(9) أضبحوا ليهم (القطة السوداء) كل ما تكون راجع البيت الساعة (أربعة) – والشمس دي مولعة زي النار – يرسلوا ليك رسالة ويقولوا ليك فيها (جيب لينا معاك بطيخة) """""""""""""""""""""""""""""""" قدرك تأكل (العدس) المسيخ دا – وما تقدر حتى تقول ليها العدس دا مسيخ (ملح) """"""""""""""""""""""""" الموضوع لو بدأ بي كباية الشاي – ح تنزل عدة (الحافلة) كلها تغسلها وتتمرها وترجعها تاني """""""""""""""""""""""""""""""""" جايبين ليهم (7) اجانب – وبلعبوا بعد دا كورة (الدافواري) – الدافوري دا ناس ضفر كفاية عليه """"""""""""""""""""""""""""""""" من ابجديات الوصايا في البيوتات السودانية – ان اي (عريس) عندما يريد ان يدخل للقفص الذهبي يتم توصيته بان (يضبح) القطة السوداء لزوجته من اول يوم عشما في ان تمشي الزوجة بعد ذلك في (العجين وما تلخبطوش) على الطريقة المصرية. اي زول يشوف ليه عريس يقول ليه : (اضبح ليها القطة السوداء). يحرشوا في الرجال – لمن كملوا القطط السوداء. هسع بتشوفوا ليكم (قطة سوداء). تحذيرات شديدة اللهجة – توصي كلها ان (تضبح القطة السوداء). اما اذ لم تفعل ذلك فان الزوجة يمكنها ان تطلع في رأس الزوج – ويمكنك ان تسمع من بعد كمية من الطلبات التى لا حصر لها ولا عدد. ودا كلو عشان شنو؟. عشان ما ضبحت (القطة السوداء). يعني ممكن تمشي تجيب (الكهربة) نص الليل – قبل الكهربة ما تنتهي - يكون فاضل فيها ما يكفي للاستهلاك اسبوع كامل - لكن الزوجة اذا لم تضبح ليها (القطة السوداء) ما بتقتنع ليك بي ان الكهربة لسه. تجيبها في ليلك داك. تشوف ليك ركشة. تشوف ليك امجاد. المهم انك تسمع الكلام وتجيب الكهربة. وكأنو الهدف من الحكاية دي انك تسمع الكلام وليس الكهربة. ودا كلو ليه؟. عشان ما ضبحت ليها (القطة السوداء). قلنا ليك اضبح ليها القطة السوداء ما سمعت الكلام – عاوز تعمل لينا فيها (مهند). كلام الحدايق دا في البيوت ما بنفع. وح يكون عندك مباراة عاوز تحضرها – ح تقول ليك لا عاوزة احضر المسلسل التركي. ليفربول وريال مدريد دي إلّا تحضرها في (104). تسمعها سمع. التلفزيون مشغول بالمسلسل. هسع انا طبعا بحضر في مباراة ليفربول وريال مدريد – والريال الان متقدم بهدفين حتى الدقيقة 37. والمباراة منقولة في بي ان تو – (عشان ما تقولوا بحضر فيها في الاذاعة). تقوموا تفهمونا غلط. لكن في ناس كتار – عندهم الكرت – لكن مع ذلك بحضروا في المباراة في الراديو. الواحد تلقاه قاعد برة البيت وشايل ليه كرسي وجركانة موية وراديو. تقول ليه الحاصل شنو؟. يقول ليك البيت جوة جايط. جايط على منو لكن؟. دا كلو يا جماعة ليه ؟...عشان ما ضبحت ليها (القطة السوداء). كل اسبوع ح تقول ليك عندي عرس بنت خالتي. تقول ليها ربنا يتم على خير. تقول ليك عاوزة لي (توب جديد). كل خميس عندها (عرس). تقول عندها (120) بنت خالة. يا بنت الناس انت عندك كم بنت خالة؟. بنات خالتك ديل اكتر من اخوات بثينة...(الريال جاب التالت). لو غضبت وغلطت كدا قلت ليها انت عندك كم بنت خالة؟ – تقوم فيك وتقول ليك انت بتشكك في اهلي – انت لو ما عاوز تجيب (التوب) ما تجيبو...عاوز تنكر بنات خالاتي عشان ما تجيب لي (توب). عادي دي بحصل. ودا كلو عشان شنو؟. عشان ما ضبحت ليها (القطة السوداء). تستاهل – قلنا ليك اضبح ليها القطة السوداء – قلت لا. كل خمسة ايام ح تقول ليك في (قناة جديدة) نزلت في التلفزيون – لازم تشوف لي القناة الجديدة دي وتنزلها في تلفزيونا دا. تقعد تكوس. وتسك في (الترددات) – والاقمار – قمر – قمر – لمن تنزل ليك (القناة). ولو ما قدرت تنزل القناة يطلعوك انت ذاتك ما بتعرف اي حاجة – وتقعد تذكر ليك في اخوها الصغير وتقول ليك والله كان القناة قبل ما تنزل في الدش بنزلها لينا في البيت. يعاتبوك ويلوموك ويطلعوك اي كلام. دا كلو عشان شنو؟. عشان ما ضبحت ليها (القطة السوداء). كل ما تكون راجع البيت الساعة (اربعة) – والشمس دي مولعة زي النار – يرسلوا ليك رسالة. ويقولوا ليك فيها (جيب لينا معاك بطيخة). ترجع من شارعك وتشتري ليك (بطيخة) وتشيلها في كتفك في الشمس دي – خلق الله دي كلها تتفرج فيك. كلو دا ليه؟. عشان ما ضبحت ليها (القطة السوداء). تستاهل. يبجبوا ليك (الغداء) عدس مسيخ ما فيه اي طعم – بارد – تسخين ما عاوزة تسخنو. رغم ان التلاجة مليانة فراخ ولحمة وسجك. لكن قدرك تأكل (العدس) المسيخ دا – وما تقدر حتى تقول ليها العدس دا مسيخ (ملح). تقول كدا. يقولوا ليك هو انت الملح البتيجيبو دا (ملح). ملح زي الناس ما قاعد تجيبو. يدوك محاضرة في (الملح). وكلو دا ليه؟. عشان ما ضبحت ليها (القطة السوداء). والحكاية يمكن تمشي ابعد من كدا وتدخل في حتة محرجة شديد. يعني ممكن بعد شوية تغسل العدة. وغسيل العدة طبعا ببدأ من كونك تشارك في (ارجاع) كباية الشاي الى المطبخ. ترجعها...يقولوا ليك غسلها معاك عليك الله. شفتوا اوعوا تظارفوا وتقوموا ترجعوا (كباية الشاي) البتشربها للمطبخ. لو رجعتها – ح تغسلها ح تغسلها. عشان كدا موقفك لازم يكون واضح في الحتة دي. الموضوع لو بدأ بي كباية الشاي – ح تنزل عدة (الحافلة) كلها تغسلها وتتمرها وترجعها تاني. ودا كلو ليه؟. عشان ما ضبحت ليها (القطة السوداء). وبعد كدا ح تجر. المسألة ح تجر. ح تمسح. ويوم الجمعة يقولوا ليك الحياة مشاركة ...تقوم تنفعل وتغسل هدومك براك. ودا كلو عشان شنو؟. عشان ما ضبحت ليها (القطة السوداء). وشوية – شوية – ح تلقى نفسك ما عندك شخصية...تسلم المرتب اول الشهر وتختفي من الوجود بعد ذلك. وجودك زي عدمو. ودا ليه يا شباب؟. دا عشان ما ضبحت ليها (القطة السوداء). عشان كدا موضوع (القطة السوداء) دا ما تجهلوه. ما تهملوه. وانا هسع عاوز اقول ليكم بي نفس الفهم. ناس المريخ ديل انتصروا عليكم في قمة الكأس – عشان ما ضبحتوا ليهم (القطة السوداء). لو ضبحتوا ليهم (القطة السوداء) من اول (15) دقيقة من عمر المباراة دا كلو ما كان حصل. كان ضفر ما جاب ليه قون. لا تسلل لا ما تسلل – كنا ارتحنا من الدوشة دي. وكان ايمن سعيد دا قونو دا في (التسخينة) والمرمي فاضي ما بجيبو. وراجي. راجي منو كمان؟. ما كان الكلام دا حصل لو ضبحتوا ليهم (القطة السوداء). ومن هسع بنقولها ليكم يا ناس الهلال في قمة الممتاز اضبحوا ليهم من اول (5) دقائق (القطة السوداء). نحن يا الشغيل جايبنك مخصوص عشان تضبح (القطة السوداء). الجماعة ديل الفنيات والمثلثلات دي ما بتنفع معاهم. ولا بفهموها. ديل ناس ضرب ساكت وحظ. شغل (دافوري). جايبين ليهم (7) اجانب – وبلعبوا بعد دا كورة (الدافواري) – الدافوري دا ناس ضفر كفاية عليه. الموضوع ما عاوز ليه اي (اجنبي). ولا تتعبوا تجنسوا لينا في اولاد الناس. ابقوا عارفين. وابقوا فاهمين – واضبحوا (القطة السوداء) واحسموا المباراة من بدري – وخلوا الافراح كلها لجماهير الهلال. ما عندك مشكلة بتبقى. ....... ملحوظة : بس موضوع (القطة السوداء) دا ما تجهلوه. هوامش الممتاز ظاهر حقنا. كأننا خلقنا للبطولة الاولي – والمريخ خلق للبطولة الثانية. ثلاثية رائعة في الاهلي عطبرة. المحترف سيمبو يقدم هذه الايام اروع مستويات – وكمان بسجل في الاهداف. اسعدني كثيرا هدف مهند الطاهر. عودة عمر بخيت لتشكيلة الهلال امر في غاية الاهمية. الهلال يفتقد عمر بخيت. مباراة القمة في استاد الهلال. ناس المريخ حاولوا يتهربوا من استاد الهلال. عاوزنها في استاد الخرطوم. بالله. استاد الهلال دا نحن عاملنوا نسلق فيه بيض. القمة في المقبرة. تعالوا هناك عشان تفهموا حاجة. الرد في المقبرة. خلوا اي حاجة الآن. وركزوا في الممتاز. حتى موضوع التسجيلات – الان ما تفتحوه. خلوا تركيزكم خالص في الممتاز. ابعدوا اللاعبين من هذه الاجواء. خلوا تركيزهم خالص في الممتاز. ما بنستحمل اي اخفاق. تاني لا بنعرف عارضة ولا قايم. والاداء براهو ما بقنعنا. ولا بكفينا. عاوزين انتصار عديل كدا. هدف تسلل ما فيه. ضربة جزاء ما فيه. ........ عاجل : ضفر بسجل في حالتين – يا في تمرين يا يكون هو (تسلل). وإن طال السفر - محمد عبد الماجد صحيفة قوون
