ومثلما غني (يا حليل كسلا الوريفة الشاربة من الطيبة ديمة) يتحسر أيضاً الآن على أيام ما كانت الحياة سهلة وجميلة, عندما كانت صواني الإفطار الرمضاني تزدحم بها الشوارع فيفطر القاصي والداني, وزمن كان الفنان يغني في رمضان مثل غيره من الشهر حيث تقام مناسبات الأفراح في رمضان بصورة طبيعية, علي إبراهيم اللحو, فنان صاحب حنجرة تحدت الزمن وظلت تصدح بحلو الغنا ما زادها تعاقب السنين إلا تعتقاً وبريقا, حل ضيفاً عزيزاً على مائدة (اليوم التالي) الرمضانية فتفضل مشكوراً بالإجابة على جميع التساؤلات كما سنطالع كل ذلك عبر تفاصيل هذا الحوار. حدثنا عن تفاصيل أول يوم صمته؟ والله كان عمري عشرة سنة, حاولت زي ما الأولاد الصغار بيعملو إني أصوم, الحكاية ما استمرت كتير, مجرد ما الساعة 12 جات والشمس ولعت على طول مشيت الزير ولحقت نفسي بي كوز موية بااارد, الحكاية خلتني أضحوكة في البيت لأني كنت متحمس ورفضت فكرة إني افطر في البداية. حاولت تصوم وتفطر بي الدس؟ أيوة, أكتر من مرة, لكن ناس البيت كانوا متابعيني وعرفوا الحكاية. حصل مرة فطرت بي الخطأ؟ مرة فطرت بي الخطأ والأذان كان قريب وقضيت اليوم. طيب فطرت متعمد؟ لا, مستحيل, مما ممكن أفطر عمداً مهما كانت الأسباب. طيب برنامجك شنو في رمضان؟ أول حاجة بصلي الصبح حاضراً, بعد داك بقرأ ما تيسر من القرآن الكريم, تاني بنوم ما بصحى قبل صلاة الظهر, وبعد داك بصلي العصر وبتابع القنوات الفضائية لي حدي أذان المغرب. بتفطر وين, في البيت ولا في الشارع؟ حليل زمن الإفطار في الشارع, والله الفطور في الشارع كان نعمة كبيرة وفيهو بركة وليهو نكهة خاصة, هسي الناس خلت العادة الجميلة دي, ولو في زول واحد في الحي طلع الشارع بي صينيتو حا يلقاني معاهو طوالي, أنا هسي بفطر في البيت غصباً عني. بتصلي التراويح؟ أنا مريض وما بقدر أصلي التراويح في المسجد, بصلي التراويح في البيت. بعد التراويح بتعمل شنو؟ رمضان أجمل فرصة الزول يزور فيها الأهل والأصدقاء والمعارف وبحرص على التواصل الاجتماعي في الفترة المسائية. لما العطش يحاصرك بتعمل شنو؟ بنوم ولو النوم أبى بصبر, أعمل شنو؟ وجبتك المفضلة في رمضان شنو؟ زمان كانت العصيدة هسي حليلة, ومشروبي زمان الحلو مر, هسي غصباً عني بشرب البرتقال. طيب ممكن تقارن رمضان بين الأمس واليوم؟ والله زمان الحياة كانت صعبة والأجر كبير, كانت شمس رمشان بتحرق جسمنا وبتنشف ريقنا, لا في مكيف لا تلاجة, لما الشمس تعطشنا وتنشف ريقنا ما عندنا حل غير نجيب شوال خيش وتبلو بي الموية وتتلف بيهو, هسه الحكاية بقت ساهلة العربية مكندشة, المكتب مكندش, البيت مكندش, بس ربنا يعظم الأجر. حصل صمت برة السودان؟ كتير جداً, بس الصوم في المملكة العربية السعودية وبالتحديد في الأراضي المقدسة بالقرب من قبر المصطفى صلى الله عليه وسلم ليهو نكهة خاصة ومميزة. بتقوم بأي عمل فني في رمضان؟ ما بقوم بأي عمل فني في رمضان, بحاول أمدح الرسول وكل الشهر الفضيل للمديح وبس. عندك أي عمل في الفضائيات في شهر رمضان؟ في, عندي مديح للمصطفى في قناة أم درمان الفضائية مع مجموعة من الشباب. بتغني في حفلات في رمضان؟ حليل زمن الحفلات والأعراس في رمضان, هسي الكلام دة ما في ولو في نحنا بنغني, زمان سنة 58 كانت الحفلات في رمضان ما تديك الدرب وكانت أغلب حفلات الأفراح بتكون عادي في شهر رمضان. شيء بتحرص عليهو في رمضان؟ مراجعة النفس والتقرب إلى الله بصالح الأعمال والدعاء. شي بتفتقدوا في نهار رمضان؟ الموية الباردة, أنا بحب الموية شديد. وجبة في العشاء؟ اللحوم والفول. داير تقول شنو في الختام؟ بشكر ناس (اليوم التالي) كتيير وربنا يديكم الصحة والعافية, وأهني الجميع بالشهر الفضيل ورمضان كريم وتصوموا وتفطروا على خير. صحيفة اليوم التالي