في السلك بابكر سلك دخل الطيش ومرق الطيش *ايها الناس *كنا قد بدأنا سلسلة وصلنا بيم السقف المسانده للتجديد لغرزه *مفروض كان نتمها خمسه علي خمسه *ولكن بعد سماعنا لصوت الجماهير من خلال احتفالية التعبئه لتكريم غرزه *ومن خلال اللافتات التي رفعتها الجماهير يوم مباراة الانيق *ومن خلال تبادل التحايا بين الجماهير وغرزه *ومن خلال اختلاط المشاعر المتوهجه بين الشفوت وغرزه *ومن خلال مجالس المدينة المريخيه *بعد سماعنا لصوت الجماهير *قدرنا ان الامر قد انتهي *اصدرت جماهير شعبنا الابيه قرارها *يبقي نقيف في وصلنا بيم السقف 2/5 *المهم *للجميع كانت بصماتهم واضحه علي درب المشوار الافريقي 2015 *الكل وضع بصمته بوضوح *فكانت البصمات مواقع خطوات مشرفه في مسيرة الزعيم الافريقيه *بصمات الجهاز الفني كانت واضحه حتي للعدو *وبصمات اللاعبين صورناها فيش وتفييش وزينا بها جدراننا *اما بصمات الجماهير فكانت الفلنكات التي ثبتت قضيب قطار المريخ الافريقي في مسيرته *لكن البصمه الاداريه كانت اضعف البصمات في مشوار المريخ الافريقي *بصمة الاداره دي في الرقم الوطني ماكان قبلوها *كان قالوا ليهم عيدوها *البصمه ماظاهره *كانت خجوله وغير واضحة المعالم *فجميعنا يعلم ان مجلس الاداره واقعا يعني الرئيس فقط *هو من يجلب المال *هو من يقوم بالمتابعه بنفسه *هو من يقوم بتلافي اخطاء المجلس وقصوره *مجلس حجز لي كورة العلمه ف الجزائر ما قدر يوفرو *مجلس اعضائه يحسنون ارتداء البدل يوم ان يسافروا علي نفقة جمال ليساندوا الفريق *مجلس فيه عضو يخصم من باقي قروش الطعام الوفرها الريس لرحلة مازيمبي *يخصم دين له علي المريخ لايتعدي السته او السبعه الف جنيه *مجلس بعض اعضائه يهاجم المدرب الناجح *وبعملية بسيطه *شيل العضو البهاجم غرزه من لوحة المريخ *هل حدث نقص في لوحة المريخ ؟؟؟ *بالبطبع لم يحصل *بل يمكن كمان الصورة تكون اجمل *طيب شيل غرزه من اللوحه *الحصل شنو ؟؟؟؟ *طيب يبقي الصالح منو يا اعضاء مجلسنا تمومة العدد والطالح منو ؟؟؟ *ايها الناس *حقو اعضاء المجلس القاعدين ساي *يمسكوا خشومهم عليهم ويقعدوا ساي *ايها الناس *بساطه وسذاجه لما يكون الحديث عن مدرب يحارب لاعبو *اذا كان اللاعب بجيب نصر للفريق *يبقي المدرب اول زول بتمسك بيهو *عشان النصر ده المدرب اول زول بينسب ليهو *فكونا من المدرب يخاصم فلان ويحارب علان *وانتم لاتدرون جاهزية اللاعب للمباراه المعنيه *وانتم لاتعرفون التزام اللاعب من عدمه بالتوجيهات الفنيه *وانتم لاتعلمون بطريقة تعامل اللاعب مع الاجهزه الفنيه *ايها الناس *مايو منو وشقة شنو ؟؟؟؟؟ *تاني رجعنا لي زمن مايو ؟؟؟؟؟؟؟؟ *ايها الناس *معدل اللياقه البدنيه لي اولادنا هبط في الفتره الاخيره هبوطا ملحوظا *فهل لتساهل او قصور ادارة الكرة دخل في هذا الخصوص ؟؟؟ *وهل اصرار غرزه علي ان يشرف بنفسه علي المعسكر والوجبات ناتج عن ذلك القصور ؟؟؟ *ان كانت الاجابه بنعم *المقصر منوووووووو؟؟؟؟ *المهم *قدمنا موسما افريقيا ارعب اعداء الداخل قبل خصوم الخارج *وعبارة ريحة المطار طوال الموسم الافريقي كانت تقتل ناس كتار يوماتي *وهم الذين يسرفون في افراح خروجنا الافريقي *لانهم اول الناس قناعة بان المريخ بجيب كاس افريقيا *فعندما حدثت العثره *ماصدقوا *ومدورين احتفالات لليوم *وصلنا بيم السقف *وصدقوني غرزه لو قعد *الموسم الافريقي الجديد بنسقف (اسلابه) *ونشكل كلو طابق بخرطه براهو *وناس الجالوص يظلوا في جالوصهم الدهري *يختوا بمبرهم في ضل العصر *ويصفروا *ايها الناس *ابو الهل حافظ علي ترتيبو ومكانتو *دخل دور الاربعه طيشا *فالاتحاد دخل بي طلطاشر نقطه وخرج من دور الاربعه باربعه نقاط *والمريخ دخل بي حداشر نقطه وخرج من دور الاربعه بتلاته نقاط *ثم مازيمبي دخل دور الاربعه بحداشر نقطه وخرج منه بتلاته نقاط *ابو الهل دخل طيشا بي تسعه نقاط وخرج طيشا بنقطه وحيده وهدف وحيد *ماشاء الله يا محمد عبدالماجد *داخلين طيش ومارقين طيش *مطيشين علي الصفر ده خلي بالك *المهم *طولنا ما سمعنا تصريح لاشرف سيخه *ان شاء الله المانع خير يا الكارديناله اختي !!!!! *ايها الناس *جنينتنا السنه الفاتت ادتنا ثمرة حلوه شديد *منقة العقرب *اصلوا جنينتنا دي كلما تنجض فيها ثمرة بنشيلها طوالي *مرات كتيره بنخليها تنجض في امها *لكن السنه دي شايف لي ثمرتين فاهمات شديد *مابنرجاهم ينجضن في امهن *بنقطفن كده *وبندفنن في شوال العيس ينجضن فيهو *امسكوا الثمر *ايها الناس *علي الحشود الجماهيريه ان لاتنقطع وان تواصل ابداعاتها وان تساند بقوة *فشكر الجهاز الفني وشكر اللاعبين بكون في مواصلة مشوار المسانده والابداع التشجيعي *ومابوصوكم يا شفوت *ايها الناس ان تنصروا الله ينصركم *اها *نجي لي شمارات والي الخرتوم *كان شفت يا والينا *كلمونا وقالوا لينا *ماصدقنا يا والينا *والخوف قرب يودينا *بس حمدنا الله كتير ياوالبنا *لما صحينا *موش الحمد لله كانت حلمه ياوالينا !!! *بس خفنا تاني من احلامكم اعلامكم ياوالينا سلك كهربا ننساك كيف والكلب لما يحلم بجري وهو لسه نائم والي لقاء سلك
