• مريخابي (مصدوم). • عندو مشكلة في (الرزة) بتاعة الحلق. • اليوم كلو بيشكي من السخانة. • وبتم شكوتو بي (غارزيتو). • المريخابي قاعد – وقافلة معاهو – قال والله نحن طلعنا اي كلام. • البنشتمو كلو بيجيبوا لينا في المريخ. • غارزيتو دا وقت كان في الهلال ..الله وخلقو اتفرجو في الكلام البنقولو فيه. • وصلنا بيه لغاية اقسام البوليس. • جابوه لينا في المريخ طوالي طلعناه (الخبير الفني). • بقينا نشكر فيه زي (خبيز العيد). • و • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). • بس غارزيتو دا ما اظن عمرو نقص (15) سنة بعد انتقاله من الهلال الى المريخ. • المريخابي بحكي. • وبتكلم براهو. • عمرنا كلو بنهاجم في هيثم مصطفى – جابوا لينا هيثم مصطفى ما عرفنا نمشي وين؟. • طلعناه (البرنس). • شلنا بيه الدوري الممتاز. • هيثم كابو بعد ان انتقل (هيثم مصطفى) الى المريخ سألوه قالوا ليه فنانك المفضل منو؟. • قال ليهم : هيثم مصطفى ومحمد وردي. • طلعوا ليك هيثم احسن زول. • والمريخابي بقول : • قعدنا نهاجم في المعز محجوب – (سلك) قال لينا الحارس دا قاعد (يشربكها). • بتشربك في الشبكة. • تقول سماكي. • ما خلوا ليه حاجة. • جابوا لينا المعز محجوب ..ما عرفنا نودي وشنا وين؟. • قلنا ليهم المعز ما كعب …كعب الدفاع. • و • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). • بس (التايا بنت جاب الله) عندها عمها في امريكا ..ضربت ليه تلفون قالت ليه الشبكة الطاشة دي مننا وإلّا منكم؟. • والمريخابي بحكي : • قبل كدا كان ما خلينا شيء لي هيثم طمبل. • جابوا لينا هيثم طمبل. • قبلنا على كلتشى. • جابوا لينا كلتشي. • احراجات شديدة. • موقفنا بقى منيّل في ستين نيلة. • هاجمنا (تراوري)..قلنا للهلالاب عندكم مهاجم المباراة كلها قاعد يتجرس في خط 18. • يضيّع في الكور ويعاين في السما…تقول الكورة ضيعها زول تاني. • تقول ضيعها بلة جابر. • جابوا لينا (تراوري) بعد كلامنا دا طلعناه احسن زول. • قبّلنا على بكري المدينة…(والكلام للمريخابي). • قلنا ليهم بكري المدينة (القون) عندو متل (لبن الطير). • عشان يجيب ليه قون – يسل روحك. • القون ما بجيبو قبل ما يطلع ليه (رقم وطني). • جابوا بكري المريخ. • بقينا نشيل ونصفق للكور البضيعها. • الصبر مالو سمح. • الصبر ما كعب. • المريخاب بقوا يقولوا المهاجم البصل المرمى احسن من البقعد ساكت. • والمريخابي بقول : • هسع الناس ديل قصدونا بي (عمر بخيت). • ما عرفنا نقول حاجة. • انتوا يا جماعة بتحرقوا في اعلامكم. • بتحرقوا في جماهيركم. • تصوروا (عمر بخيت) بعد هجوم (13) سنة طلع احسن زول. • افضل ارتكاز. • رفعوه السما. • و • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). • بس (خادمة الله بنت توم الاذكياء) قالت المريخ بقى زي صالون العمدة …حيطو الاربعة معلقة فيها صور قديمة. • من زمن حفروا البحر. • واحد في الحلة عامل لينا فيها (انطوان) (حسن قحف)…وبقولوا ليه (القحفنجي). • مرة ناس الحلة قالوا يملأوا وقتهم ساكت…يتونسوا بيه. • ناس الحلة مشوا ليهو قبل تلات سنوات – قال ليهم المريخ بنتصر 1 / صفر. • قالوا ليه البجيب القون منو؟. • القحفنجي قال ليهم القون بجيبوا : بكري المدينة. • قالوا ليه يا زول انت جنيت. • يا زول انت ما عندك رأس. • يا زول انت عقلك ما فيك. • بكري المدينة البوديه المريخ شنو؟…انت يا زول ما نصيح. • هسع في جماعة من الحلة – قالوا يمشوا يملأوا وقتهم. • يمشوا يتفرقوا ب (حسن قحف). • مشوا ليه..قالوا ليه يا قحفنجي المباراة ح تنتهي كم ؟. • قال ليهم المريخ ح يتغلب 1 /5. • قالوا ليه والبجيب قون المريخ منو؟. • قال ليهم : (معاوية فداسي). • قالوا ليه يا القحفنجي ناس المريخ ديل منتظرين معاوية فداسي. • القحفنجي قال ليهم كيف؟. • لو الله مد في الاعمار ..المريخ ح يسجل فداسي سنة 2024م. • غايتو الجماعة ديل عندهم جنس صبر. • بيصبروا ليك على لاعبي الهلال ديل صبر – مبالغ فيه. • انتوا الصبر دا لو بتصبروه على لاعبي المريخ كان عملتوا ليكم حاجة. • و • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). • بس (السرة بنت قومة البحر) ..قالت لي ولدها لو عرست (تهاني) لا عافية لا راضية ليك. • وتهاني عملت شنو؟. • تهاني مشت (لوزان). • واحد من اصحاب الافكار البعيدة. • بفكر بعيد. • النوع البقولوا عليه عندو نظرة بعيدة. • الزول دا قاعد يقرّض ليه في رغيفة ..قال لي انت عارف بتخيّل المريخ سنة 2029م تشكليتو بتكون بتتكون من هذه الاسماء: • احمد بيتر في حراسة المرمى. • مساوي وفداسي وبويا واطهر في الدفاع. • وسط المريخ بتكون من وليد وبشه ونزار والثعلب. • هجوم المريخ محمد عبدالرحمن والشعلة. • دا فريقكم سنة 2029 يا مريخاب ..عشان تكونوا عارفين – وما تعملوا لينا ازعاج ساكت. • خالد بخيت ح يكون المدير الفني للمريخ. • الكلام دا سنة 2029م. • رئيس نادي المريخ سنة 2029 ح يكون هاشم ملاح. • هاشم ملاح طبعا ما ح يقبل بالموضوع دا. • لكن السلطة ح تقعد مع هاشم ملاح ..عشان يكمل (هلالية) المريخ. • الاكيد ان هاشم ملاح سوف يقدم استقالته من رئاسة نادي المريخ بعد 6 شهور. • والاكيد كمان ناس المريخ ح يقعدوا يحنسوا (هاشم ملاح) عشان يتراجع عن الاستقالة. • وهاشم ملاح ح يرجع. • يقوم تاني يزعل ويستقيل. • يقوموا تاني يحنسوه. • يرجع. • يستقيل تاني. • يحنسوه. • يرجع. • يستقيل. • يرجع. • شوفتوا البعمل فيه جمال الوالي دا – يعملوا ليكم هاشم ملاح. • ولا بتقدروا تقولوا حاجة. • ولا بتقدروا تتعرضوا. • سنة 2029م ناس المريخ ح يغيروا الشعار. • يشيلوا (النجمة). • ويلغوا حكاية اللون الاصفر والاحمر. • يشوفوا ليهم لون من (ظلال) اللون الازرق. • يعني بتفتكروا مساوي يلبس احمر. • بتفتكروا هاشم ملاح يواقف يبقى رئيس على نادي شعروا (النجمة). • المواضيع دي احسن تحسموها لينا من سنة 2020م. • عشان الامور تبقى واضحة. • وعشان ما ندخل في مشاكل ساكت. • و • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). • بس العويسة بنت احمد قالت لو الخريف السنة دي جاء مع رمضان يبقى ما عندنا مشكلة في (موية) رمضان. • ………. و • الممتاز ح ينطلق يوم 20 يونيو. • يا ريت مع ناس اندرزينهو والشعلة وجوليام ديل لو الممتاز انطلق يوم 1 يونيو. • البخلينا ننتظر لي يوم عشرين شنو؟. • يا ناس النيلين ..من الآن صلحوا (طبقكم). • ناس اندرزينهو ديل (تلاتة) كاميرات ..ما بتعمل ليهم حاجة. • شوفوا ليكم من بدري كدا عشرين كاميرا. • وما تقولوا لينا لفوا الطبق. • الجماعة ديل بندخل ليهم الاستاد ديل. • طبق شنو البنلفو ليهم؟. • الاتحاد والعلمة الاتنين مهددين بالهبوط في الدوري الجزائري. • في حظ اكتر من كدا. • …….. • السيدة (ل) – العيد باقي ليه 52 يوم. • وقرّض على كدا.