تعامل المريخاب مع هيثم مصطفى ...مازال تعامل تسيطر عليه (الخلعة) والرهبة..فرشة الاسنان الجديدة ظاهرة ...ما محتاجة لي علامة ..وبدلا من ان يدخل هيثم مصطفى في اجواء المريخ ...استطاع هيثم مصطفى بشخصيته القوية ونجوميته الكبيرة ان يدخل المريخ كله في اجواء هيثم مصطفى ..بما في ذلك (ناس جريدة الزعيم). هسع في المريخ دا كلو ...في زول بجيب سيرة الوالي.
غايتو عصام الحاج دا ...مرات بفكر صاح.
شال ليك (جمال الوالي) نهائي من الصورة.
بابكر سلك بقى زي الانجليزي السايق ليه (عجلة)..قايم سداري...ما فاضل لي سلك إلا يكتب في فانلتو (114).
في خواجات اهم حاجة عندهم في العجلة (المنفاخ).
المنفاخ ...قبل العجلة.
اما معاوية الجاك ..فهو من شدة فقدانه لهويته (الحمراء)...بقى يمشي يفتش في نفسو في مريخ الفاشر.
طبعا مريخ ام درمان بعد ما سجل هيثم مصطفى ...بقى لا مريخ ...ولا حاجة..يمكن يكونوا بقوا موردة ...عباسية ...اي شيء تانية غير (المريخ).
هيثم مصطفى بقنع هسع في مجلس الشوري بتاع المريخ ...عشان يغيروا الشعار...(النجمة) دي قال ليهم بدل ما نلبسها في صدورنا ...احسن نلبسها في غرفة الملابس ونطلعها ...ما في داعي للفضائح.
انا ما عارفكم العاجبكم في (النجمة) شنو ؟....عشان تبقوها شعار.
هيثم دا لو قعد معاكم شهر تاني ...بقنعكم تشيلوا (النجمة) دي من الشعار.
حكاية هيثم مصطفى في المريخ ....بتذكرني ليك بحكاية (الروسي)...النزل ليه في (قرية).
ناس القرية ...ما عرفوا يتصرفوا كيف مع (الروسي) دا ..بقوا يدخلوا ويطلعوا زي التقول عندهم لاعب بالع ليه (لسان).
زي الفول العاوزين يصلحوه...تقلب الدنيا قلب عشان تلقى ليك (قزازة) تكسر الفول.
قالوا ...نحن (الروسي) دا نقول ليه شنو؟...نعمل ليه ايه؟....هو ذاتو يتعاملوا معاه كيف ؟...(النصيبة) دا.
بعدين الموبايل في (روسيا) بحشوه (طحنية) ...ما كهرباء.
يا زول انت الليلة (الطحنية) دي طلعتها لينا من وين؟..مالك عاوز تغليها لينا.
هسع يسمعوك بتتكلم عن (الطحنية)...يقوموا يغلوها ...ويقولوا الزول دا ما بتكلم ساكت عن (الطحنية).
اكيد فيها (سر) نحن ما عارفنو.
اخر حاجة في واحد ..مفتح ...قال ليهم والله (الروسي) دا بي اخوي ..واخوك ..ما بنقدر عليه..(عامل عيونو كدا زي شباك الفحص).
طيب يا اخوي ..يا مفتح ..(الروسي) دا نعمل ليه شنو؟.
قال ليهم ...الروسي دا جيبوا ليه (كوتشينة)...وخلونا (نسيكو)...غير كدا ...ما عندنا ليه أي فهم.
الجماعة ..ختوا ايدهم في رأسهم ...وقالوا ليه : والله كلامك دا احسن كلام ..بعدين الزول دا ما عندنا ليه غير (الكوتشينة)...يمين نجيب ليه (عنب)..يطقطقنا ليك زي (النبق).
طبعا (النبق) ما عندو أي دخل بالحتة دي ...جبتوا ليكم ساكت.
قلت اغير ليكم من (الطحنية).
هسع الحكومة ...لو عاوز تتطقطق ناس الاممالمتحدة ديل ..إلا تلعب معاهم (كوتشنية)...ما عندكم قدرة ومنطق اكتر من كدا.
عشان كدا ...اشتغلوا معاهم الشغل الاشتغلوه الجماعة ديل مع (الروسي) دا.
خلينا هسع مع ناس المريخ.
الجماعة اول ما هيثم مصطفى ...مشي المريخ ...عملوا ليه (مهرجان).
مسكين العجب ..بلعب 15 سنة ...صورة ما صوروها ليه في المهرجان.
الغريب قالوا شفع المدارس دخلوا استاد المريخ بي (شنط المدرسة).
من المدرسة للاستاد.
الشيء المحيرني قالوا ليك في جماعة (داخوا) عديل كدا ...وقت هيثم مصطفى لعب ليه (تمريرة) بالكعب.
يا جماعة اتقلوا شوية ...(العجب) كلام دا ما بقبلو.
المسكاكين ديل ...زمان كانوا قدر حالهم ...(قدر ظروفك)...كانوا بفرحوا بي (مرجيحة) العجب.
هسع اسماعيل حسن شخصيا ...بقى ما بجيب سيرة للمرجيحة دي.
انتوا موش زمان قلتوا الحكاية دي ...حكاية فنانة ...وجميلة ..ورائعة.
هسع نكرتوها (حطب) ليه؟.
والله ناس ميرغني المامون ومبارك حسن جمعة ..الله يرحمهما ...لو كانوا حاضرين الزمن دا ...كانوا طلعوا ليهم (شريط) فيه 7 اغاني عشان (دوختكم) دي.
تدوخوا يا سلك ....طيب انتوا بي (دوختكم) دي ...خليتوا شنوا ....للهنود.
دي الهنود ما سبقوكم عليها.
ذكرتوني واحد ...مشي يخطب.
عاوز يعرس.
دخل على ابو العروس ...غلبوا يتكلم.
الكلام طار من رأسو.
عاوز شنو؟....ما عرف.
يقول شنو؟...ما عرف.
مسك ليك (الجو) دا من الخريف ...لمن وصلوا ليك (كتاحة) اول امبارح.
وبرضو ما لقى ليه طريقة عشان يخش في الموضوع.
مسك ليك السكة حديد ...دي من سنة 69 ...الي ان وصل ليك محطة الخرطوم القديمة.
ما خلي حاجة.
وبرضو ما لقي ليه (مدخل) يعرج بيه على الموضوع الاساسي.
مسك ليك البنطونات دي بنطون ..بنطون ..بنطون شندي ..بنطون رفاعة ..بنطون توتي ..بنطون ام طيور.
لكن برضو ما عرف ...يعرج على الموضوع الاساسي ...صاحبو في النهاية زهج ..(وسوسو) ..وقال ليه ...انت لو (ايد) البنت دي شايفها كتيرة عليك ...اطلب شوية ....شوية ...اطلب (اصبع) ..وبعد كدا ادخل في (اليد).
زولكم برضو ...الكلام غلبو.
قال ليه ...اقول ليك حاجة ...انت عمك دا يا جيب ليه (كوتشينة) زي الروسي ..وطقطقو ....يا كمان (دوخ) ليه زي ناس المريخ.
حلنا عليك الله.
عليكم الله يا ناس المريخ ..هسع البشوف فصاحكتم دي ...(وكاستكم الجوية) الوهمية ديك ...وطابقكم التاني دا ...بصدق انكم ممكن (تدوخوا) في تمريرة هيثم مصطفى.
انتوا اتاريكم ...كان كان بلة جابر دا ...كاتلكم ساكت كدا.
كان كاتلكم (مغصة) بس.
بلة جابر دا ..بذكرني ليك ...الزول البرسلوه للطابونة عشان يجيب ليه عشرين رغيفة.