الحب الفاشل.. الزواج الفاشل.. نحن قاعدين نبهت الزواج والحب.. ونصفهم بالفشل.. في حين أن الفشل فشل الطرفين الزوج والزوجة الحبيب والحبيبة.. يعني مافي داعي الناس تفشل وترمي الفشل فوق الزواج أو الحب "زواج فاشل و حب فاشل".. الطرفين بي شوية مباصرة ممكن الزواج يستمر وكذلك الحب.. والطرفين بشوية قوة راس ومكاواة ومعاندة ممكن ما يستمر.. الحب مسكين قاااااعد وماسك خشمو عليهو.. تقول ليهو قبل كدي يقبل قبل جاي يقبل.. الواحد تشوفو مطرم وزهيجان تسأل يقولو ليك"خليهو مسيكين مارق من تجربة زواج فاشل".. طوالي ختينا الفشل فوق الزواج.. مع اننا لو اتحرينا نلقى الفشل من الزوج أو من الزوجة.. أو كليهما.. وبرضو الحب.. شرحو.. لكنه اقل ضرر.. الحب القايمين فيهو الناس الليمات دي.. حب محاكاة.. فلان بحب انا لازم اسعى لي واحدة احبها.. وفلان دا احسن مني بشنو؟.. يحب وانا قاعد ساكت.. .ثم يحب ويكون عندو جكس مع الجكاسة و تراه يسرح مع الفنانين ويردد معهم اغاني العذاب (الحب عذاب في كسلا).. و(عذبني وتنفنن).. والعاشق حياتو عذاب.. وعذاااااااااب يا مُزة.. والحكاية كلها في النهاية ونسة.. عشان يتونس مع المتونسين.. كان سلفنا من الحبيّبة يسمي الحب (الغي).. فلان غاوي فلانة.. وفلانة غاوياهو علا مقطعاهو في جوفها.. وأن خلاص جسرت ومرقت من الليد تقعد تزغرد، لو عرض في حفلة.. ثم سُمي الريدة وما زال.. ثم الحب وكانت هناك أسماء جانبية زي الفلم، الموضوع.. عندما كانت شوفة الحبيب عزيزة ، وغاية المنى، يجي واحد فرحان ويضحك سنيّن سنيّن.. وقد تصل ضحكته إلى ضرسيّن ضرسيّن ويسرُ صديقه المقرب بأن "الليلة ما شفت ليك الفلم.. كان بيغرف في البلاعة" كان غرف البلاعة وسيلة وصال معترف بها وتجد احترام شديد وتقدير من الحبايب.. ثم أخيرا حسب علمي الجكيّس.. قديم قد يحب أحدهم احداهن وتتزوج هذه الاحداهن من ابن عمها.. ودا هنا ياخد شاكوش.. يقطّعو في جوفو ويسكت عليهو ولو كتّر وبقى قليل أدب يقعد يدندن "يا الحرموني شوفتك".. يتقلب الزمان وتتعدد الاسباب والشاكوش واحد.. والشاكوش لا يعترف بالزمانكية.. فهو متواجد في كل الثقافات وفي كل الازمان.. مباري اخوهو الحب.. "والغرام ما بيخيّر بين كبير وصغير" وكذلك الشاكوش.. أما الخواجات كدأبهم في محاولة محاربة كل منقصات الحياة.. وجدو أن الشاكوش منقّص كبير.. فأجرو عليه الأبحاث والتجارب.. قرأت في الأخبار "وصى البروفيسور ووتر ميشيل، من جامعة ستانفورد، استاذ في علم النفس استخدام أقراص الإسبيرين في علاج الحالة النفسية السيئة الناتجة عن فشل تجارب الحب والعزلة وقال الاسبرين شايل للحب الفاشل مقلاع.... الكمدة بالرمدة". أها بعد النضم دا.. تاني اوعى اسمع لي ولد واللا بنية يشتكي ويتحيحي من شاكوش.. تراهو البروف دا قال ليكم حبتين اسبرين وتنسى كل شي.. ولله الحمد والمنة الاسبرين رخيص ومتوفر في أي مكان.. انتو بس املو جيوبكم منو.. وتحدو الشواكيش بقلب قوي مفعم بالاسبرين!! د. عادل الصادق مكي الباب البجيب الريح- صحيفة اليوم التالي