* أستاذى الكبير إسماعيل حسن. * وجهو صبوح. * وكلامو طاعم ومملوح. * يلقاك باشا متل الفجر يلوح. * إنسان مهذب. * على خلق وأدب. * صفوة. * ولا غرابة وهو من أطلق على جماهير المريخ لقب الصفوة. * سمعنا تحت تحت أنو اليوم حا تستضيفوا فطومة أختى على شاشة النيلين. * آل أيه. * عشان تناقشوا فى خبر نشر على صفحات صحيفة أستاذى إسماعيل حسن. * الخبر هو مجلس المريخ يفقد الإتصال بهيثم بسبب قفل سيدا لهاتفه. * مع العلم بأن صحيفة أستاذى إسماعيل برضو جابت خبر يفيد بأن النابى زبط ليك إتنين من لاعبى الهلال بكريستالتين زى السم فى الفاشر. * فلماذا لم تستضيف فطومة واحد من ناس الهلال للتحقيق فى الخبر؟؟؟ * ولا اليوم داك فطومة ماقرت صحيفة إسماعيل!!!! * ولا الخبر داك للغطغيط والخبر ده للبلبلة يا فطومة؟؟؟ * دى الحركات يا فطومة البتخلى الشفوت يتخذوا موقف من القناة. * وإذا ده حصل الخسرانة النيلين. * وأسألوا قون. * فطومة. * من يوم بكيتوا فى شارع البلدية سيدا ما حقكم. * ولا دخل لكم فيه. * ولا متذكركم هو. * ومحاولات خلق فتنة بين سيدا والشفوت ما بتجيب حقها. * وما معقول يا فطومة توب من المكوة وشبط بالأقساط ومكياج وتأسيس وتحمل حرارة كشافات الأستديو تطلع كيت. * سيدا تشموهوا قدحة. * والأفضل تغيرى موضوع الحلقة مع سمعه الى ذكريات مانديلا. * خلى المشاهدين يستفيدوا. * وللمعلومية. * أنا ما عارف سيدا قافل تلفونو ولا لأ لكن على الطلاق أمبارح إتكلم معاهو عضو بمجلس الإدارة تلفونياً. * وإستصحبى معاك النقطة دى. * المهم. * بمناسبة مليار الكرامة والوفاء. * كرامة سيدا ووفاء الشفوت. * الموضوع دخل العضم. * والناس إحتفت بالفكرة وإتصلت. * أيها الناس. * السهم خمسين جنيه. * وممكن خمسين نفر يتشاركوا سهم. * وممكن نفر واحد يدفع خمسين سهم. * وعشان نتأكد من العدد الكافى عشان يفتح الباب. * من يريد ان يشارك فى لوح الشرف السيداوى. * يرسل رسالة الى الرقم 0913800449 فيها إسمو وعدد أسهموا. * من الليلة نبدا. * وسيدا يا سيدا. * أيها الناس. * اليوم الجمعة. * والأمة بعد الصلاة مجتمعة. * أمام شاشات رضا. * دايرين نعرف هدف محمد موسى التانى إتلغى ليه؟!!!!!! * دايرين نعرف ضربة الجزاء التى إرتكبها عمر بخيت لم تحتسب لييه؟!!! * دايرين نعرف الحكم لمن إتفنقل قال لى سيدى بيه إيه!!! * معقولة!! * دفع عمر بخيت لاعب الخرطوم كان أعنف من صدمة بطاح لأتوز فى مزلقان من مزلقانات شارع شندى. * أنا لو محل الحكم. * كان أول حاجة شخت بالطوبة تحت رجلين عمر بخيت. * وحسبت خطوات بعد المجنى عليه عن منطقة الحادث. * وإتلفت على عمر بخيت وقلت ليهو. * رخصتك ورخصة البطاح والتأمين. * دى كانت دايرة ليها بوليس حركة عديل كده. * أيها الناس. * ما دام أخطاء التحكيم بالصورة دى. * وما دام زعماء التحكيم لايرون فيها شيئاً معيباً. * على كرة القدم فى هذه البلد السلام. * فكورتنا بتشبه لقمتنا بتشبه قرايتنا بتشبه مرضنا القرضنا بتشبه سياsتنا وسياساتنا وبتشبهنا. * إذا لم يعط كل ذى حق حقه. * تضيع الحقوق وينفرط العقد وتتشتت حبات الأمل. * أيها الناس. * مسرحية كملت موضوعها لذيذ جداً. * هم أهل قرية كملت وحلمهم هو الحصول على حرامى فى بلدهم. * حفوا عشان يلقوا حرامى ما لقوا. * لا بالكاش لا بالأقساط. * ندموا على حظهم العاثر الذى رماهم فى بلد حرامى ما فيها. * وتحت تحت عرفوا انو الحكومة(فى المسرحية) مفروض تديهم عشرين حرامى لكن ما أدتهم. * قالوا فى الحكومة(الفى المسرحية)فى حرامى سرق العشرين حرامى بتاعين قريتهم. * المسرحية جديرة بالمشاهدة. * شخصياً ضحكت لمن مصارينى إتقطعت لما شفت المسرحية فى البروفات. * بلد كاملة حرامى ما فيها!!!! * ديل ما شافوا بلاد ناساً ينطوا حيطانم يوماتى. * بلد السجم دى وين هى؟!!!! * أيها الناس. * كونو إنو هلال كادقلى يجيب فينا قونين ويضيع ضربة جزاء فى آخر دقائق المباراة. * دى كارثة فى حد ذاتها. * فالفرق الكبيرة لا تنهار فى هيك أوقات. * ولكن يظهر ان بالمريخ لاعبين لا يعرفون أنهم يلعبون لفريق كبير. * الرديف يا نااااااس. * فكونا. * أيها الناس. * موضوع سيدا ما تنسوهوا. * 0913800449. * أها. * نجى لى شمارات والى الخرتوم. * أكان شفت يا والينا. * بعد الحصل لينا. * والبحصل كل يوم فينا. * قلنا نحرك روح الشعر الموجودة فينا. * ونسمعك بعض أشعارنا يا والينا. * حكومى جننتينا. * حكومة جرجرتينا. * دعوما جردتينا. * حكومة واعدتينا. * ولما قشرنا وجينا. * حكومة شريتينا. * حكومة مقلبتينا. * رسوما فلستينا. * فى مالنا العام جلبغتينا وغرقتينا. * وغطستينا وشرقتينا. * بى نخريننا شربتينا. * وما رويتينا بس عطشتينا. * وزى أقطاننا نفشتينا. * لا قنعنا وسرحتينا. * ولا شبعنا ودشيتينا. * حكومة إتدشيتينا. * حكومة دهشتينا. سلك كهربا * ننساك كيف ولا التحت شبع ولا الفوق بشبع,,يترع وتانى يلبع. والللللللللى لقاء سللللللللللللللك في السلك - بابكر سلك
