• ليه اسامة عطا المنان بيدينا احساس دائم ان الاتحاد العام دا مشغله زي (الطبلية). • بعمل الحاجة الفي رأسه. • تحويل رصيد. • تحويل نقاط. • تحويل بطولة. • رفع ايقاف. • عقد جمعيات عمومية. • تسجيل ب (الواتس اب). • وكالة سفر. • بتشعر ان معتصم جعفر ومجدي شمس الدين قاعدين في الاتحاد العام بيتموا بيهم (النزول) بس. • موش مرات نزولك بكون ما تام ..تقوم تنزل (الشائب). • ولو اتعصرت شديد كدا تنزل (الجوكر). • النزول يبقى ليك ملح – ملح. • و • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). • قالوا ليك (انبوبة الغاز) بقوا يجيبوها مع (صيغة) العروس. • الغريب ان معتصم جعفر طلع في قناة الشروق يدافع عن (تاكس) وكالة سفر اسامة عطا المنان اكتر من دفاعه عن المنتخب الوطني. • اول مرة اشوف معتصم جعفر بنفعل ليه في موضوع. • كل هذه الانفعال عشان وكالة سفر. • الله يرحم الفريق القومي السوداني. • يا معتصم قول الزول دا بيدينكم ..هل يعني ذلك ان يفعل فيكم اي شيء.. • يعمل اي حاجة عاوزها. • يعني عشان بيسلفكم. • الشيء الما عارفنها انتوا ..وبقولوها ليكم في (البرد) دا – اسامة عطا المنان بيدين المنتخبات السودانية ب (السوداني) وبرد ليه الاتحاد العام حقه ب (الدولار). • يعني بيسلفنا بالجنيه وبيسترد الدين بالعملة الصعبة. • وبعد دا كلو بطلع معتصم جعفر يشكر في اسامة عطا المنان في قناة الشروق. • امين خزينة الاتحاد العام ماسك (الدولارات) دي كلها – عاوز يشتغل ليكم ب (الجنيه) السوداني. • اغرب حاجة ..معتصم جعفر قال كل الاندية بتسلف من اسامة عطا المنان ..وهو يقصد الهلال والمريخ..وكأن ذلك مبرر كافي عند الدكتور ان يتسلف الاتحاد العام من اسامة عطا المنان. • قول بسلفنا ..يسوط الدنيا دي كلها. • الاتحاد دا حقو. • يعمل فيه الشيء البتريحو …عشان قاعد يسلف المنتخب الوطني. • يا دكتور ممكن الاندية تتسلف من اسامة عطا المنان وتسافر عبر وكالته لكن الما ممكن ان يتسلف اسامة عطا المنان وهو امين خزينة الاتحاد العام من وكالة السفر التى يملكها. • في زول بتسلف من نفسو. • ما ح تكون في عدالة ولا امانة في الحتة دي ..(والموضوع دا ولا عاوز ليه درس عصر). • ولا عاوز ليه جدول ضرب. • ما تقعدوا تشرعوا فينا ساكت – وتقطعوا ليكم حاجات من رأسكم. • ما تخترعوا لينا قصص براكم. • شغلكم دا بجيب الكلام!!. • هل يمكن ان يكون اسامة عطا المنان (محايد) في هذا الموضوع ..وهو شغال بي طريقة (زيتنا في بيتنا). • و • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). • في حاجة تانية ما قادر استوعبها. • قدر ما نزلت (الرابط) حقها ما وقعت لي. • الرابط دا فيه حاجة. • ناس المريخ من يوم 15 نوفمبر الى وقتنا هذا كل يوم بقولوا ليك : (المريخ يسجل بكري بشير اليوم). • كل يوم بقولوا كدا. • بكري بشير دا (عقد الجلاد). • معقولة كل يوم بتكضبوا على الناس وبتأكدوا في صحف المريخ ان المريخ سوف يقوم بضم (بكري بشير) اليوم. • بكري بشير قبل ما يتسجل بقى اشهر من امير كمال. • اذا كان بكري بشير قبل ما يتسجل بعمل فيكم كدا – طيب وقت بتسجل بعمل فيكم شنو؟. • غايتو يا ناس المريخ جابوا ليكم (لجنة تسيير) – فاكرة تسجيل اللاعب بيتم في (الجرايد). • وفاكرين (الصورة) مع اللاعب تكفي. • هسع عليكم الله (الوك) دا سجلوه كم مرة؟. • البسمع ب (الخطف) و (الضربة القاضية) يقول عندهم قروش. • وهم يا حسرة قروش ل (اباذر) لاعب الرديف 25 الف جنيه فقط ما عندهم. • بقوا يضاربوا ويقالعوا في 25 الف جنيه. • اللاعب يخطفوه وما يقدروا يسجلوه. • يا ناس المريخ اقول ليكم معلومة مفيدة وقاطعة ..وممكن تستفيدوا منها في الموسم القادم. • اسامة عطا المنان ممكن يرفع ليكم الايقاف. • وممكن يعتبر ليكم تسجيل لاعب في نادي اخر ما صحيح ويمنحكم نقاط المباراة. • وممكن يقول ليكم اللاعب الفلاني ضرب ليه حكم بونية ويعيد ليكم المباراة. • لكن ما ممكن يسجل ليكم لاعب. • تخطفوه. • تجيبوه من جوبا. • من سقط لقط. • اسامة عطا المنان ما بقدر يعمل ليكم حاجة. • بعدين اسامة موضوع فيه (دفع) ما بكون معاكم فيه. • بساعدكم بالتجاوزات. • لكن (قرش) ما بدعمكم بيه. • لو جاملكم شديد بيسلفكم. • و • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). • الحاجة التانية وما قادر افهمها الى الآن ..حكاية ناس الارصاد ديل. • ناس الارصاد …(والموضوع دا ما عندو علاقة بالتسجيلات)..ناس الارصاد قالوا في الجرايد ان موجة برد قارسة قادمة على البلاد الاثنين القادمة. • يعني الاثنين الفاتت دي. • ما شفنا لينا اي موجة. • الناس ديل (قارسة) دي قاصدين بيها البرد وإلّا قاصدين بيها الغاز؟. • ما شفنا لينا اي برد. • كلامهم طلع كلام جرايد ساكت. • بالمناسبة في ناس بتلوم الجرايد على الكلام دا …والجرايد ما عندها اي ذنب. • الخبر مصدره ناس الارصاد ..والجرايد نشرت كلامهم ونقال الكفر ليس بكافر. • يوم (القفلة) – قفلة السيستم …لاقت لي واحد جاري شديد. • قلت ليه يا زول مالك جاري كدا ؟…الحاصل شنو؟. • قال لي الليلة في (برد) – وخايف البرد دا يقوم يؤثر على (السيستم) يقوم ناس الاتحاد يقفلوا لينا السيستم دا من عشرة. • قلت ليه يا زول (البرد) ما عندو اي علاقة ب (السيستم)…ناس اسامة عطا المنان ما يقعدوا يشرعوا ليكم ساكت. • لو البرد دا جاب ليه (جليد)…ما بقفل (السيستم). • لكن اقول ليكم الجد ..سيستم ناس اسامة عطا المنان ما مضمون. • سيستم دا زي (كوبري النيل الابيض) ممكن يقفل في اي لحظة. • لو في عربية اتعطلت ساكت في شارع (القصر) تقفل ليك الكوبري. • هسع في علاقة بين عطل عربية في شارع القصر وقفلة كوبري النيل الابيض. • لو ما ساي. • السيستم شغال بي نفس الطريقة. • بي مزاج اسامة ومجدي والطريفي الصديق. • يا زول الطريفي قاعد ساي ..ما عندو اي دور. • و • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). • الاتحاد العام ..بواسطة اسامة ومعتصم قام مدد التسجيلات..عشان المريخ يلملم ليه قروش لي بكري بشير وعطرون والوك. • انتوا عارفين لو المريخ ما سجل الجماعة ديل في هذه الايام – ناس معتصم جعفر تاني ممكن يدوهم اسبوع. • و • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). • احكي ليكم قصة ما عندها علاقة بالتسجيلات. • في واحد قال لي لو اللغة العربية دي ما فيها حرف (العين) وحرف (النون) الناس دي كانت بتصرف كيف؟. يعني ح تقيف على العين والنون. • ……………. و • ننتظر مفاجأة (الكسكتة). • العملية القادمة اسمها (تحت القبعة). • وننتظر نشوف البحصل شنو؟. • ان شاءالله لاعب في الرديف. • اصلو ما عندنا مشكلة. • و • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). • …….. • السيدة (ل) – ريحة البصل ما مشكلة …المشكلة السعر. • وقرّط على كدا.