سمعنا قالوا الكاف حول كورة الزنطور للبكور جابها الجمعه الجامعه غيرها من الاحد قدمها يومين وقالوا القصه دي من الشركه الناقله باقي الشركه الناقله بتشترط علي الكاف وما تستبعدوا يجونا زناطير طايرين يقولوا ده كلو من جمال الوالي اتصل علي اصحابو في البي ان سبورت وقال ليهم قدموها ليهم عشان ما يكملوا اعدادهم ولا نستبعد ان تخرج علنا الخطوط العريضه جمال باع الوطنيه فكانت الكارثه المازيمبيه الزنطور لو عتر جوه بيتو يقول ليك ده جمال الوالي بلنت التطواني مكسيم مشي في زاويه والكورة في زاويه قالوا السبب جمال الوالي لو ما سجل بكري ما كان حردنا المعز وعمر بخيت ومهند وكان عزو مرق البلنت ومهند درن لينا اي شيء يحصل ليهم يقولوا ده جمال قال ليك زنطور اتزلق في مطيرة اول امس دي في شارع الله ده قال ده جمال الوالي قالوا ليهو النمره غلط الزلقه دي للخرطوم والي ما شغل جمال الوالي ياخ ديل مدورين في الارباب عشان عديل جمال الوالي ذكروني جورج بوش الابن عمك بوش بن لادن جننو جن قال ليك يوم في البيت الابيض واقف خلف التربيزه الرقيقه الطويله ديك التربيزه الفيها الف مايك والناس قاعده في الحديقه عندو ليهم كلام واثناء ما بتكلم جاهو الزول البلبس نضاره سوداء وبقيف وراهو وبعاين بعييييد بتلفت كتير زول خطر خلاص المهم جا لي بوش وهمس ليهو في اضانو بالانجليزي يا ريس الكهربا قطعت في نيويورك بوش قال ليهو ده بن لادن وواصل خطابو بعد شويه ابو نضاره جا تاني وهمس بالانجليزي طبعا ياريس العمال دخلوا اضراب بوش قال ليهو ده بن لادن وواصل خطابو صاحبنا ابو نضاره رجع تاني وهمس لي بوش يا ريس مبروك المدام رجعت من الدكتور والفحوصات اثبتت انها حامل جورج بوش قال ليهو ده بن لادن دحين بن الوالي ده ما لقيتوا شغله غيرو يا ناس جورج بوش؟ المهم خسارة عطبره لن تحبطنا اطلاقاً ولن تغير في ريحة المطار شيء ولن تعترض مسيرتنا للمطار حتى ولو اخطأ الجهاز الفني في التعامل مع المباراه او اخفق اللاعبون طريق المطار مفروش بالورود لأن من اخطأ بالتأكيد بكون عرف غلطو وبصصحو ايها الناس عراقي عند كلمتو ومن اسي جهزوا غيار المطار قشره من سعد قشره قشره من امها ماشين ماشين بإذن الله ماشين ايها الناس حلمان بعد المجموعات مشينا الكنغو وبعد الكنغو مشينا الجزائر وبعد الجزائر الشافنا في طوكيو ما كضب نجيب ليك معانا بلوتين هايلوكس يا روشا؟ ايها الناس الهزيمه تزيدنا قوةً واصراراً وأعجبني الشفت نجم الدين عثمان فرد الشرطه المريخي الاصيل كتب الرجل تلالي فوق يا نجم السعد ضويت.. لونك تبري ومن فوق للخلوق طليت سكونك في العلالي ومن دونا انت ابيت… في شارع العرضه صرحك شامخ اتباهيت طبعا ده كلو من جمال الوالي يا روشا صرحك شامخ اتباهيت بالمناسبه دي اخبار الجوهره شنو ؟؟؟؟ اوعك تكون المطره ملت الحفر؟؟؟؟ اردموها يا روشا وبعد الخريف احفروها المهم الكاف اشاد بالحكم الغاني لامبيتي يا رمضان كلامك شنو ؟؟ يكون جمال الوالي ضرب ليهم قال ليهم لازم تشيدوا بيهو ؟؟؟ بالمناسبه اليومين دي في تسجيل حايم في الواتس شداد بتكلم عن فضيحة اتنين واطناشر يا رمضان ووصفها بانها وصمة عار في جبين الحركه الرياضيه السودانيه وصلك المقطع ولا ارسلو ليك؟؟؟ ولا انشروا ليك كلمه كلمه وحرف حرف !!!! فعلاً اذا ساءت افعال المرء ساءت ظنونه وتخيل اتنين اطناشر المهم كورتنا ضد الخرطوم نجي كلنا لاننا كمشجعين بنحتاج اعداد برضو ولجنة التعبئة المناضلة امس اجتمعت في خصوص مباراة العلمة والاتحاد وانا متأكد ناس ساس بكونوا اجتمعوا في خصوص مباراة مازيمبي البعد الاتحاد والاولتراسات كلها شغاله لي طوكيو ياباني يا اصلي ايها الناس المريخ كبير جدا كبير البلد دي بشهادة الاعداء لما خسر من الامل الخط الاول في صحف الزناطير كان عن المريخ والتاني والتالت والرابع فوز الزنطور على الميرغني كسلا خبر المريخ مقدم في صحفهم على خبر انتصاراتهم انت كبير يا مريخ وصدقوني لما نجي من المطار حايكتبوا انو ده امسخ كاس افريقي وحايشتلوا انو الكاف قال دي اضعف بطوله وشتله تانيه خبير كبير بالكاف يقول ان المريخ لا يستحق البطوله وعضو بالمكتب التنفيذي رفض ذكر اسمو قال ايادي جمال داخل الاتحاد الافريقي هي التي حملت الكاس للمريخ وطبعاً نحنا في المطار بنغني للنجمه واقدلي وسكتي الخشامه وانزلي في العوازل كي سوات العاصفه بي ساق الشتيل الني الشتيل الني دي حلوه شديد ايها الناس ان تنصروا الله ينصركم اها نجي لي شمارات والي الخرتوم كان شفت يا والينا اول امس تلاته جرادل صبت لينا لما مرقنا سبعه الف جردل لقينا الشارع كلو مكشح لينا مجاريكم دي بتصرفها لينا ولا بتزيدها علينا سلك كهربا ننساك كيف والكلب لما شافنا غرقانين في تلاته جرادل ضحك وجري في المويه طش طش طش طش ورشانا والى لقاء سلك
