معليش يا جماعة ..مرحلة (المجموعات) دي للناس الكبار ..عشان كدا ح تشوفها ب (الكرت). عندكم كرت تشوف ..ما عندك كرت ..(طبق) النيلين دا لو حولتوه (960) درجة ما بتشوفوا شيء. مريخابي زعلان زعل شديد. عاوز يطرشق ...خشمو بقى من الزعل زي (الحلة) المكفية فوق العنقريب. عاوز يطق. كل يوم يسمع ليك قصة عن (المجموعات)...والهلال ..والترجي ومازمبي ..(الاسماء الكبيرة دي). الاسماء دي طبعا بتخلعهم. يمشي البكا يلقى الناس بتتكلم عن (المجموعات). يمشي العرس ..يلقاهم بتكلموا عن (المجموعات). يمشي المستشفى ..الكلام كلو عن (المجموعات). الزول الما ناقش حاجة ..بتلقى بتكلم ليك عن (القرعة). الموضوع دا ضايقو ..ضيق شديد ..خلى ليكم خشمو متل (التوستة) الحالجة. انت الليلة (الخشم) دا مالك مدخلو بين السطر والتاني. قلت اديكم خشم ..خشمين. المريخابي لقى ليك الثقافة الايامات دي ثقافة (مجموعات). قال شنو؟. قال يعمل ليه (مجموعة) في الواتس آب. غايتو يا اخوي مجموعتك دي إلّا يدخل ليك فيها بابكر سلك ومعاوية الجاك وهيثم كابو. الترجي ...ومازمبي والصفاقصي والزمالك ووفاق سطيف ..لو ما عندكم (كرت) ما بتشوفوهم. لو ما عندكم كرت (يمين تسخينة ما تشوفوها)...تسمعوا بيهم بس..(صوت) من غير صورة. او انتظروا نشرة الاخبار في قناة بن سبورت الاخبارية ..بجيبوا ليكم (لقطة). المجموعات للكبار فقط. انتوا موش في البيت ..الاسرة لمن تكون قاعدة ..وتقوم تفتح ليها موضوع حساس..(وسري للغاية) ، موضوع بتاع ناس كبار..موش بقوموا ينتبهوا الى ان هناك (شفع) قاعدين في الغرفة (بتسنطوا) متل (شبابيك) المدارس. اول شبابيك المدارس بتسنط. شفع الزمن دا (سنطين) خلاص ..برخوا (اضنينهم)...ويعملوا ليك فيها ما شغالين بالموضوع كتير. بعد الانتباهة دي ..الناس الكبار الفى البيت بقوموا يلتفتوا الي (الاطفال) القاعدين يسمعوا في كلامهم ..يقوموا يقولوا ليهم : (انتوا المقعدكم هنا شنو؟ ..قوموا اطلعوا برة). دا كلام ناس كبار. هسع نحن بنتكلم عن (المجموعات). بنتكلم عن حاجات كبيرة شوية. معليش يا ناس المريخ ..قوموا اطلعوا برة. موضوع (المجموعات) دا ..موضوع كبير اوي ..اوي. ولو ما عندكم (كرت) إلّا تبقوا ناس (طيور الجنة). ناس : كلمة حاضر بدي منكم ما تغلطوا قولوا شو قولتو؟ حاضر حاضر عمو اشرف حاضر حاضر عمو اشرف محمد بشااااار وديما بشااااااار يسلمو يسلمو يا دكتور الواوا راحت من عيني الله يزيدك علمك ونور بإيدك الله بشفيني ما عندكم حل غير طيور الجنة ...ويا ريت بالمرة كدا ..ناس ابراهومة وشيلميس تشغلوا ليهم (طيور الجنة بيبي). يعني طيور الجنة الرئيسية ذاتها ما تخلوهم يتابعوها. ما عندكم خيارات تانية....عشان (الشفع) ....وعشان الناس البطلعوا من دور ال (64) ديل ...مرحلة المجموعات دي عملوها بالكرت. مالها (طيور الجنة) انتوا قايلنها كعبة. يسلمو يسلمو آه آه آه يسلمو يسلمو آه آه آه يسلمو يسلمو يادكتور رغد الوزان وعصومي و الوليد ليش بتكذب يا وليد، ما بتعرف انو حرام و عيب ومش من الآداب ، و الكذاب ما رح يبقالو اصحاب لا لا لا ما تخجل تحكي الحقيقة كلنا بنغلط يا وليد و الصادق محبوب الكل وربنا بيحبو يا وليد حفّظوا الاناشيد دي ناس ضفر واكرم الهادي سليم. اكرم الهادي سليم افضل ليه (الاناشيد) دي ..بدل (النطيط) البعمل فيه دا. ما عندكم (مجموعات). ما عندكم بطولة خارجية تشاركوا فيها ..طلعتوا لي من بطولة الاندية الافريقية للابطال من (قولة تيت). قبل ما تصبح. ح يكون عندكم فراغ عريض. مباريات الممتاز دي ما تحسبوها ..الاتحاد العام كل اسبوع بيأجل فيها. يعني احتمال في الشهر تلعبوا ليكم مباراة. لذلك بدل ما تقعدوا تضيعوا وقتكم ساكت ..انزلوا مع (الاطفال) في الاجازة الصيفية لطيور الجنة. اشتغلوا معاهم : انا رغد اللي بتحبوني ضحكاتي وصوتي وعيوني والبسمه من قلبي بتطلع لما عالشاشه تشوفوني لا لا لا لا هي .. لا لا لا لا هي بدي تحبوني لاخلاقي للخير الي بقلبي باقي لما القاكم بدي الاقي كل وحده بخلقا مزيونه رغوده .. رغوده .. شفتوا كيف؟...لو ما شغالنكم ب (طيور الجنة)..بتملونا عوارض ..نحن عارفين كلامكم كتير. وعينكم حارة زي فرن البتوجاز. خلاص (انجهونا). خلونا نحن نتابع موضوع (القرعة)..نشوف نحن عندنا كم نقطة ..وتصنيفنا كيف مع الكبار. نحن مع التمانية الكبار ..وانتوا مع ال (64). يعني (الطيش). لو فكينا ليكم مرحلتكم دي ح تطلعوا (طيش) 64 نادي في افريقيا. نحن مع التمانية الكبار ..مصنفين في المستوى التانية. الزمالك الذي حقق الكثير من البطولات الافريقية ..مصنف تحت الهلال. وفاق اسطيف ..تحت الهلال. خلونا ..نحن ..نشرب الشاي ..ونطلع (الكراسي)..ونقعد نتكلم عن (القرعة). مالكم انتوا ان شاءالله نقع في مجموعة فيها (شيليسي). انتوا خليكم في طيور الجنة : كنت قاعدة مرة جوا حوش الدار تحت الزيتونة الخضرا جنب اكليل الغار كانت أمي الحنونة عم تخبز الشراك وبيي بيسقى الليمونة مع اختي ملاك فجأة عند النافورة أجى رجال كبير ناداني يا أمورة يا أحلى العصافير قلي إحنا فوق فوق وانتوا في الوديان نعطيكوا شوية حقوق وتعطونا الكوشان الحاجات دي بالمناسبة ما كعبة ..مناسبة جدا للسن الاندية البتطلع من دور ال (64). خاصة اذا كانت هذه الاندية بتشوبر زي (احمد شوبير) وبتلعب مع بايرن ميونخ. نعمل ليكم شنو؟. تاني اكتر من (طيور الجنة) ما عندنا ليكم. نحن حكاية (الطبق) حولوه (26) درجة شرق ..اتجاوزناها..(طبق) شنو البنحولو. نحن عاوزين نتابع لينا مباراة وإلا عاوزين نصدق لينا (كشك سجائر). طبق النيلين زي (السوق الشعبي) بتاع شندي ..كل محافظ يجي يحولوا (حتة). تقعدوا تتابعوا (خالد الاعيسر) دا .. يوم بقول ليكم (باب) البيت الفاتح على شارع افتحوه (شرق). لو بابكم فاتح غرب ..ما ح تشوفوا قناة النيلين. وشوية ..شوية كدا ..ح يقول ليكم (الشبابيك) الفى الغرف ذاتو حولوها غرب. لو شبابيكم فاتحة (شرق) ما ح تشوفوا (النيلين). ح يقعد يقلب ليكم الحاجات كدا ..لمن تلقوا نفسكم في الاخر قلبتوا الهوبة 120 مرة. نحن (التقليب) دا ما بنفع معانا...عشان الحاجات البعمل فيها خالد الاعيسر دا ..نحن دخلنا مرحلة (التشفير). تاني بالساهل كدا ما بتشوفونا ..إلّا تدفعوا. ح نخليكم انتوا في طيور الجنة. نني نني يلا نني على صوتي وانا بغني نامي نامي يا يمامة يلا و سريرك مستني يلا نغفى ع المخدة غمضي عيونك يا وردة قولي أغلى احبابي حدي يعني في نومي متهني يلا خليني أغطيكي لا يقرب البرد عليكي الله من عنده يحميكي يعطيكي شو ما تتمني محلى هالقمرة بتغفّي بالهداوة بأحلى غرفة اتخيلوا النشيد دا بردد فيه (سعيد السعودي وامير كمال). حاجة تقطع القلب. فاضين ..وما عندكم شغلة..يعني ح تعملوا شنو؟. قلنا ليكم (بن سبورت) دي مشفرة ...اهداف بكري المدينة تاني بي اخوي واخوك ما بتشوفها. والله تسخينة (خليفة) ح تشتاقوا ليها. تاني ما عندنا حاجة ساكت. ألّا تدفعوا ..يا تبقوا كمان ناس (طيور الجنة). نحن ح نقعد نتكلم عن (بشه)..يفلفل في الباكات زي (الرز)...شبال بشه متل (قولة الخير). ح نحكي ليكم عن عالم نزار الصاقعة. الصاقعة دا لو شد حيلو بعد بطولة الاندية الافريقية على الاقل كدا ح يحترف في الدوري الايطالي. انتوا هنا يا مريخاب ..معليش ..ركزوا لي مع (طيور الجنة). ما عندكم غيرها. خليكم في : لا تسأل هالدنيا كيف تبقي احلي علي يدك خليك بالبهجه زي طيف واسعد كل الي عندك ناس بلة جابر فاضين ..وما في حاجة قدامهم ...غير يقعدوا يتشاكلوا في (القنوات). الشكلة ذاتها ح تكون بين طيور الجنة ..وطيور الجنة بيبي. يا بلة جابر ..انت (طيور الجنة بيبي) كبرت عليها. خلاص. لو كل واحد فينا يكون للفرحه بيت و عنوان احبابه مثله يصيرون وجه الفرحه بكل مكان نحن يجيبوا فينا في الوكالات ..الوكالة الفرنسية ..ما تخلى ليها تصريح لي عبداللطيف بويا. الوكالات العالمية ..كلها بتتحدث عننا ..بي صورة رسمية (وفرض عين)..ما زيكم انتوا البتمشوا تشتروا ليكم (سيرة). عشان يتكلموا عنكم في الوكالات بتدفعوا ليكم (12) مليار جنيه ..وتلعبوا مع بارين ميونخ. ويا ريت الوكالات لو بتتكلم عنكم كويس. الوكالات بتقول عليكم ديل الناس الدفعوا (12) مليار جنيه عشان يلعبوا مع بايرن ميونخ. ديل الناس ذاتهم ..(كورنر) ما طلعوا بيه امام بايرن ميونخ. هسع نحن ح نلعب (6) مباريات في مرحلة المجموعات ..(وانتوا قاعدين تتفرجوا). عليكم الله الحاجات دي ما بتجيب ليكم (نفسيات). ما بتعمل ليكم (حوامض). ما بتجيب ليكم (تقرحات). والله انتوا عندكم جنس صبر...ناس يطلعوا من دور ال (64) ويقعدوا لمن (يصدوا) في انتظار الموسم القادم. عاوز اقول ليكم. بايرن ميونخ دا بقيت ما بتفأل بيه. الموسم القادم بعد ما تنتهوا من موسم (طيور الجنة) دا ..ألعبوا ليكم مباراة مع (تشيلسي). غيروا شوية...على الاقل يمكن تجاوزوا دور ال (64). ويمكن الانجليز ديل يجاملوكم..وتطلعوا ليكم منهم ب (كورنر). عليكم الله لو طلعتوا ليكم منهم ب (كورنر)..جيبوه وتعالوا سوق ليبيا ..اعملوا ليكم بيه (كافتريا). سموها كافتريا كورنر تشيلسي. لكن حتى يأتي الموسم الجديد..انصحكم ناس بلة جابر وموسى الزومة ديل ما تخلوهم يقعدوا قريب من التلفزيون. كدا ما صاح عشان عيونهم. هم الجماعة ديل بلا كدا..كورهم كلها في (الكشافات). عشان كدا امنعوهم من الجلوس قريب من التلفزيون ...الجماعة ديل بقوموا يسرحوا مع (طيور الجنة). اليوم كلو في طيور الجنة. عندهم شنو لا مجموعات ..ولا دور الترضية في الكونفدرالية. ملحوظة : الفراغ ممل شديد. هوامش لو استمريتوا بالمستوى دا يا ناس المريخ ح تمشوا (دار الرياضة) ام درمان. ومبارياتكم ذاتها ح تكون بالعصر. احسن ليكم اكتفوا بحكاية الطلعوع من دور ال (64). هسع الواحد لو عندو ولد صغيّر وسألوا يقول ليه شنو؟. يقول ليه المريخ طلع من دور ال (64). نحن الهلالاب الموضوع دا عامل لينا زعل. مزعلنا عديل كدا. زعلنا عليكم. قالوا النابي (اتخندق). قلنا هو لو ما اتخندق ..كان اتعادل. لو ما اتخندق ...الهلال كان فاز عديل كدا. مباراة الهلال والاهلي شندي نتمنى ألا تتلفز ..حتى يتدافع الجمهور بقوة نحو استاد الخرطوم. خاصة ان المباراة صعبة. الهلال يجب ان يخرج من حالة الفرح تلك. الاهلي شندي فريق ما ساهل. الجميل ان نصرالدين النابي ...يعرف يتعامل مع كل مباراة بصورة جيدة. لذلك ينجح النابي دائما. الحمدلله ان مجلس الهلال التفت الي التسجيلات مبكرا. البطولة الافريقية تحتاج الي اضافات مؤثرة. امام الاهلي شندي نتمنى ان نشاهد صلاح الجزولي ووارغو. ...... عاجل : ناس طيور الجنة ديل ..(الرابطة) ذاتها ممكن تشيل منهم (نقطة). وإن طال السفر - محمد عبد الماجد صحيفة قوون
