نحن ما فينا واحد بالغلط كدا ..قال ليك الهلال دا (العالمي). هي (العالمية) دي بجيبوها بي ناس خالد عبدالرحمن والفاتح ديدي والفاضل ابوشنب. ما فينا زول بالغلط كدا ...جاب سيرة (العالمي). ولا بنقول حاجات بالشكل دا. ساكتين ساكت. مقصورة زي الناس ما عملناها. بطيخ ما عندنا. بطيخ ايه؟...(والله دي فرحة منك ساكت). البطيخ بساعد في تفكيك القصبة الهوائية ..(هو دا كلام الدكاترة ..ما بتفهم منو اي حاجة). اتعادلنا بي عرق جبينا ..وبي (ضربة جزاء) اضاعها الفريق المالي كمان. اكتر من كدا نعمل شنو؟. نشرحها ليكم كيف؟. نوصلها ليكم بي ياتو طريقة؟. شفتوا (ضربة الجزاء) دي مخصوص دفاع الهلال ارتبكها. عملناها (قصد). أو قل مخصوص (حكم) المباراة احتسبها ظلماً على الهلال. عشان شنو؟. عشان نوريكم...نحن ضربات الجزاء بحسبوها (ضدنا)..وبنتعادل ..وبنصعد إن شاءالله. وانتوا في (الخرطوم) يدوكم (ضربة جزاء). ديل في (كمبالا) بلد الفريق التاني ادوهم (ضربة جزاء). اها اكتر من كدا يعملوا ليكم شنو؟. بعد كدا ما فضل ليهم إلا يدوكم (شعار الهلال) دا تلعبوا بيه ..تصعدوا بيه وترجعوا لينا. كمان ما تقول (شعار الهلال) فيه محاكم وجدل قانوني. كمان (شعار الهلال) عاوزين تلاحقونا فيه. انتوا يا جماعة ما كفاكم ابوالعائلة ..افضل رؤوساء المريخ على الاطلاق. ابوالعائلة جبتوه من وين؟. جمال الوالي (الفرحانين بيه دا)..صرفوه ليكم من (مدرجات) الهلال. ما تزعلوا. ما تغضبوا ..دي الحقيقة ..ما تقعدوا تشرطوا لينا ساكت. خلوه جمال الوالي. انتوا يا بتوع (التمهيدي) هيثم طمبل ما كفاكم. كلتشي. اكرم الهادي سليم. احمد الباشا. ريتشارد. علاءالدين بابكر. تراوري. ديل حددناه معاهم لي هيثم مصطفى. اديناهم هيثم مصطفى ذاتو ...قالوا نحن ما عندنا (قائد)..ونحن ظروفنا صعبة ..والبلد كلها مشاكل ..عاوزين لينا (قائد). عاوزين مهاجم ..اديناهم. عاوزين رئيس نادي ..اديناهم. عاوزين قائد ..اديناهم. عاوزين نفط ..اديناهم. قلنا ليهم خلاص شيلوا هيثم مصطفى دا (17 سنة في الهلال). ان شاء الله يبقى ليكم (قائد). اها الجماعة ديل بي (قائدهم) طاروا ليك من دور ال (64). احرجتوا القائد ذاتو. طوالي قبلوا كدا ..شالوا المدرب. المدرب ما عندو أي دخل بالموضوع دا. والله يا جماعة ..وانتوا ما طالبني حليفة ...الطلوع من دور ال (64) دا لا عاوز ليه (قائد) ولا حاجة. بلة جابر بي حالتو دي ممكن يطلعكم من دور ال (64). انتوا بتنسوا يا جماعة ولاّ شنو؟. بتذكروا القائد سعيد السعودي وقت طلعها من القون. الكورة ماشه على القون. سعيد السعودي زي (الحديّة) طار فيها وطلعها من القون. انا المباراة كلها ..اقول سعيد السعودي (انقذ) المريخ من هدف مضمون. لمن لقيت لي زول في النهاية شرح لي القصة. قال لي سعيد السعودي طلع الكورة من قون المريخ ..ما من قون الفريق التاني. قعدت اغالط في الزول ..لمن حضرت الاعادة. وقلت لي زول صاحبنا حولها لي في (الواتس آب). بعد شوية وقعت ليّ. قلت ليه والله العملية العملها سعيد السعودي دا ..لو كان بيلعب في الاهلي شندي ما بعملها. ناهيك يعملها وهو بيلعب في المريخ ..وهو قائدًا للمريخ. هي (القيادة) دي غيروها. صاحبكم سمع كلمة (ناهيك) دي عجبتو ليك ..قال لي كلام صاح والله. اها يا جماعة الناس ديل اديناهم الكبير المرحوم ابوالعائلة. واديناهم جمال الوالي ومعاه (مقصورة) كمان. جمال الوالي بي مقصورتو. واديناهم طمبل وكلتشي وعلاءالدين بابكر وتراوري...(هجوم يمسكهم 20 سنة). واديناهم احمد الباشا وريتشارد واكرم الهادي سليم. واديناهم ليكم (قائد) جاهز. كمان عاوزين يلاحقونا في المحاكم في (شعار الهلال). في قوة عين اكتر من كدا. دي قبل كدا لاقتكم. عشان الحاجات البتعملوا فيها دي. عشان (نيّتكم) دي. وحفركم. طيّرتوا من (التمهيدي). انتوا قايلين نفسكم صغار. انتوا قايلين نفسكم النيل الحصاحيصا. عمليتكم دي (نيل الحصاحيصا) ما بعملها. في فريق عندو (استاد) زي استادكم دا بطير من دور ال (64). طيب لو ما كان عندكم استاد ..كان عملتوا شنو؟. الحبيب مأمون ابوشيبة طبعاً قبل ايام قال لو ما جمال الوالي المريخ كان ح يلحق الموردة. القصة ما قصة جمال. لو ما (لجنة الحكام) يا ابوشيبة ...كان المريخ نزل. لكن البلد دي فيها (حكام)..اسكت خليهم ساكت. ما عاوز اتكلم عن التحكيم. لكن عليكم الله من الله خلقكم ..شفتوا ليكم فريق في مباراة الذهاب يمنح (ضربة جزاء). وفي مباراة الاياب يمنح ( ضربة جزاء). ويطير من دور ال (64). ضربات الجزاء دي مشت وين؟. نحن لو لقينا ضربات جزاكم دي ..كنا هسع بنلعب في الدوري الاسباني. ما تقولوا لي دي ح تعملها كيف؟. ناس عسكروا في الدوحة (شهر). وهاك يا طيارات. وهاك يا بدل. وهاك يا تصريحات. عبدالصمد ما فضل ليه إلّا يلعب. وهاك يا فنادق. شهر في الدوحة. في الدوحة تاني يوم لعبوا مع (بارين ميونخ)..نحن استغربنا. اصابتنا حالة بتاعة (استغراب) دماغي كدا. اتاريهم جماعتنا ديل دفعوا (12) مليار جنيه عشان يلعبوا امام بايرن ميونخ. في داعي للحاجات دي. 12 مليار ..وطاروا من دور ال (64). تاني. يقولوها ليكم الف مرة (عشان تقع ليكم). عليكم الله هسع (التمهيدي) دا في داعي يصرفوا ليه القروش دي. التمهيدي دا ..(طاولة رغيف) كتيرة عليه. ديل دفعوا (12) مليار عشان يلعبوا امام بارين ميونخ. وعشان يضعوا صورة هيثم مصطفى في تذكرة المباراة مع ريبيري. وفي النهاية يطيروا من دور ال (64). وبعد كدا لعبوا مع الوحدات الاردني. نسيت اقول ليكم بايرن ميونخ ومع الدفع دا ..(كورنر) ما طلعوا بيه. ولا كورنر. ولا كورنر دي عارفين زي شنو؟. زي (الضلعة) البجيبوها في الصينية ..عشان الناس تشوفها ..ويرجعوها عشان تجي في الصينية التانية. المريخ في الدوحة لعب كمان مع زينت الروسي ..(فريق بيلعب في دوري ابطال اوروبا). الهلال وقت لعب مع (زينت الروسي) واتعادل معاه ..قالوا لينا دا ما زينت ..دا فريق تاني. وقالوا لينا مساعد المدرب لعب في المباراة. والمباراة كلها ما بتفوت ليها (50) دقيقة. طلعوا لينا المباراة (تقسيمة) ساكت. لمن نحن اقتنعنا وقلنا (اعداد) الهلال دا ...زي اعداد الولاية للخريف. الله يستر ساكت. الله يشوفنا بس. اها انتوا يا مريخاب لعبتوا مع (الروس) ديل عديل كدا.. عملتوا شنو؟. مشيتوا (القمر). لا طبعاً. طلعتوا من دور ال (64). المريخ لعب امام ريد بول النمساوي. عليكم الله ..اكتر من كدا يعملوا ليهم شنو؟. يسوا ليكم شنو؟. وروني بس. انا الموضوع دا غلبني. بعد الحاجات دي كلها تطيروا من دور ال (64). يا جماعة الكلام دا ما بجي. يا جماعة باركوها. يا جماعة ما كدا. نحن بدون الحاجات دي. بدون بايرن ميونخ. وبدون (مقصورة). وبدون (كروجر). ومنو كدا اتوفيستر. بالمناسبة دي. اتوفيستر دا شايفو ظهر تاني في كاميرا الموبايل. اتوفيستر شفت ليكم صورو في تمرين المريخ ..قلت دا شنو الزول العاوز يقطع الميدان دا. موش زمان وقت كنا بنلعب في الميدان في الحلة ..بقوم يجي عمك كبير كدا ..يقول عاوز يقطع الميدان. نقوم نحن نوقف الكورة ..ونمسك الزول من ايدو ونقطعو الميدان ..قبل الواطه ما تمغرب. اها اتوفيستر زي الزول العاوز يقطع الميدان. الزول دا انا من هسع بقول ليكم. ما تخلوها تمغرب عليه. لو ضلمت ..اتوفيتسر دا ما بشوف ليكم. وكلموا بلة وموسى وضفر وامير كمال وعنكبة..قولوا ليهم اوعكم زول يشوت ليه كورة غلط. تقوم تقع في رأس الزول دا تقوم (تكتلو) ليكم. اقول ليكم حاجة. انتوا عشان تجاوزوا الحتة دي ..جيبوا ليه (كرسي متحرك). أو اعملوا ليه (كمامات). كمان يقوم يموت ليكم بي كورة طائشة كدا من كور موسى الزومة ...الالمان يقوموا يلقوا ليهم سبب ...يجيبوا ليهم قوة حربية في البلد. كتبوه تعهد. تعهد زي تعهد الزول البدخل ليه عملية صعبة. خلوه يكتب ليكم ..انو في تمرين المريخ مسؤول عن نفسو. الحياة من الموت ما معروفة. وكورة بلة جابر من موسى الزومة ما بتتفرز. نحن اتعادلنا بدون ما نقول عن الهلال (العالمي). وبدون ما ندفع (12) مليار. وبدون ما نلعب مع بايرن ميونخ. وبدون ضربات جزاء. بل بعد ضربة جزاء احتسبت ضد الهلال في مالي. وامام الملعب المالي وليس فريق يوغندي ..(حق المواصلات) ما عندهم. الهلال اتعادل واصبح بإذن الله وتوفيقه قريباً من التأهل إلى دور ال (16). الشيء العجيب امس ناس قناة النهار الرياضية ..خلوا كورتهم. خلوا الاهلي والزمالك وقعدوا يقولوا ليك ..نحن نتوقع الهلال يصل إلى دور المجموعات. ناس كريم حسن شحاتة ووليد علاء الدين وطارق يحيى ..اتوقعوا ليك الهلال. عارفين اتوقعوه وين؟. في المجموعات. يعني حكاية دور ال(_32)..وحكاية ال(16) دي ما حاسبنها في الاساس. الهلال طوالي في المجموعات. اغرب من كدا..معلق مباراة الزمالك واسكوب سبورت ..قعد كل والدقيقة والتانية يقول ليك انا اتوقع الهلال يكون في مرحلة المجموعات. من غير أي مناسبة ..المعلق كان بقول كلامو دا. اها يا جماعة ...نحن لعبنا مع بايرن ميونخ. نحن لعبنا مع ريد بول. نحن دفعنا 12 مليار. نحن في أي مباراة بحسبوا لينا (ضربة جزاء). يا جماعة. يا عالم. نحن قلنا على الهلال (العالمي). لا طبعاً. نحن ح نتأهل إن شاء الله. شفتوا (الفهم) دا كيف؟. ملحوظة : يا احمد الحاج اصبر. هوامش انتوا تعالوا هنا. وبدون مقاطعة ليكم. امس حولت الطبق على كدا. وديتوا على البطانة. عارفين جاب لي شنو؟. جاب لي الرشيد بدوي عبيد ، في قوون. قلت كمان الرشيد بدوي عبيد ..ما يقوم ينفعل ..ويعمل لينا عملية خالد الاعيسر. قلت الزول دا ما يقوم يستقيل. لكن الحمدلله الامور مشت تمام. ما في أي مشكلة. الرشيد بدوي عبيد ..نقل لينا الكورة (قطعة ...قطعة). انتوا تعالوا هنا يا جماعة. القنوات بتاعة الدولة دي ليه بتتعامل مع الهلال كدا. الهلال دا فريق اجنبي. طبعاً المريخ الفريق (الوطني). ناس الشروق ..المريخ دا لو مشى (زحل)..ينقلوا ليك مباراته. ديل مباراة الدمازين ...المريخ كان لاعب براهو. المريخ لاعب مع نفسو. تتخيلوا ناس الشروق نقلوا المباراة دي. عشان شنو؟. عشان يقولوا ليك المريخ شال كأس السودان. وناس قناة النيل الازرق ..الهلال كان لاعب بكره ..وهم بتكلموا في (البحث عن هدف) عن استقالة عبدالصمد. عبدالصمد مين؟. أما ناس القومي والنيلين ..البعملوا شكلات واستقالات على مباراة المريخ ...امس ما ظهروا. تتخيلوا (الاذاعة) امس ما اشتغلت بالمباراة. الاذاعة قاعدة حارسة المنتخب في الفاشر. والله يا جماعة شغلكم دا ما بنفع معانا. ولا بنكضب. هسع الهلال يتأهل ..وتعملوا فيها اصحاب الحكاية. اها المريخ طار ليكم من دور ال(64). بعد كدا إلا تنقلوا مؤتمرات عبدالصمد. عبدالصمد مين؟. مباراة الاهلي شندي في الكونفدرالية ..تم نقلها في قناة قوون. مباراة الهلال لا. شغالين نقل تلفزيوني بالتلغراف. يا جماعة ..الهلال دا كلو الشعب. كل الفرح. تاني ما عاوزين أي قناة تنقل مباراة الهلال. خلاص بعد شوية الهلال ح يظهر في بن سبورت. انتوا وقت العوزة ما لقيناكم. تاني عاوزين بيكم شنو؟. جمعة جينارو ..لم يحبط مدربه ..وكان عند رهان نصرالدين النابي. جمعة جينارو ..صد ضربة جزاء في توقيت مبكر من عمر المباراة. يعني لو الفريق المالي سجل من ضربة الجزاء في الدقيقة 22 من عمر المباراة كان على الاقل الهلال خسر بالتلاتة. خاصة وان الجمهور المالي كان كبير في الملعب. الهلال اذا اراد ان يحقق البطولة ..عليه ان لا يخسر. الهلال في مباراة الامس ..اعطانا الثقة ..والامل في التقدم والذهاب بعيدًا في البطولة الافريقية. لا اريد ان اقول الهلال فيه ملامح البطل. لكن دعوني اقول على الاقل ان الهلال اصبح قريباً من دور المجموعات. عدنا إلى مجموعاتنا. نحن بنحب المجموعات. الهلال يريد ان يحافظ على تقدمه الافريقي ..وان يتقدم في التنصيف الافريقي. الاهلي المصري خسر بهدف خارج ارضه. والزمالك كسب بهدف داخل ارضه. والهلال عاد بتعادل ثمين من مالي. اسبوع ونعلن تأهلنا ان شاء الله لدور ال(16). يلا زيدوا الايقاع. وضاعفوا الاستعدادات. وابقوا على جماهير الهلال الوفية قريبة من الهلال. وحافظوا على هذا المجلس في توقيت الانتصارات هذا. على الاقل ..نريد ان يبقى هذا المجلس ..ليحافظ الهلال على استقراره في هذا الموسم. ما تلخبطوا لينا الحكاية. ننتظر التأهل للمجموعات. ثم ننتظر اضافات بسيطة في يونيو. مع استمرار هذا المجلس. لتعود جماهير الهلال إلى المدرجات بقوة وكثافة. فقط هذا ما يحتاجه الهلال لكي يذهب بعيدًا. بل لكي يكون (بطلاً) لهذه النسخة. نصرالدين النابي اثبت انه مدرب كبير. كفى انه يحسن التعامل في الادغال الافريقية. الاهلي شندي ..قدم ايضاً مباراة كبيرة. الاهلي شندي خسر بشرف. الاهلي شندي قادر على التعويض في شندي. خروج المريخ والاهلي عطبرة ...الهلال والاهلي شندي قادران على تعويضه. مساوي عاد متألقاً ..وقدم مباراة كبيرة. سيسه اكد نجاحاته في الطرف اليمين. مباراة الاياب مباراة صعبة. خاصة ان المباراة في استاد الخرطوم ..صاحب الارضية المخيفة. لكن تأكدوا ان ارضية الملعب سوف تكون خصم اكبر على الملعب المالي. على الاقل الهلال تعود في الفترة الاخيرة على اللعب في استاد الخرطوم. يبقى الرهان فقط على جماهير الهلال. مطلوب نفرات جماهيرية كبيرة لمباراة الاياب. الهلال يحتاج ان يلعب مباراة اخرى في استاد الخرطوم قبل مباراة الملعب المالي يوم 9 مارس. نخشى على الهلال من فرحة (اقلامنا). اقول ليكم حاجة. الهلال لم يكن جيد. والهلال اتعادل ضربة حظ. ضربة حظ ..اخير من نصعد ضربة جزاء. انتوا صدقتوا. الهلال في كل يوم ماشي إلى الاحسن. ومن مباراة إلى مباراة ..الهلال سوف يكون افضل. اوراق الهلال الخطيرة ..مازالت بعيدة عن المشاركة. وليد علاءالدين ..ووارغو وصلاح الجزولي وسيمبو. ديل وقت يفتحوا...الخمسين ح تكون من الجرة التانية. مباراة امس ..اهم ما فيها انها اعطتنا الثقة في دفاع الهلال ..واكدت لنا اننا نملك دفاع رهيب. وهجومنا لو فتح ..ما بنرضى بي اقل من سبعة. .... عاجل : مباراة المريخ مع بايرن ميونخ ..بقت زي قصة الراعي الرفض يبيع النعجة.
