عضلات تبش: مطربة سودانية مقيمة في مصر.. أول مرة أمتع نظري بي شوفا (الله يكسرني حتة حتة) اسمها هناية العسل (ما بعرفو العسل دا اسم أبوها واللا لقب؟.. غايتو لو كان لقب يكونو اتلومو في العسل لوم شديد).. المطربة دي جابتا لينا قناة فضائية من قنواتنا الما عندها طعم دي.. أصلها القناة دي تلقِط.. وتشوّفنا الما بنشاف.. ولسة الغريق قدام.. غايتو الكائنات الشفتها في القناة دي أظني كنت لمن أموت ما بشوفها.. لكن الله دا ما كريم.. ما دايرني أرحل من أم قدود دي من غير ما أمتع نظري بي مِحَن الدنيا.. المطربة غليدة جهامة ذات صوت أجش.. غنت للسودان في أعياد الاستقلال الفاتت، الله يسعلني لما اتحمّت ونهرت وقالت (السودان) خفت السودان دا يتفرتق حتة حتة أكتر من الفرتيق العليهو.. ونحن قاعدين في نصو.. زي دي حقو يلسطوها على أمريكا الما ساعلة في زول دي، وتنهرها.. وتفرتقها وتخلي الولاياتالمتحدة كل ستة في حتة.. يا وزارة الإعلام نحن ناس في ضُمتكم، زي دي لو ناوين تخلوها تغني للسودان في عيد الاستقلال القدامنا دا، عليكم الله أدونا خبر قبال أسبوع.. عشان نلملم وليداتنا علينا إن بقو مسافرين بعيد مننا.. عشان لما السودان يتفرتق نبقى مع بعضنا في بكان واااااحد.. ما يبقى علينا شتات يا فردة. شفت المطربة تغني وتنّهر في السودان ويجوا الناس زرافات ووحدانا ويبشروا فوقها.. والواحد يعاين لها وكأنو بيقول ليها: "أها شفتي؟.. جيت بشرّتّ فوقك".. تكون منجضاهم نجيضة، مساكين وهم في غربتهم.. يسمعوا بالعضل ويبشروا بالعضل.. وإن هي عندها حقن في العضل ياخد واحد من المبشرين الحقن نيابة عنها بالعضل. غايتو المطربة الإرهابية دي الله لا يسهل لها تجي تغني هنا.. وتخلعنا علي الخلعة العلينا.. نحن ما ناقصين خُلع.. كفاية العضلات الحايمة فوقنا!! آمين: فيديو لافي في المواقع الإلكترونية.. فيهو الفنان الشاب حسين الصادق في حفلة عامة.. يغني.. تجي بنية طالعة المسرح.. وتتلافاهو وتبوسو في جضمو.. لا إيدو لا كراعو مسيكين!!!.. استمر في غناهو وسط تصفيق وصفير الحضور.. عاينت ليهو في وشيهو وهو منشرح للبوسة الجاتو لا يحرا لا يدرا دي.. وكأنو قال ليها في سرو: "إنتي يا يمه.. إن شاء الله تبوسي الحجر اللسود"!! بتطوّل: غنية سمعتها قبال أربعة شهور.. والبارح سمعتها: "ليك أسبوعين ما جيت مالك يا زول خليتنا من دون أسباب جافيت وإن شاء الله المانع خير" يا ولدي ديل ما أسبوعين؟.. ديل أربعة شهور! أسمع نضمي: الزول دا أقنع منو.. ما جايي. وشوف لك غنية تانية تنفعك!! اغتيال: سمعتو يغني ويكورك ويقول بكل وضوح: "الغيرة الفي قلبك أبت اصلو ما تبرد إنت غايتو.. بتقتلني وبتقعد" رد آخر يهدد القاتل بالندم: "وأنا غايتو تب معاك غلبني الصبر وبي حالتك دي بي تقتلني، وتخُم وتصُر" د. عادل الصادق مكي الباب البجيب الريح- صحيفة اليوم التالي
