مدرب المراحل السنية الاجنبي المتخصص صاحب الخبرات الكبيرة وصل خطوة فاهمة وشجاعة خطاها طارق المعتصم من اجل علمية التأهيل في المريخ وطارق التزم براتب المدرب يبقى على الشفوت دعم باقي متطلبات المراحل السنية واذا كانت المراحل السنية تؤهل لاعبا في السنة للفريق الكبير فإن ذلك يعتبر مكسباً بحسابات الربح والخسارة والسعي خلف درة التسجيلات وقنبلتها واستيراد لاعبين من برة شكراً طارق المعتصم على هذا الفهم الراقي شكرًا مقدماً للشفوت البدقوا صدورهم لشيل الشيلة مع طارق إنه غرس ثماره ستدهش الناس وبالتوفيق أها المبالغ السمعنا انو كردنة قدمها لي ناس ميسي حقيقية ولا زي سعر أبو قنفد سوق ليبيا؟ ابو القنفد ما شبهك يا ميسي لكن القسمة أيها الناس نحتاج لأجنبي يصنع الفارق بالتأكيد حايكون في خانة واحد من الأجانب القاعدين شخصيا استبعد كوفي طبعاً وصديقي أحمد عباس يستبعد اوكرا الفضل منوووووو؟ المهم العضوية نشطت هذه الأيام نتمناها واعية وعاقلهة وليست محشودة وتابعة والوقت مناسب لعودة جميع قيادات واقطاب الزعيم نريد مريخاً نختلف فيه ولا نختلف عليه نختلف فيه لا عليه دي زي بصق على وجه الحكم ما في وجه الحكم موش! نتفق حوله وتتعارض افكارنا فيه بأدب واحترام واعتراف بالآخر نريد حكومة رشيدة قوية قومية ونحلم بمعارضة واعية وداعمة وبناءة ومن يعشق المقاعد اكتر من الكيان اكيد خسران أيها الناس التفافنا حول المريخ هذا الموسم كان اقوى اسباب الظهور الافريقي المميز يبقى نستفيد من الدرس المهم يأخذ مجراهو عشان يستقيم امر الرياضة عندنا القرارت القوية التاريخية تفيد الشعوب وتسجل لصاحب القرار علي صفحات التاريخ موقفا بأحرف من نور وأد القانون يزيدنا عبطاً وتعبطاً وتخبطاً وسوءًا وزي ما قالت فطومة اختي الفيفا والفيفا برضك درب قانون طيب وكت عارفين كده جايين بي خور ابو عنجة من الاول ليه؟؟ قانونية لا وساطة ولا جودية ايها الناس استغرب عندما يتحدث الناس عن ازمة لا توجد ازمة كل القصة واحد ازمها على نفسو حر فالقنا في شنو كاوبوي لي روحو نحنا مالنا ؟؟ المهم المنتخب بدأ الإعداد تعالوا نتناسى الوان الطيف ونتلمه كلنا تحت علم السودان تعالوا نقدم ما يمكن تقديمه للمنتخب تعالوا نسهم في الوقفة الكبرى خلف المنتخب تعالوا نحس بوجع الوطن نتناسى آلامنا وموت أحلامنا ونقدم للوطن أيها الناس شكرا دنقلا الراقية ارض الحضارات شكرا جماهير دنقلا الواعية نشكرهم جميعا للوحة الجميلة القدموها في نهائي كأس السودان ونشكر جماهير الهلال بدنقلا التي عبرت بوعي عن هلاليتها ووقفتها مع كيانها ورفضها لقرار الانسحاب فكانوا ملح النهائي كانوا الملوحة التي تميز اهل الشمال دوماً شكرًا أهلة دنقلا الفاهمين المهم مجلسنا ليس بالساهل الذي لا يدرك القيمة المعنويه لاي تصرف مهما كانت تكلفتة المالية وكلامي ده اتذكروهوا كويس أيها الناس اختلف مع الذين يرون عدم التجديد لغرزة هو الأفضل غرزة شاطر وان كان لديك جواد أصيل غير مروض أفضل لك ان تروضه بدل تفقده ولا يروض الجواد إلا الفارس الشديد ولا نظن ان مجلسنا يعدم الفرسان الأشداء العين الحمراء بتخلي الخواجة ياكل الكسرة والخواجية تعوس دحين حمر عجينك يا ونسي الزول قرقريبتو جااااااهزة أيها الناس من لا يشكر الناس ببقى زول ساي ونحنا ما ناس ساي دايرين نقول لجمال شكرًا من خلال أضخم مهرجان عرفه الشرق الأوسط وإسرائيل زاتها الرجل يستحق أربعطاشر سنهة شكر تعادل الأربعطاشر سنة شغل القدمها لينا فاهمني أيها الناس إن تنصروا الله ينصركم أها نجي لي شمارات والي الخرتوم كان شفت يا والينا السقط بدا يجينا وبالطريقه دي يا والينا السقط ده حا يودينا يا تغدونا يا والينا يا تغطونا وتحنوا علينا سلك كهربا ننساك كيف والكلب السنة دي إلا يتمسح بالفزلين وإلى لقاء سلك
