الانبوبة وقت تكون مليانة ...وما مهددة بالقطع ..تستاهل تغني ليها (يا بلدي يا حبوب جلابية وتوب وانبوبة غاز) """""""""""""""""""""""""""" شفع الزمن دا الواحد قبل (الجلحات) بعمل ليه (صلعة)...الصلعات عندهم زي البقالة الما فيه فول """"""""""""""""""""""""""" بتخيل مع دغالة (الضان) الواحد لو ضبح ليه (حمل)..لحمتو تطلع (فول) """""""""""""""""""""""""""" يا بلة جابر ..يا بلة ..(الرباط الصليبي) ما بفطر ليه زول ..ابقى صايم ساكت """""""""""""""""""""""""" . انبوبات الغاز عندها (ادب) براها ..ولها (ثقافة) – وكينونة وحيز..وفهم حايم في المطبخ. . كما (الشلهتة) التى بتكون في اول يوم – الواحد يقعد يصاقر (الساعة) ، وبين الفينة والاخرى يقول ليك : (الليلة اليوم دا مالو ماشي براحة كدا؟). . كل مرة يعاين للساعة ..ويجر (الغطا) على وشو ويرجع ينوم تاني. . يا ريت لو كان بنوم. . مرات الزول بكون (مكاجر) نفسو – هو ما نايم – لكن عامل فيها نايم. . انتوا بتغش في منو؟. . شفتوا ليكم زول بتغاتت على نفسو...في رمضان الغتاتة على النفس ممكن تكون تحصل. . في رمضان الناس ديل بعملوها. . الواحد يعمل ليك فيها نايم – وهو سامع اي حاجة. . الساعة متل (الاسبوع) تقول مربوطة فوق نخلة. . والنخلة رأسها قوي متل (الحجر)..وقت يجيبوا ليها سيرة رمضان بتبقى زي جركانات اللبن. . اول جركانات اللبن بتعمل كدا. . البلد دي اي حاجة فيها جائزة. . الساعة (تلاوي) متل الحمل العنيد في كلمات خالد شقوي (وتلاوي في الحمل العنيد). . الساعة وقت تعكس بتبقى (تكاجر) كدا ...وتلاوي زي ملاوة الحمل. . ملاوة (الضان) الله لا وراكم ليها. . انا بتخيل مع دغالة (الضان) الواحد لو ضبح ليه (حمل)..لحمتو تطلع (فول). . البشوف دغالة الضان ..يقول (الخروف) تطلع فيه كراع (عدس). . دغالة مبالغ فيها. . عليكم الله ما جربتو الزول وقت يكون عندو (خروف) عاوز يدخلو البيت. . قوة رأس مبالغ فيها. . الساعة في اول يوم رمضان بتعمل كدا...بتبقى زي (الحمل). . بتقيف الف احمر. . وكوز الموية حايم من (العطش) في الحوش – ما لاقي ليه زول يشربو - يعاين في (الحلوق) ..ويشهي فيها (الجك). . وسط هذا الكم من (الضيق)...والساعة البتتمحرك – تقوم ابنوبة الغاز تقطع. . دا وقتو. . عليك الله ما تجيب لينا سيرة انبوبة الغاز هنا....(ما تقوم نفسنا ساكت في اول يوم في رمضان). . حاجة شتره شديد – في ناس شتر بدون مناسبة كدا يفتحوا ليك مواضيع (محرجة) ومملة. . بدون اي داعي كدا والناس يا دوب (فطرت) والهلال ما ظاهر ..واحد من الناس القاعدة في البرش ..يقول ليك العيد باقي ليه (29) يوم. . العيد من يقعدوا يعدوا ليه كدا ..ما بجي. . انسوا موضوع العيد دا. . اصبروا واعملوا فيها ما شغالين بالموضوع. . الغريبة – والشيء المدهش جد ...الرجال في اول (10) يوم من رمضان بقعدوا يتكلموا عن العيد..والله العيد جاء – ورمضان خلاص انتهى ...والايام جرت. . هي عليكم الله ايام الزمن دا ايام. . الشافع بكون بلعب في خشم البيت ..بعد شوية يقولوا ليك الشافع داك عمرو بقى (40) سنة. . الشافع فجأة كدا يعمل ليه جلحات. . شفع الزمن دا الواحد قبل (الجلحات) بعمل ليه (صلعة)...الصلعات عندهم زي البقالة الما فيه فول. . الصلعة بقت واقفة في خشم الباب. . هسع عليكم الله في زول بوصفوا ليك من غير ما يقولوا ليك زول عندو (صلعة). . الصلعة ذاتها مفروض ما يوصفوا بيها ..عشان اي زول عندو (صلعة). . لكن الصلعات ذاتها (خشم بيوت). . في صلعة ناصية. . وفي صلعة حدها الركبة. . وفي صلعة (واتس بيه)..يعني صلعة صغيرة. . لكن الشيء الغريب ...الرجال في اول يوم من رمضان بقولوا ليك العيد قرب. . وقت العيد يقرب بالجد ..ينكروا ليك (حطب). . اخر عشرة يوم في رمضان وقت النسوان يبدن يجهزن للعيد ويطالبن بالخبيز والملايات وهدوم العيد والستائر ..ويقولن للرجال العيد جاء ونحن لسه ما عملنا حاجة – الرجال بقوموا ينفصموا في النسوان ..ويقولوا ليهن : (هو وينو العيد؟). . العيد يكون باقى ليه تلاتة ايام ...والرجال ينكروا ليك العيد للنسوان : ( يا ولية العيد لسه – وينك وين العيد)...يا ولية انتي جنيتي هو وينو العيد؟. . رغم ان الرجال ديل في الفطور برة في البرش من اول يوم في رمضان بقعدوا يحسبوا ليك في العيد. . في البرش ينبرشوا ليك (انبراشة) شديدة ..يكبوا ليك (الجرسة) مع الجبنات والشاي. . في البيت يعملوا ليك فيها (ثوابت)..يعملوا فيها (اسود)....العيد ما عاوزنو. . برة يحسبوا ليك العيد بالثانية. . الناس برة بعيدوا من اول يوم في رمضان - واحد يقول ليك والله من يفوت الاسبوع الاول رمضان انتهى. . حليل رمضان. . عندنا زول شفقان من الساعة 12 ظهرا في اول يوم من رمضان بقول ليك : (حليل رمضان)...رمضان اتقسم. . يا زول رمضان باقي ليه 29 يوم ...ونص ...لسه حكاية يا حليل رمضان بقولوها في العشرة ايام الاخيرة. . هسع تلقى في ناس زعلوا وقالوا رمضان السنة دي (29) يوم. . يعني بقن على اليوم. . وواحد تاني من الناس البفطروا برة يقول ليك والله انا مشكلتي اليوم الاول – بعد يفوت اليوم الاول من رمضان بعتبر العيد جاء. . وزول تالت يقول ليك الجماعة ديل صومونا غلط ..نحن مفروض من الخميس الفات نكون صايمين. . دائما مصومننا غلط. . وزول يكون قاعد بعيد ...وتفكيرو اشتر ..من يسمع الكلام دا يقعد يقول ليك : (مورتانيا صايمة من يوم الاربعاء الماضية). . انتوا مورتانيا بتعرفوا ليها شنو؟ ..عشان تتمثلوا بي صيامها الان. . ناس مورتانيا ديل لو صاموا قبل اسبوع ما عندنا معاهم قضية. . اما اغرب زول بقوم ليك من البرش (زعلان)..ويقول ليك ناس ليبيا قالوا ح يتحروا بكرة رؤية هلال شوال – (هلال العيد). . انا اصلو ما شفتوا لي ناس بستعجلوا في الدينا لرؤية الهلال اكتر من ناس ليبيا. . ديل رمضانهم بقدموه...عيدهم قبل كل الناس – شغالين على كيفهم. . زول اخر – يقعد يشرع. . الهلال الشايفو قدامي دا ما هلال رمضان – دا هلال العيد عديل كدا. . ما شاء الله – الهلال دا كبير ...دا هلال 87...هلال كبير عديل كدا. . واضح – نحن كمان هلال رمضان من هلال شوال ما بنعرفو. . هلال شوال بتلقاه بضحك براهو كدا زي الطفل الرضيع البضحك مع المروحة. . هلال رمضان واضح من (ساعتو). . هسع الهلال دا هلال العيد ..ما هلال رمضان. . الجماعة ديل بكونوا اكلو ليهم (شهر) كامل. . ياكلوا ليهم يوم ممكن. . ياكلوا ليهم يومين ممكن. . ناس المحليات ممكن ياكلوا ليهم (اسبوع). . لكن كمان ياكلوا ليهم (شهر). . ديل ياكلوا مال النبي. . اكلوا الولاية ..ما ياكلوا الشهر. . بقت على الهلال يعني. . هسع دا ما موضوعنا – انت ما قلت عاوز تتكلم عن انبوبة الغاز عملتها لينا كلها العيد. . انت يا ود الناس عاوز تثبت لينا العيد من اول يوم في رمضان. . انا شفقة زي دي عمري ما شفتها. . ديل شنو؟..الناس الشفقانة دي. . يتكلموا ليك العيد من اول يوم في رمضان. . من غير سبب – بدون اي ذنب .. انبوبة الغاز تقوم تقطع. . انبوبات الغاز دي عالم براهو. . بدل اتكلم ليكم عن انتخابات الهلال ...والصراعات التى تحدث في الخفاء ..والحفر والضرب تحت الحزام – احسن احدثكم عن (الغاز). . اتخيل انبوبة الغاز تقطع ليك في السخانة دي. . يجيك زول جاري من جوة يقول ليك الانبوبة قطعت. . دا وقت تقطع فيه انبوبة غاز. . الانبوبة ..تقول صايمة معانا. . قايم عليها. . الانبوبة وقت تكون مليانة ...وما مهددة بالقطع ..تستاهل تغني ليها (يا بلدي يا حبوب جلابية وتوب وانبوبة غاز). . والله تستاهل تغني للانبوبة (لو بهمسة). . لكن كمان وقت الانبوبة تقطع ...وفي اول يوم في رمضان – وفي السخانة دي ..إلا تستعين ب (3) تسعات. . عندنا جيرنا وقت انبوبة غازهم تقطع بطقوا الكواريك. . وعندنا جماعة كدا ..(ما في داعي نقول اسمهم)..قدر ما تمشي ليهم يعتذروا ليك ب (والله الغاز قاطع). . كباية شاي ما يعملوها ليك. . بفتكر من هذا المنطلق ..ان الدولة العباسية والدولة الاموية ..كانت مرتاحة عشان كان ما عندهم غاز. . ما في (مرا) في الدولة العباسية بتقول لزوجها انبوبة الغاز قطعت. . ناس زمان كانوا ناس حطب ساكت. . شاي الحطب ذاتو عندو طعم براهو – ما زي شاي البوتجاز – شاي معلب كدا ..وسخانتو سخانة معلبة. . غايتو لو في ناس قطعت انوبة غازهم الان – قطع شك في العيد تاني تقطع ليهم. . الانبوبة وقت تكون شتره ممكن تقطع ليك في توقيت زي دا. . اليوم دا ما يوم قطعة انبوبة غاز. . اليوم دا يوم (بطيخ) ساكت. . ركزوا في (البطيخ)..وخلوا الكلام الكتير. . ملحوظة : عليك الله جايب لينا سيرة البطيخ مالك ...نحن (طماطمية) يتجهجهنا يا ود الناس. هوامش . البرازيل امس اوشكت من الطيران. . صعد المنتخب البرازيلي عبر الضربات الترجيحية. . دي المنتخب السوداني ما بعملها. . غايتو البرازيل السنة دي عندها منتخب ...لو شاركوا بيه في (سيكافا) ما بعمل شيء. . انتوا ما لاحظتوا حاجة. . ما لاحظتوا الايامات دي بقيت ما بشتغل بالمريخ. . ناس المريخ ديل الايامات دي (سطر) كتير عليهم. . بعدين الواحد صايم ...وما فاضي للحاجات دي. . مريخ شنو؟. . ديل جمال الوالي ذاتو (اتزحزح) منهم. . طلع برة. . احسن ليك يا جمال ..ديل لو قعدت معاهم شهر تاني كان عادي جدا تطلع لينا (مقديشو) عاصمة فرنسا. . ديل يفقدوا الواحد المنطق. . يخلوه يزازي في الفاضي – زي شريط الكاسيت المقطوع. . يا جماعة – عاوز اقول ليكم شيء. . رمضان كريم – تصوموا وتفطروا على خير ..وكل يوم وانتوا صايمين. . باكاتنا ديل بصوموا. . وإلا بتموها رباط صليبي. . يا بلة جابر ..يا بلة ..الرباط الصليبي ما بفطر ليه زول ..ابقى صايم ساكت. . .... . عاجل : لو ناس البرازيل ديل بصوموا كنا قلنا اثر فيهم الصيام!!. وإن طال السفر - محمد عبد الماجد صحيفة قوون
