اليوم خرجت محملة بالحقيبة واللابتوب معا فكان لزاما علي التخلي عن تسليتي الصباحية الممثلة في رياضة المشي ...عندما توقف صاحب الركشة امامي وقبل ان افتح فمي بالحديث قال لي (اتفضلي يا دكتورة )...توقفت مندهشة ..فقال وهو يضحك (يا دكتورة انا وصلتك كتير لكن الليلة دي بس عرفتك ...انت دكتورة حكايات )... كان قد بدا يتحرك وفي ذات الوقت بدات افكر جادة في كتابة كتاب فقط عن سائقي الركشات فهم فئة قليلة غلبت فئة كثيرة (سائقي التاكسي والامجاد ومن سار بسيرتهم من هايس وحافلات وهلم جرا)...(يا دكتورة انا بتكلم معاك سرحت وين ؟) انتبهت على حديث سائق الركشة (لا معاك ..أها ليه اليوم بس عرفتني ؟) ...نظر الي بالمراة وعليه علامات المكر (ما شايفة شئ متغير فيني؟) ضحكت سرا ..يعني هو انا اتذكرتك اصلا؟...ولكن قبل ان اقول شيئا استطرد قائلا (طول عمري كنت مربي شعري ..رافض نهائي احلقه ..بس بعد ما اتزوجت بقيت ازهج كتير واتشاكل مع الولية في البيت وأضرب العيال),,,, بدات في الشك في قواه العقلية ..ما العلاقة بين الزهج وتربية الشعر ؟؟؟ ولكني واصلت الاستماع بكل هدوء ..( قام واحد صاحبي قال لي انت ما تحلق شعرك دا صلعة ..والله دي كان اجمل نصيحة ..من حلقت شعري دا ..والهواء ضرب راسي بقيت أضحك واهزر وكمان بقيت أفكر كويس )...قلت في نفسي اكتشاف جديد (لنج) للعلاقة العكسية بين الشعر والتفكير ...شفتوا كيف؟ ياخ ..نحن شعب خلاق ومبتكر ...قلت له (واليوم عرفتني عشان حلقت الصلعة ؟؟) ...قال لي (والله من المرة الفاتت الوصلتك فيها قلت لي نفسي انا الزولة دي شايفها وين؟ تكون من حلتنا؟ تكون كانت زميلتنا في الجامعة ؟ يا ربي شفتها في لجنة الاختيار ؟ لكن اليوم اول ما شفتك وراسي بارد طوالي عرفتك ..بالله أمشي اكتبي عني وقولي الحياة احلى مع الصلعة )... قلت له (يعني الدعايات تتكلم عن كيف نرجع الشعر المتساقط للرجال .... البنات قروشهم كملانة في تطويل الشعر ..تجي انت هسع تربطه بالتفكير وكمان معالجة الزهج والدبرسة؟)... قال لي (والله ....بنات حواء ديل ما بعرف ليهن دوا ..لكن خليهن يطولن شعرهن ..باقي كان فهمن اكتر من كدي بنتعب نحن ..لكن اخواني الرجال كلهم بنصحهم بالصلعة عشان تفكيرهم يبقى نضيف )... كنت قد غرقت في موجة من الضحك حتى دمعت عيناي ...وكذلك كنت قد وصلت وجهتي ..فقال لي (عليك الله اخر مرة ضحكت كدا فيها متين؟ لازم تقابلي كتير ناس عندهم صلعة زيي كدا )... اخذ اجره وتركني وانا امسح دموع الضحك من عيني وقبل ان أقول له ان نظريته خاطئة فلا أعتقد ان هناك علاقة بين الشعر وكثافته وبين ترتيب الأفكار او تحليل النتائج ......ولكنني دخلت الى المعمل وانا افكر ..ترى هل يفكر الرجال حقا هكذا ؟...على كدا تلك الفتاة التي غنى لها الشاعر (الشعر أقدامك سترها )...كان الشاعر يقصد ان تكون طويلة الشعر قصيرة التفكير؟؟؟ ...وهل لهذا السبب يصر بعض حملة الواي كروموسوم على الزواج من فتاة شعرها طويل وهو يضمر مكرا داخليا بضمان غبائها او على الأقل قلة ذكائها ؟ ....الشئ الأكيد في نهاية رحلتي هذه ان هذا الشاب قد أضحكني وعزز عندي فكرة (غتاتة) الرجال ....قال الشعر أقدامك سترها قال ..وصباحكم خير
