· مرة كنا قاعدين – (دي فيها حاجة)..زينا وزي اي اربعة – خمسة انفار...وقعت فينا (صاقعة)..زي (مجلس اللوردات) دا. · الخمسة ما جاتنا اي حاجة ..إلا الشيخ ود ساد الحجر (شاشة) موبايلو (اتكسرت). · شلنا ..الموبايل ومشينا (سوق الموية) عشان نصلح (الشاشة). · لقينا (الموبايلتي) قاعد – مديّنا ليه (الموبايل)...قال لينا موبايلكم دا مالو عامل كدا (زي دفاع الهلال)؟. · قلنا ليه يا زول اتكلم كويس – انت عاوز تصلحو – وإلا عاوز تدخل معانا في (مفاوضات). · اوعك تكتر الكلام ..وتعمل لينا (نيفاشا) هنا .. شكلك كدا من (صلعتك) الستة ضلف دي (نيفاشا ون) ما بتحلنا منك – ح تعملها لينا نيفاشا 2 - ونيفاشا 3 - ونيفاشا4. · اقعد كويس يا زول ...(الواحد إلا يهرشو كدا). · والله انت (10) نيفاشات ما بتحلنا منك – دحين صلح الموبايل (ساكت). · زولكم مدّ لينا (الموبايل)...قال لينا انا كمان (ساكت) ما بصلحو. · اصلحو (ساكت)..انا فاعل خير. · اي زول يجيب لي موبايلو يقول لي صلحو لي (ساكت)..واحد يقول لي انا قريت معاك وواحد يقول لي قريب زوجتك ..وواحد يقول انا ظروفي صعبة ما بقدر اديك حاجة. · قلنا ليه (ساكت) شنو يا زول؟ – نحن قاصدين بدون كلام يعني – حقك بتأخدوا على دائر المليمة. · عامل كدا زي الموية القاطعة. · قال لينا كمان (الموية القاطعة) عاملة كيف؟. · قلنا ليه زي الزول المفلس. · قال لينا والزول المفلس عامل كيف كمان؟. · قلنا ليه زي الزول المكفوت بونية. · عاوز يقول لينا الزول المكفوت بونية عامل كيف؟..إلا (الشفت) خاف تجيه بونية طايرة ..ونقول ليه الزول المكفوت بونية عامل زيك. · سكت ساي. · الموبايلاتي – تاني رجع قال لينا الموبايل دا – مالوا كدا ؟– الحاصل عليه شنو؟...اتكلمو – اعترفوا – قولوا الحقيقة. · قلنا ليه وقعت فيه (صاقعة)...الموضوع ما محتاج للمحاضرة دي. · لا حول ولا قوة إلا بالله – صاقعة عديل كدا وإلا ضربة اسرائيلية – باقى انتوا يضربوكم (صاوريخ)...تقولوا دي (صاقعة). · يضربوكم (طيارات)...تقولوا دا (بتاع اللحام). · بتاع اللحام. · بتاع اللحام برضو هو الحول مواقف الخرطوم. · بتاع اللحام يا مفترين. · بتاع اللحام هو العمل ازمة في المواصلات. · بتاع اللحام. · بتاع اللحام هو الرفع الدولار. · بتاع اللحام. · بتاع اللحام ...هو العمل ازمة في الغاز. · بتاع اللحام. · بتاع اللحام هو الجاب (اللوردات) ديل كلهم في (لجنة) حقت المريخ. · واقفين كدا زي (القلابات) الصباح في شارع (الانقاذ). · اقل (لورد) فيكم (قندران). · اها يا السيد والي الخرطوم (الموقر) – الخريف على الابواب ...(البلد كلها كبيتها في لجنة اللوردات). · شوف ليك يحرس ليك (المطر). · القروش كلها اتكبت في (الرد كاسل). · الخريف جاء ...والبلد شكلها كدا ح تغرق ..اوعك وقت الخرطوم تعوم كلها تقول لينا (دا بتاع اللحام). · نحن بتاع اللحام بنعرفو. · صلحنا الموبايل وطلعنا ..(عليك الله هسع الموبايل الدخلو هنا شنو؟). · بعد ما نطلع من الموضوع تاني ترجعنا ليه زي (الخبيز). · انا قلت (الخبيز). · والله (الخبيز) ما عندو اي علاقة بالموضوع دا. · العيد باقى ليه (3) شهور. · عشان تكونوا عارفين بس. · المعنى رمضان باقى ليه شهرين. · يا جماعة ...يا شعب يا طيب ...اي زيادة في (السكر)...اعرفوها طوالي من (اللوردات) ديل. · انتوا اول قبيل فاكرين ازمة الغاز من شنو؟. · من (اللوردات) المصنقرين ديل. · واحد جاني بدون مناسبة (منفوش). · قلت ليه يا زول مالك؟..الحاصل شنو؟. · قال لي انت تعال هنا صحي الكلام البنسمعو دا جد. · قلت ليه كلام شنو؟. · قال لي ناس الحكومة ديل فكوا فينا (الضرائب). · قلت ليه (ضرائب) شنو يا زول ؟ – انت جنيت ..الكلام دا بتجيبوا من وين؟. · مالك انت عاوز توقعنا في الغلط. · اوعك تجيب سيرة الضرائب. · ناس الضرائب ديل احسن ناس ...(كمان عندك فيهم كلام). · قلت ليه انا ما عندي فوقهم كلام ...لكن بقولوا .... · قلت ليه بقولوا شنو الناس (الحاقدين) ديل. · اوعك تصدق فيهم كلمة. · اي واحد خلى شغلو ..وقعد يتكلم في (الضرائب). · دا (حقد) بس – ما عندي ليه اي (تسمية) تانية. · زولكم قال لي انت بتقول ما عندك (تسمية) – بعدين يطلع عندك (مربوطة). · قلت ليه : دا ورق (مربوطة) هسع. · لكن انت ما قلت لي الناس بقولوا شنو في (الضرائب)؟. · حاسب وقول كلامك براحة ...عشان (الكلام دا ما يطلع من العمود دا). · المعنى الكلام دا (سر) يا جماعة. · الزول قال لي قالوا الحكومة فكت الضرائب ..عشان اي فريق يشيل ليه (نقطة) من الهلال. · طيرت ليك عيونا – (الكلام وقع لي بارد متل التلج) ...قلت ليه يعني فقدان النقاط دا عمل ضرائبي؟. · عمل منظم يعني. · قال لي بالحيل. · قلت ليه كيف؟. · ايوا – قلت لي كيف ؟– طيب انا ح احكي ليك القصة من طق طق للسلام عليكم. · بس عليك ما تقاطعني. · جدا. · اقفل الموبايل. · جدا. · قفلت الموبايل – زولكم قعد يحكي. · شوف اول تعادل للهلال كان مع منو في الممتاز؟. · مع ناس المريخ. · ابدا. · مع ناس الحكومة ...(خليك متابع). · ناس المريخ دي يقولها ناس مزمل ابوالقاسم ...وسلك واسماعيل حسن. · لكن نحن بنقول ناس الحكومة. · الحكومة شالت (نقطتها) من الهلال. · تفتكر الموضوع انتهى على كدا. · الحصل شنو؟. · تاني تعادل - للهلال كان مع منو؟. · يا ود الناس انا تعادلات الهلال دي السنة دي كتيرة ..ما عارفها ليك. · زمان وقت الهلال يتعادل في الدوري الممتاز كلو (3) مرات بنزعل. · هسع في (11) مباراة الهلال اتعادل (6) مرات. · الهلال دا ..بقى في المباراة الواحدة يتعادل تلات مرات. · عليك الله هسع بتذكر اخر فوز للهلال في الممتاز كان متين؟. · الزول شاف كلامي كتر ..قال لي تعادل الهلال التاني كان مع اتحاد مدني. · قلت ليه اتحاد حداثة. · قال لي ايوا. · اها (النقطة) دي اشرحها لي (الضرائب) شالتها كيف من الهلال. · فهمني – انا ما فاهم اي حاجة....حداثة دا كمان (لورد). · قال لي النقطة الشالها الاتحاد من الهلال دي بتدخل ضمن الحكم الاهلي. · يعني نظام (توطين) وكدا. · قلت ليه رغم من اني ما فهمت حاجة ...لكن عدي....التعادل الثالث كان مع منو؟. · التعادل الثالث كان مع هلال كادوقلي في (المقبرة). · طيب (النقطة) دي الشالها منو من الهلال؟. · شالها والي جنوب كردفان. · معقولة (النقطة) دي شالها احمد هارون. · يعني شالتها (الحكومة) برضو ..تفتكر احمد هارون دا في المعارضة. · الدعم الدعمو احمد هارون لهلال كادوقلي ...لو عملوا في الولاية كان مشاكل الولاية اتحلت ..كان الحروب انتهت. · زي ما (المركز) بدعم في المريخ ...الاطراف كمان بتدعم في هلال كادوقلي ومريخ الفاشر..ونحن في الهلال ضايعين ساكت. · تقول الحكومة دي ما حكومتنا. · الهلال دا مفروض بعد كدا تدعموا (المعارضة)...وقت الحكومة ما عاوزة تدعمو. · اها كدا ..نقطة شالها المريخ ..(المعني شالتها حكومة الخرطوم ووزير رياضته واتحاد الكرة)..ونقطة شالها اتحاد مدني ...(المعني شالها الحكم اهلي)..ونقطة شالها هلال كادوقلي (المعنى شالتها حكومة جنوب كردفان). · نخش على التعادل الرابع ..وإلا امشي اشرب موية وارجع ليكم. · نخش على التعادل الرابع. · التعادل الرابع كان مع منو؟. · التعادل الرابع كان مع الاهلي الخرطوم. · بس يلا ورينا (النقطة) دي شالتها الحكومة برضو كيف؟. · بوريك...اصبر ..تفتكر انا بكتب في العمود دا ..وبنظر من الصباح ..وما ح اوريك. · الاهلي الخرطوم دا ..البرعاهو منو؟. · ما تقول لي جمال الوالي (الحكومة المصغرة). · ابدا ...جمال الوالي دا كان زمان...الوالي هسع (اتقشف)..جاب ليه (لوردات) عشان الدفع. · الاهلي الخرطوم في الموسم دا تحت رعاية (الجيش). · الجيش برعي في الاهلي ...(ما عاوز اقول اي حاجة). · ولا عاوز اعلق...(الكلام ممنوع). · بس عاوز اقول الجيش يعني الحكومة. · المعنى (النقطة) دي برضو شالتها الحكومة من الهلال. · شفت الهلال دا فاكين ليه (الحكومات) دي كيف؟. · شيء ولاة ..وشيء شركات حكومية ..وشيء جيش ..والهلال (محافظ) ما قاعد يدعمو. · معتمد ساكت ما بدعمو. · نخش على التعادل الكم؟. · التعادل الخامس ...والله (تعادلات) الهلال بقت كتيرة كترة ..تلخبط الزول. · الواحد لو ما مذاكر ما بعرفهن. · التعادل الخامس كان مع (الامل). · الامل شال نقطة ...والله ناس الحديد والنار ديل يستاهلوا. · لكن برضو (النقطة) دي شالتها الحكومة. · قول لي كيف؟. · كيف؟. · ادارة نادي الامل دي كلها (مؤتمر وطني)...رئيس النادي جمال حسن سعيد...والباقى معروف. · يعني (النقطة) شالتها الحكومة ...حلال عليكم. · ما في مشكلة. · نجي للتعادل السادس. · ما تفتح لي (خشمك) كدا زي يوم الاحد ...الناس كلها فاتحة خشمها. · التعادل السادس كان امام الخرطوم 3. · الخرطوم 3 شنو دا كان زمان – هسع الموضوع بقى واضح ...الخرطوم الوطني. · (الوطني) دي افتكر واضحة. · واضحة يا اخوى. · يعني النقطة دي الشالها منو؟. · شالوها ناس (الامن) ذاتهم. · شفتوا الهلال دا ...بقي مستباح كيف؟. · هسع (العسقلاني) دا (لوح) تلج بجيبو للهلال. · العسقلاني خليه – هاشم ملاح غير (التصريحات) لاقين منو شنو؟. · ناس المريخ يشيلوا نقطتهم ...(الحكومة عاوزة كدا). · ناس الجزيرة يشيلوا نقطتهم. · ناس نهر النيل يشيلوا نقطتهم. · ناس جنوب كردفان يشيلوا نقطتهم. · ناس الجيش يشيلوا نقطتهم. · ناس الامن يشيلوا نقطتهم. · وبعد دا عاوزين الهلال يغلب. · تصوروا بعد دا نحن طيبين خلاص ..نقعد (نكورك) في مساوي ..والمعز وخليفة. · هو خليفة قاعد يلعب متين؟ – عشان تقدوا تكوركوا فيه. · عاوزين تكوركوا كوركوا في (الباشا). · في بلة جابر ..البجيب في الاهداف العكسية. · لكن خليفة لا. · اذن نصل للخلاصة ...نصل الي ان (الحكومة) جردت الهلال من (12) نقطة. · يعني الهلال الاسبوع القادم لو لاعب مع (لجنة الشعبية)...بتشيل منو (نقطة). · الحكومة ما بتخلي (نقطتها). · (النظام) عاوز كدا. · بمناسبة (النظام) دا – عاوز اعرج بيكم شوية. · هذه الايام على خشبة مسرح قاعة الصداقة مسرحية (النظام يريد). · يتجلي في المسرحية جمال عبدالرحمن ومحمد نعيم سعد وفيصل سعد وسامية عبدالله. · المسرحية تناقش (الربيع العربي) بفهم سوداني ساخر ...اذ تصل حكومة المسرحية الي ان تغيّر (الشعب) بدل ما تغير (النظام). · شاهدت المسرحية في القاعة قبل ايام ..وعرفت مني ولي كدا ..النظام بريد شنو؟. · النظام جاب ليه (17) لورد في المريخ ...رصاهم لينا زي (المجلس التشريعي). · تفتكروا بريد شنو؟. · اظن الحكاية بقت واضحة. · والله انا خايف (البرلمان) ..يقوم يناقش الاسبوع القادم (خطة الكوكي). · ويقوم يعترض على عدم اعطاء سوداني لنجومية المباراة لهيثم مصطفى. · انت يا سلك ..تعال هنا (دي عرفت من متين؟). · كمان بقيتوا تزعلوا لي (هيثم مصطفى). · انتوا صدقتوا وإلا شنو يا (سلك)؟. · شوفوا (بلكم) وين؟. · بلكم (المعني بلة جابر). · خلاص نكرتوا بلة جابر وموسى الزومة وضفر – وقعدتوا تزعلوا عشان (هيثم مصطفى). · والله (الزعل) عندكم. · زعلكم دا ذكرني ليك بي (واحد) ..خطب ليه (واحدة)...يعني ح يكون خطب ليه (فرقة). · المهم الزول دا كان (حريف) شديد...كل ما يجي عيد ميلاد خطيبتو ..قبل اسبوع من (عيد الميلاد) بعمل ليك فيها زعلان منها. · بقفل تلفونو..وبقول ليها ..اسمعي انا وقت ازعل ..ما عاوز كلام وما عاوز (هدايا). · بقطعو معاه عديل كدا. · رصيد ما برسلو ليها. · وقت عيد الميلاد ينتهي ...برجع ليها بي (كيس برتقال). · كيس البرتقال كلو ب (9) جنيه. · والموضوع ينتهي على كدا. · انتوا يا سلك (زعلكم) دي هسع (زعل) حنشكة ساكت – حليل زمن المريخ. · نسيت (مجدي ام بدة). · هسع بقتوا (تزعلوا)..وتمشوا (الحدايق) كمان. · اللوردات ديل بخربوا ليكم (طبعكم). · تاني ما بتستحلموا لينا (السخانة) دي. · الشيء الغريب ..وغريب بالجد ..قالوا جماهير المريخ حملت هيثم مصطفى بعد تألقه في مباراة النيل. · جمهور المريخ حمل هيثم مصطفى بعد (17) سنة في الهلال. · بعد شتائم ..وانتقادات ..وهجوم ..وكتابات ..جاء جمهور المريخ ليحمل هيثم مصطفى. · انتوا كنتوا وين يا جماعة؟. · دائما تأتوا متأخرين. · بتفهموها متأخرة. · وكمان بتزعلوا. · يا جماعة بعد (شيلة) هيثم مصطفى ..والزعل من اجلو ....ما تنسوا الزول القاعد في (الكنبة) داك ..ونفسياتو في الواطة. · ما تنسوا السلطان (العجب). · ادوه (شبّ) ساكت. · صفقوا ليه ..لو كان (تقيل). · ارفعوا ليه ايدكم من بعيد. · خلوا دا كلو ..ازعلوا ليه (شوية). · شنو عملوتها لينا كلها (هيثم مصطفى). · ناس (الباشا) ما برضوا من الموضوع دا. · ملحوظة : العجب قاعد (15) سنة – ما في زول زعل ليه...يزعل ويرجع براهو. هوامش · انتوا (كلتشي) دا مالو؟. · الزول انتوا بتدوه (شيكات) الي الان. · غايتو (التقشف) الدخل في كلتشي في فترة عصام الحاج ...تاني لي يوم الدين ما يطلع. · بيني وبينكم (تقشف) عصام الحاج ...عاوز ليه (51) لورد. · (17) لورد ..ما بقدروا يشيلوا اثار تقشف عصام الحاج. · تقشف عصام الحاج وصل حتى لفاتورة الكهرباء. · نادي المريخ قاطع (3) يوم. · في تقشف في الدنيا وصل للمستوى دا. · ايام عصام الحاج – قالوا ليك (كلتشي) من اول (5) دقايق برفع ايدو للتغيير. · فتة العدس ما بتلعبو اكتر من (5) دقائق. · بلة جابر بعد الهدف العكسي ..قالوا ليه : دا شنو البتعمل فيه دا؟. · قال ليهم : يا جماعة انا موية الفول خلتني اشوف (اكرم الهادي سليم) زي (ابوعشرين) حارس النسور. · ضفر بقى لي زي (معاوية الامين). · غايتو لجنة عصام الحاج ديك لو استمرت شوية ...كان بلة جابر ح يطلع هداف الدوري. · كان بفوت (تراوري). · ترواري ذاتو بقى يجينا بي (حلاقتو) دي ما شايفين منو اي حاجة. · لكن اخير من (موانزا). · موانزا داك عندو (شعر)...في المهاجم الاساسي ما في. · خسارة (شعر) ساكت. · الزول دا لو عاوز يقعد في (الكنبة)...احلقو ليه (صلعة) زي صلعة الطاهر سادومبا. · ما معقول الطاهر سادومبا (باك)..وبشارك اساسي بي (صلعتو)..وموانزا بي (شعرو) قاعد برة. · الظاهر الكوكي حسب (صلعتو) قاعد يتعاطف مع زملاء (الصلع). · الزميل صلعة الطاهر سادومبا. · بالمناسبة تاني الطاهر سادومبا دا ما بطلع من التشكيلة إلا يجيب ليه (هدف عكسي) او يقوم ليه شعر. · لكن طالما كان الطاهر سادومبا بي صلعتو دي ..وما بسجل في شبكتو ...يبقى تاني ما ح نشوف بلة جابر. · يا هلالاب انتبهوا. · يا ناس اهلي مدني اصحوا. · قالوا وفد المقدمة (اللوردي) سافر مدني. · قفلوا تلفوناتكم. · تلفونات اللورادت ديل واصلة. · كلمناكم نحن – ما تعملوا لي فيها ما عارفين. · قالوا لجنة اللوردات فكرت تعمل نادي المريخ (مول). · يعني بلة جابر ح يكون (كاشير). · موسى الزومة ح يحرس السكر برة. · ضفر ح يقيف في التلاجات. · فيصل العجب في فرن الفطائر. · احسن ليكم (مول). · مول مضمون ولا فريق مجهجه. · عاجل : لو عاوزين استثمار مضمون سفروا مرتضي كبير وموانزا وسليمانو ومكسيم للدهب....لو جابوا ليكم (جرام)...ممكن مصطفى عثمان اسماعيل يعملها ليكم (كيلو)...موش هو وزير الاستثمار.