن واحدة تكون لابسة دهب يساوي سعرها في سوق الدية مرتين.. وممكن تساوي سبعة تياب مطبقاهن وخاتاهن في الدولاب.. لكن غايتو الضكر يا الله يكابس ويساوي سعر ركشة.. وانتايتين بركشة واحدة ومافيها مسجل كمان.. الغريبة نحن سعرنا بالقطاعي أغلى.. كليوة واحدة تجيب خمسين مليون..ولو نضيفة وما اشتغلت كتير بتجيب الستين مليون براااحة.. وبالجملة رخاااااص.. غايتو البلد دي اقتصادها مخلبط جنس لخبطة!.. نصيحة لوجه الله، الحاسي انو المغسة ح تقتلو، يبيع ليهو كليوة واحدة ويهيّص باقي ايامو في الدنيا دي.. وبعدين الكلوة الباقية مقضياهو.. هو اصلو قاعد يشرب شنو؟ مو جغيمة الموية دي؟.. مكفايهو.. يا قول المرا القالت لي راجلا كدي، لما عاوزة تغيّر عفش البيت والراجل قال لها مفلس، قالت لو ما بتشوف في الرجال البي يبيعو في كلاويهم ديل؟.. اتمنى اعادة النظر في قيمة الدية.. لانو يا جماعة بامانة كدا الدية دي بقيمتها دي خسرانة معانا.. تكاليف الفراش والبِكا ما بتغطيها!! الباب البجيب الريح- صحيفة اليوم التالي