هذا العنوان نقلتو زي ماهو.. من الموقع الإلكتروني الجاب الدراسة.. والدراسة استوقفتني لأني لقيت.. من الضروري تعريف الأزواج بها.. عشان كل واحد يعرف إمكانياتو قدر شنو؟.. ويتفلهم ويتبوبر ويتغا قدرها.. ويعرف إنو المسيكينة القاعد معاها دي قاعدة معاهو فوق جمرا تهبو الريح.. الدراسة من أمريكا.. وأمريكا مجتمع بيختلف عننا اختلاف كبير وما فيهو مجاملة.. وما في وقت يضيعوهو عشان يجاملوا زول حتى لو كان الزوج.. تقول الدراسة إنو الزوج الوسيم الجذاب زوجته ممكن تتسامح معاهو وتمعلشو عشان خاطر سماحتو.. مهما كان حجم الخطأ.. أما الشين تكون قاعدة ليهو علي الهبشة.. أقل غلطة تقوم عليهو وما تخلي ليهو صفحة يرقد عليها.. وتوريهو المكشن بلا بصل وبلا زيت وبلا موية كمان.. كلما تحن تقول خلاص الراجل دا كفاهو نجضتو نجاض.. تعاين ليهو في وشيه وتشوف تلاليشو وشلاضيمو وتلقاهو شين تفور تاني وتبدأ من الأول.. مثلا لو جاب رغيف شوية حرقان تهب فيهو “إنت أصلك ديمة كدي يغشوك ويدوك الشي الكعبة.. وانت بلا تشوفها تخمّها وتجي تجاري.. قدر ما قلت لك فتش الشي سمح حتين تجيبها.. نضمي ما بتسمعو”.. النقة دي كلها ما عشان الرغيف الحرقان باختصار عشان هو شين!!! أما لو كان سمح وجاب الرغيف الحرقان: “ناس الطوابين ديل أصلو ما بيخافوا الله.. حسي دا رغيف يبيعوهو لأمة محمد؟”.. عشان كدي يا جماعة اتعاملوا مع مظهركم ومنظركم بشفافية شديدة.. واعرف إنو المرا ما مستحملاك عشان قيافتك وسماحتك عشان حاجات تانية قد تكون بعيدة كل البعد من وشك اليقطع الخميرة من البيت “مثل مصري مستلف”.. الدراسة برضها قالت إنو حتى الشكل بيكون ليهو دور في الحكم القضائي.. يعني زول شين ودشن.. ممكن دي تأثر في الحكم وياخد حكم مشدد.. يعني لو قضية أقصى حكم ليها خمسة سنوات ياخد الخمسة سنوات برااااحة ما ينقصن يوم.. اما لو زول قيافة فممكن ياخد في نفس القضية تلاتة شهور بس.. بالنسبة للشين لو كانت القاضي مرا قطع شك الإعدام محمدو.. تبحبت وتكوس ليها مادة فيها إعدام وتباركها عليهو.. !!!!. وقالت الدراسة انو الحاجة دي اسمها الهالة.. والناس الشينين بيمتلكو حاجة اسمها “الهالة الشيطانية”.. غايتو نحمد الله، البلد دي مسكونة عديل!!! لقطة: كان راقد علي قفاهو بعد ان قرأ هذه الدراسة وآنس في نفسه قيافة غير موجودة قال لها وهو فاتح خشمو عن إسنان جزء منهن مهترم وجزء مصدي.. قال وهو يضحك: “الحمد لله.. تراها قيافتي نفعتني.. واتاريكي إنتي ديمة قدر ما اغلط ما بتنضمي معاي” عاينت ليهو وهي تتفرس في وشيهو كايسة لسنتمتر حق قيافة ما لقتو قالت ليهو: “نان إن سعلتك ونضمت معاك.. انا ووليداتي ديل نقبل وين؟”!!!!!!!!
