شتاء الزمن دا اكتر حاجة تعملها ليه (تقفل المروحة) """""""""""""""""""""""""" مرات في حاجات بتدخل ساكت – بتلّب في (السطر) براها..متل حرامي الغسيل """""""""""""""""""" الزول العندو (صلعة) قال والله عملية والي الدين دي نحن في عالم الفضاء ما قابلتنا """""""""""""""""""""""""""""""""" ما معقول درجة الحرارة تتجاوز الخمسين ..والمذيعة تقعد تتضحك لينا وتقول لينا درجة الحرارة في الخرطوم 32 درجة """""""""""""""""""""""""""""""""" . السودان فيه اربعة فصول. . الصيف والصيف والصيف والصيف. . الربيع قنعنا منو من الاستقلال. . ما شفنا لينا اي (ربيع) ..إلّا في كتب المطالعة وقصائد المحفوظات الكانوا بغشونا بيها زمان. . ونحن نشيل ونصدق في (الربيع). . عليكم امان الله (دقيقة) ربيع ما شفناها. . كبرنا شوية...(الشتاء) راح فيها. . زمان كان في (سقط). . زمن (البرد) البخليك ما تعرف (نخريك)...من نخرين الزول الجنبك. . ايديك لو حفزوك ما بتطلعها من جيوبك. . برد – هو برد نصاح ...ترجف متل (الباك) الما بعرف يلعب تحت الاضواء الكاشفة – وفجأة كدا لقى نفسو تحت كشافات الهلال وقدام جمهور الهلال. . زمان كان في سقط عجيب. . كانت في فنائل سقط. . وكانت في سيوترات سقط. . وبطانيات. . هسع الحاجات دي كلها اختفت بي (سقطها). . في زول شاف ليه في العشر سنوات الاخيرة زول لابس ليه فانلة سقط. . او زول بتغطي ليه ب (بطانية). . او زول شايل ليه (بطارية) وحايم في الحلة. . الشتاء في البلد دي بقى اسبوع واحد ..ما بستاهل ليه الواحد يعمل ليه فانلة سقط. . شتاء الزمن دا اكتر حاجة تعملها ليه (تقفل المروحة). . الصيف زحف على الشتاء. . بقينا لا ربيع ولا شتاء. . صيف صر . . المشكلة الجديدة ...الخريف ذاتو بقى يداخل علينا في الصيف. . كمان خريف الايامات دي بقى فيه جنس (سخانة). . اخير سخانة الصيف. . تتكلم وإلّا تقول ليك حاجة ..يقولوا ليك (البحر) زايد الليلة. . البحر لمن يزيد بتسخن كدا ..طيب لمن تزيد (اللحمة) يحصل شنو؟. . كدي اقعدوا فكروا لي وارجعوا لي بي تلفون. . ما بعيد عن دا. . ليس هناك (ضيق) اكثر من ان تحضر النشرة الجوية ثم تخرج منها بقناعة تامة ان درجة الحرارة التى اعلنوا عنها في النشرة الجوية غير حقيقية. . وانك تحتاج الى ان تضرب تلك الدرجة التى اعلن عنها في النشرة في اربعة لتصل الى درجة الحرارة الحقيقية. . ما يقدموه لنا في النشرات الجوية عن درجات الحرارة يعطيني احساس ان السودان يعيش في اجواء (ربيعية). . فدرجة الحرارة التى يقدموها لنا في النشرة درجة حرارة فصل الربيع. . ما معقول درجة الحرارة تتجاوز الخمسين ..والمذيعة تقعد تتضحك لينا وتقول لينا درجة الحرارة في الخرطوم 32 درجة. . لا بد ان الاسبان بحسدونا على تلك الدرجة التى يقدموها لنا في النشرة الجوية. . دي درجة نموذجية. . نشرتكم الجوية زي سياستكم. . كلامكم سمح – لكن عواصفكم تقول يا غربتي. . الغربة ذاتها الدخلها هنا شنو؟. . مرات في حاجات بتدخل ساكت – بتلب في (السطر) براها..متل حرامي الغسيل. . حرامي الغسيل ذاتو اتلاشى من الوجود. . غسيل شنو مع الموبايلات دا؟. . اسهل تلطش ليك (موبايل) في الموقف ...بدل ما تتلب ليك في بيت في السخانة دي عشان تسرق ليك (تي شيرتي) وتجي طالع. . المجازفة ذاتها ما مضمونة. . يمكن يلم فيك كلب ..يعضيك ..او يلموا فيك شباب الحلة. . هذه المخاطر جعلت اللصوص يتجهوا نحو مواقف المواصلات ..لا كلب لا تُلب. . زمان وقت الموبايلات كانت جديدة. . قبل ما الحرامي يصل الي تقنية قفل الموبايل وقت يسرقو. . واحد سرق ليه موبايل في حافلة. . الزول السرقو منو الموبايل شال تلفون الزول الجنبو وضرب في رقمو. . الحرامي لطش الموبايل وراكب في الحافلة ..وما قفل الموبايل كمان...(عينو قوية). . التلفون ضرب ليك في جيب الحرامي. . نفس النغمة. . صاحب الموبايل اتحرك هاجما على (الحرامي). . الحرامي ثبتو ليك قال ليه لو قلت ليك (الجيب) البضرب فيه الموبايل دا ما جيبي بتصدق. . صاحب الموبايل عاوز يتظارف قبل ما يضرب ..قال ليه طيب يكون (جيب) منو؟. . الحرامي قال ليه (جيب) اي واحد عندو مشكلة في البيت. . الدخل مشكلة البيت هنا شنو؟..في سرقة الموبايلات دي. . الاستادات برضو زمان كانت بتحصل فيها سرقات شديدة للموبايلات. . الواحد يكون داخل الاستاد وماسك موبايلو في ايدو ..وقابض باليد التانية جيبو. . زمن الزحمة كانت في المباريات. . نحن طبعا في استاد الهلال ما كان عندنا حاجات زي دي بتحصل. . لكن بتحصل لينا الحاجات دي وقت نمشي استادات تانية. . هسع انا جبت سيرة لي استاد المريخ لو ما ساكت. . براكم تشيلوا وتردموا في الظنون. . مرة مشينا لينا مباراة للهلال. . جماهير غفيرة. . خلق حد البصر. . اي زول كان تلاقيه بتعرفو او ما بتعرفو بقول ليك ماشي الكورة. . الناس كلها بتدخل الكورة. . كان في متعة حقيقية في الاستادات ...ونسة ..ولعب وامسيات جميلة كدا. . زمن والي الدين ...المباراة كان لو ما دخلت ليها قبل ساعة كاملة من بدايتها بفوتك منها (4) اهداف. . والي الدين كان غزال شارد ..خفة ..وحرفنة ..وغزلنة كدا – حكاية ما معقولة. . بتحرك في الملعب كأنو بتحرك في بيانو. . زي كأنو شايل ليه (سماعة) وحايم على الناس. . قبل ايام عرضت قناة النيلين هدف لوالي الدين اظنه في الخرطوم الوطني او الاهلي الخرطوم لا اعرف (الاتنين شعارهم واحد). . لكن اقرب الى ان يكون هدف والي الدين ذلك في الاهلي الخرطوم حسب ما وثق له من اهداف. . والي الدين استلم كورة على صدره وهو في رأس خط 18 ..ضهرو كان على المرمي. . والي الدين استلم الكورة المعكوسة في صدرو في كسر من الثانية ...وحواليه كان اكثر من (5) مدافعين. . ما فهموا اي حاجة. . ما عارفين شيء. . في لحظة استلم والي الدين للكورة في صدرو ..الاستاد كلو وقف على حيلو. . الزول دا عاوز يعمل شنو؟. . الزول القاعد ساي في الاستاد قعد يطقطق في اصابعينو. . والزول البخيل شديد ..كورك لي ست الشاي وقال ليها جيبي ليك (5) كبابي شاي لبن. . شرب الناس على شمالو والناس على يمينو. . كل دا في لحظة استلام والي الدين للكورة بي صدرو. . قبل ما يقوم يعمل ليه نظرية براهو كدا في كتب الهندسة مافي ..ويلف لفة كاملة. . وهو في الجو في شكل (ارتوزاي)..او ما (ارتوازي) انا ما عارف. . انا ما فاهم اي حاجة. . ما عارف الزول دا عمل شنو؟. . غايتو عمل حركة (جوية) كدا نحن الي الان ما وقعت لينا. . شربنا بي سببها (15) كباية شاي ..و(7) كبابي قهوة..عشان تقع لينا. . الزول العندو (صلعة) قال والله عملية والي الدين دي نحن في عالم الفضاء ما قابلتنا. . الاستاد تاني وقف. . الزول دا عاوز يعمل شنو؟. . يا ربي عاوز يطلع الفانلة. . عاوز يركب اللمبة. . في اثناء هذا (الدوار) الارتجازي...او اللا ارتجازي..ما عارف. . قلت ليكم ما تسألوني..انا ما عارف حاجة ..ما تقعدوا تضايقوني في اي كلمة. . والي الدين دا عمل عمايل اصلو ما قدرنا نصل لي كنهها. . يمين نلقى (والي الدين) في الايامات دي ..تاني مريخابي يحوم في البلد دي مافي. . والي الدين مشكلتو ظهر قبل (الواتس آب)..لو جانا في زمنا دا ..يمين (والي) المريخ يروح فيها ساكت. . اها في الاثناء دا. . والناس (مشهقة) فوق في الكشافات. . الوقع منو (ضرس)..وقع. . الوقع منو (جك) موية وقع. . الوقع منو (سن) وقع. . الوقع منو (حنك) كامل وقع. . دحين انا قلت ليكم والي الدين محمد عبدالله (الله يرحمه ويغفر ليه) كان بستعمل (الشولات) وقت يمر من المدافعين. . عشان المدافعين ما يتلخبطوا...كان كل ما يمر ليه من مدافع بستعمل ليه (شولة). . محسن سيد دا وقت كان بلعب في الموردة ...والي الدين استعمل ليه (نقطة) عديل كدا. . محسن سيد رجع الكورة قصيرة ..ما عارف الشباح دا قاعد فوق رأي. . والي الدين لمح ليك (القطة). . انا قلت (قطة). . معليش برضو دخلت ساكت في السطر الفوق دا. . يمكن عشان انا قاعد بكتب كدا قام في قطة جات تتعرك في اقدامي. . دا ما موضعنا. . ولا عاوز افتح ليكم في (القطة) دي. . لكن عاوز اقول ليكم والي الدين (الله يرحمه) عمل ليك عملية في محسن سيد دا ..خلى ليك محسن سيد دا كل ما يلبس ليه (فانلة) يقول ليك الفانلة دي ضيقة عليّ. . لمن اتوهم ليك بالفنايل. . بقى يقول ليك الفانلة دي بغلب بيها. . والفانلة دي بتفاءل بيها. . يا زول دفاعك البتلعب بيه دا لو جبت ليه (21) فانلة ما بثبت. . نرجع لي والي الدين عندما عمل (مرتكز) في الجو (الفضائي) وحول ليك الكورة بلعبة خليفية في المرمي...الناس قعدت تكورك. . هدف – والله في كأس العالم القايمين فيه الناس ديل ما شفناه. . نحن ساكت رايحين ساكت. . هدف طوالي بعدو بتغني (يا اعز الناس حبايبك نحن زيدنا قليل حنان). . اقيف هنا ..على ان يكون الوعد بيناتنا في ونسات تانية ح تكون عن والي الدين ومنصور بشير تنقا. . اصبروا بس انتوا. . العيد لسه. . .... . ملحوظة : هسع العيد الدخلو هنا شنو؟. هوامش . انتوا عاوزين الجد. . مستوى الهلال امام الاتحاد كان فيه شوية فوضى. . لكن نحن بنزيد الحكاية (نفخ). . والله ما قصرتوا في رمضان دا. . بنتمها (مجاملات). . لكن الحقيقة بنقولها ليكم. . اصلو ما بنغشكم. . مع هذا املنا كبير في ان يعود الهلال من (الكنغو) متصدرا لمجموعته ان شاءالله. . ما عندنا شك في ذلك. . هلالنا دا مهم يكون مستواه ..تبقى ثقتنا فيه عريضة. . هلالنا دا ..ما بنشارك بيه في (سيكافا). . سيكافا منو؟. . هسع انا وقت اكتب (سيكافا) بمشي اغسل ايدي سبع مرات وارجع اكمل العمود. . لكن تاني كان قمت ما برجع. . برسل العمود طوالي. . نسيت اقول ليكم يا جماعة عنوان العمود مقطع من قصيدة تركية. . ما في مساحة عشان اجيب ليكم سيرتها وقصة المطقع. . تموا الفهم براكم..انا كدا عملت العليّ. . .... . عاجل : الواحد وقت يكون (عطشان) يشوف ليك جبرة دي زي الابيض...حاجة ما هنا. وإن طال السفر - محمد عبد الماجد صحيفة قوون
