دق الدلجة محمد عبد الماجد اعمدة (الجوهرة الزرقاء) الخرسانية واعمدة الهلال (مساوي والشغيل ونزار) نحن وقت قالوا لينا صبّوا (الاعمدة الخرسانية) في الجوهرة الزرقاء – ما فهمنا الحصل. نحن خلونا ..ناس المريخ ما نقشوا الفيلم. فاكرنها (اعمدة خرسانية) بصبوها وخلاص. قايلين الموضوع بنتهي على كدا. الموضوع اتاريه اكبر من كدا شديد. جماعتكم افتكروها (سيخ واسمنت). ما عارفين الحكاية عندها ما بعدها. والله نحن ذاتو ما كنا فاكرين الحكاية بتصل للحد دا. وصلت لغاية مساوي. الشركة الصينية …عندها رأي في التسجيلات. الشركة الصينية دي بتدخل في التقرير الفني. طيب مالهم؟. الدخلهم شنو في تسجيلاتنا؟. انتوا قالوا ليكم ابنوا (الجوهرة الزرقاء) – وإلّا قالوا ليكم ابنوا لينا (فريق كورة القدم). مالكم عاوزين تلخبطونا؟. الحاجات دي ناس المريخ ما قدرها. ولا بقدروا ليها. ولا بفهموها ليكم. ديل الاعمدة الخرسانية نشفت ريقهم – اعمدة الفريق تعمل ليهم شنو؟. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس لو تبصبروا بحكي ليكم اي حاجة. مشكلتكم بتضيقوا. والكلام بغلبك. تقيفوا للزول في حلقو. وقت الهلال وصل لمرحلة المجموعات – الشركة الصينية صبت (الاعمدة الخرسانية). قلنا الموضوع دا صدفة. صدفة ساكت. ما بكونوا وازننها للدرجة دي. لو بقصدوها ..ببقوا (علماء). ببقوا اخطر ناس. عندنا زول في الحلة لمن يشوف ليه (قمرية) بشيل (نبلتو) وينشن ليك على (اللمبة). تقوم (القمرية) تقع. نجري على (القمرية) عشان نجيبها..ونقول ليه انت قاصدها؟. يقول لينا : امال قاصد (اللمبة) يعني؟. مرات زولكم دا يتشاكل ليه مع (زول). يقوم يملأ ايدو ..ويقبل على صاحبو. البونية تقع ليك في عين الزول المشاكلو. بنقول ليه انت (البونية) دي قاصدها – بقول لينا : امال قاصد صاحبي يعني. مرة مشينا لينا مناسبة. نسينا الكلام دا كلو..ومشينا لينا مناسبة. في المناسبة جابوا لينا (الغداء) – يعني ح يجيبوا لينا (كروت شحن). شفنا ليك (الضلع) قاعد ..و(القرع) قاعد. الاتنين قاعدات في الصينية. زولكم ايدو مشت على (القرع). قدر ما لكزناهو – ما اشتغل بينا. الايد ماشه على (القرع). في اخر لحظة كدا – الايد وقعت ليك في (الضلع). خمش ليك (الضلعة) ما شفنا فيها اي حاجة. قلنا ليه يا زول انت قاصد الضلعة؟. قال لينا امال ح اكون قاصد (القرع). قلنا ليه طيب مالك؟..ايدك بتمشي على القرع وبتقع في الضلع. قال لينا – انا اصلي كدا ..لمن انشن على الضلع بمشي على القرع عشان اقع في الضلع. يعني يا شباب لو نشنت على الضلعة ..ايدي بتقع في القرع. قلنا ليه كدا يعني؟. طيب (بكري المدينة) ما يعمل حركتك دي. يعني بكري المدينة دا – لمن يكون عاوز يشوت في القون ..ينشن في الكشافات ..الكورة بتمشي القون. وبلة جابر لمن يكون عاوز يعكسها ..يقصد يطلعها جدعة ..بتجي معكوسة زي الموزة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس ناس الهلال ديل حيرونا. ناس الهلال ديل قاصدنها. قالوا لينا عاوزين نصب الاعمدة الخرسانية. فهمناها كدا. جاءت التسجيلات ..اعادوا لينا قيّد (اعمدة) الهلال كلها. ما خلوا ليهم عمود. نزار حامد ..قالوا لينا حسم موضوعو مع المريخ. واستلم. وقت لقوا (الكضبة) ما مشت. قالوا نزار حامد وقع مع (العربي الكويتي). وقالوا كمان (الدينارات) الحايمة في السوق دي ..من دينارات حافز نزار حامد. ديل مشوا ابعد من كدا وقالوا العربي الكويتي ح يعلن عن التعاقد مع نزار حامد في (مؤتمر صحفي) بعد مباراة القمة. شفتوا الكضب. العربي الكويتي يعلن عن التعاقد مع لاعب تبقى لعقده مع الهلال (7) شهور. دا فهم شنو؟. الكسرة دي بي ياتو ملاح؟. نزار حامد نص ساعة ما اخدها مع ناس الهلال ..اعاد قيدو في الكشوفات. ولا قال حاجة. ولا سأل من قروش. دا عمود موضوعو انتهى. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس المؤتمر الصحفي بتاع (العربي الكويتي) بالغو فيه. قبلوا ليك على (الشغيل). بقوا يفكروا في الشغيل الشطبوه. الشغيل بقى ليهم خطير. بقى ليهم حلم. قعدوا يمسكلوا ليه. ويقولوا ليك في المواقع ..الشغيل ولدنا ..وجمال الوالي لغاية الآن زعلان. وقالوا كمان الشغيل جمال الوالي ما بخليه يفوت ساكت. ناس الهلال ما اشتغلوا بالموضوع. عارفين ناس المريخ بتكلموا كلام هم ما قدرو. ولا عندهم قدرة للاحلام دي. الشغيل اليوم التاني ..اعاد توقيعه في كشوفات الهلال. ولا سألهم من قروش. ولا قال عاوز كم؟. عمود تاني في تشكيلة الهلال رجع. استقرار صاح. ما في اي مشكلة. الموضوع ضايق ليك المريخاب. زعلهم زعل شديد. كيف الهلال يعيد قيد نزار حامد ونصرالدين الشغيل وهم رمضان عجب دا يسكسكوا فيه سنة كاملة. ما خلي ليهم حاجة. لمن عملوا ليهم (تحويل رصيد). قطعهم ليك في نص الموسم. الشغيل رجع. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس اعادة قيد الشغيل دي لو قالوا ليكم كتلت ليها مسطبة شعبية كاملة في المريخ ما تستغربوا. وما تقولوا اي حاجة. ناس المريخ ما طلعوا من صدمة الشغيل ..دخلنا ليهم بي مساوي. مساوي قال اشمعنا. ليه انا بس؟. مساوي زعل عديل كدا. قلنا ليه يا مساوي مالك؟..الحاصل شنو؟. مساوي قال انا قائد الفريق. انا الكابتن ..لازم اعيد قيدي في كشوفات الهلال. قلنا ليه الموضوع دا كبير ..عاوز (شبشه). انت اصلو ما ساهل. إلّا يشرف على تسجيلك عم شبشه. شبشه دا – موش كان عندو دور كبير في الاعمدة الخرسانية. شبشه برضو عندو دور في اعمدة الفريق. عشان الصورة تكتمل. والحاجات تبقى مرتبة. ومنظمة. اعدنا قيد مساوي. المريخاب ..قالوا انتوا الهلالاب ديل جنوا؟. معقولة يسجلوا في البرازيليين ..ويعيدوا في قيد الاعمدة. طبعا نحن (وليد الشعلة) ذاتو بنعتبروا (برازيلي). ناس المريخ اتلخموا. اتصدموا. وجاتهم حالة نفسية. بقوا يقيفوا في صواني الحركة. يشخبطوا في الحيط. وياكلوا في ملاح القرع. حالتهم صعبة شديد. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس موضوع مساوي دا ولا ح يستوعبوه لينا المريخاب قريب. الجميل في تسجيلات هذا الموسم ..ان مجلس الهلال اعاد الهيبة والتقدير لاللاعب الوطني. مجلس الهلال اعاد قيد ثلاثة من لاعبي الهلال دفعة واحدة. وسجل نجم التسجيلات الاول (وليد الشعلة). وفوق دا كلو صعّد نجم الرديف (الثعلب). هذه مكاسب كلها للاعب الوطني ..وتقدم له. الامر يحسب لمجلس الهلال..والذي نسأله عناية اكبر باللاعب الوطني ..لأن عافية الهلال في اللاعب الوطني. مجلس الهلال اهتم ايضا بتسجيلات الرديف وتسيجلات الشباب واشرف رئيس الهلال بنفسه على تسجيلات المراحل السنية المختلفة في الهلال. نذكر مجلس الهلال ان يحسم مبكرا موضوع (عماري) لاعب اهلي شندي والذي ينتهي قيده مع الاهلي في نوفمبر القادم. الاهلي شندي قدم مدافعه محمد سيلا للمريخ كاعارة – علما ان المريخ لن يستفيد من اللاعب افريقيا لأن اللاعب مقيد في كشوفات الاهلي الافريقية. دا فهم شنو دا؟. انتوا قاعدين تسجلوا لي ناس النسور والاهلي مدني. سيلا دا ورونا ح تسفيدوا منو شنو؟. يمكن للهلال ان يوقع عقد خارجي مع عماري من الآن – لأن ما تبقى للاعب مع الاهلي اقل من (6) شهور. نحن مع اللاعب الوطني. وعماري مكسب زي وليد الشعلة ..احسموا امروا يا الكاردينال. …………….. و ناس المريخ (القصر) كتلهم. ديل مع الجزائرين ما بشوفوا ليهم كورة عالية. متابعة علاج محمد عبدالرحمن ..امر مهم للغاية. امام الهلال اكثر من شهر قبل مباريات المجموعة. الاصابات كلها يمكن تتعالج. ……….. السيدة (ل) الزول وقت يكون عاوز ليه سبب لو جبت ليه (القهوة) بقول ليك باردة. وقرّض على كدا.
