الأسبوع ده لو كنت متابع أخبار مصر كويس هتعرف إنه تم الإعلان عن مشروع قومي جديد ألا وهو قناة السويس الجديدة. لو كنت قريت تفاصيل المشروع وشاهدت الحفل المقام على شرف بدؤه فإنت إنسان محظوظ. علي الأقل محظوظ أكتر من ملايين المصريين اللي ما شافوش حفل الافتتاح ولا لحقوا يقروا حاجة على الإنترنت عنه. ببساطة لأن يوم الإعلان عن افتتاح المشروع الجديد كان يوم تاريخي في مصر وتاريخيته ما كانش ليها علاقة بالمشروع لكن بعدد ساعات قطع الكهربا. ففي اليوم الموعود الكهربا كانت بتقطع في كل مناطق مصر بمعدل 4-6 مرات في اليوم بمجموع ساعات يتراوح بين 6 و 11 ساعة. وقبل ما تتسرع وتلطم الخدود وتشق الجيوب وتصرخ بعلو صوتك "إزاي مستحملين ؟ ، ودي مش عيشة دي اللي انتوا عايشينها ؟ ، وما كانش يومك يا مصر ! " أحب أقولك إن الشعب كله متعايش تماما مع مشكلة قطع الكهربا – لأ سوري مشكلة إيه؟! ، أقصد مع نعمة ربنا علينا في قطع الكهربا- فقد تعودنا إننا نشوف النعمة في كل حاجة حوالينا منذ قيام ثورة 30 يونيو المجيدة فقط عشان ما نشمتش فينا الأعادي من أعداء الوطن المتربصين اللي بيتحينوا الفرص عشان يحولوا هذا البلد المنظم المتقدم الناجح اللي احنا عايشين فيه ده لفوضى . على سبيل المثال لا الحصر .. ما اسموش رفع الدعم أو زيادة أسعار البنزين.. إسمه تشجيع المواطنين على تقليل استخدام سياراتهم ع الفاضي والمليان واستغلال وقت المشاوير اللي مالهاش لازمة دي في قضاء وقت عائلي دافىء مع بقية أفراد العائلة. ما اسموش فشل جهاز علاج فيروس سي الشهير بالكفتة ولا اسمه كذب إدعاءات اكتشاف علاج لمرض الإيدز .. إسمه توفير أخبار كوميدية للمواطنين يقلشوا عليها لرفع الروح المعنوية الجمعية للشعب. ما اسموش إرتفاع أسعار السلع بسبب إرتفاع سعر البنزين والسولار ولا إنقطاع المياه عن مناطق واسعة في الجمهورية لعدة ساعات كل يوم .. إسمه مساعدة المواطنين على تهذيب النفس و دعوتهم للتعود على صيام الإثنين والخميس .. و الثلاثاء والسبت والأحد .. و الأربعاء و الجمعة بالمرة. ما اسمهاش اعتقالات بدون أدلة و احتجاز بدون محاكمات .. إسمها محاولة لم الشمل ..للمرة الأولى من زمان بيجتمع الإخوان والثوار في مكان واحد .. هو صحيح المكان ده بيكون في الأغلب زنزانة بس آدي أجهزة الدولة بتحاول لم الشمل اللي انفرط إبان العهد الرئاسي السابق .. و على المرء أن يسعى و ليس عليه إدراك النجاح. و بالنسبة لقطع الكهربا .. مش هانقولك تبريرات خرفانية زي اللي كنا بنسمعها في العهد الماضي زي إنها فرصة للتفكر في ظلمة القبر وتذكر الذنوب وخلافه .. مطلقا .. أبسليوتلي ..عهد استغلال المشاعر الدينية ده انتهى من زمان. هنقولك إنها فرصة لإيقاظ مشاعر الحب و الوئام والانسجام بينك وبين الناس اللي بتحبهم .. تخيل لما ما تشوفش أمك أو أبوك .. أو مراتك أو أولادك .. أو جوزك وحبيبك لمدة 6-9 ساعات كل يوم .. إضافة للوقت اللي بتنام فيه واللي بتروح فيه شغلك هتلاق نفسك تقريبا ما بتشوفهومش من أصله .. مش ده هيزود اشتياقك ليهم ويعمق من مشاعر اللهفة لما تشوفهم بعد شوقة لما النور ييجي و انتوا بتقولوا "هيييييه النور جه" مع بعض في لحظة واحدة وبعدين تتفاجئوا ببعض وأشكال بعض فتاخدوا بعض حضن مطارات .. عيني في عينك كده ؟ .. مش هي دي الحقيقة ؟ لو انت مصري فانت هتفهم بالظبط أنا باتكلم عن إيه .. أما لو إنت مش من المحظوظين اللي عايشين على أرض مصر .. فالحقيقة أنا باشعر بالشفقة تجاهك .. لأنك مش قادر تحس بكم المشاعر والتلاحم والتجانس والتكامل و الحب والسلام النفسي وهدوء الأعصاب اللي احنا محاطين بيه في كل ساعة من ساعات حياتنا اليومية.. مسكين .. مش مقدر النقمة اللي انت عايش فيها .. هاقولك إيه ؟ ..خللي الكهربا تنفعك ! مونت كارلو الدولية
