الهلالاب تخوفوا بعد الخروج من مرحلة دور ال (32) في البطولة الافريقية ان يكرر اشرف الكاردينال تجربة جمال الوالي في المريخ. بقيت اشوف ليك محمد عبداللطيف هارون ..ابوجريشة – ابوجريشة. وبلة جابر بقى يتراوح لي في اتير توماس. كمال دحية ذاتو بقى يدافع عن الهلال. الجماعة ديل ما خلوا ليكم اي حاجة. بقى ما في اي فرق. نحن لو عاوزين نشارك في سيكافا ما كان سجلنا موسى الزومة من اول. كان تجيبوا بلة جابر. وتريحونا من الكلام الكتير دا. والله دا الفضل. عشان المشاركة على الاقل تكون (منطقية). الكاردينال ما فاضل ليه إلّا يقول لينا (العارف عزو مستريح). عمل اي شيء. الهلال ما المريخ. كشافاتك دي لو بتولع بالموية – الهلالاب ديل ما بقتنعوا ليك. ولا بجاملوا في الهلال. ولا بقبلوا تطبق لينا تجربة جمال الوالي في المريخ. الكاردينال بقى يعمل في نفس الحركات. انا بدفع من جيبي. وانا بعمل.. وانا جيب الكشافات. ويهمش ليك في المجلس. وشغال (شطب) اثناء الموسم. شطب اثناء الموسم – والله نحن في برامج الكاميرا الخفية ما قاعدين نشوفو. ولا قاعدين نسمع بيه. الزول لو (بشطّب) ليه في عمارة ما بشطبها بالطريقة دي. الكاردينال شال ليك ابيكو وسيسه ونيسلون مع (الدكاكين). كمان جابت ليها (سيكافا). والله دا الفضل. موضوع (سيكافا) دا – اصلو ما بنفوتو. ولا بنخليه. ممكن نجامل في اي حاجة – إلّا سيكافا. ما نشرب شاي. نخلى القهوة. نطلع من دور ال (32). ممكن نستحمل الحاجات دي كلها. إلّا سيكافا. سيكافا شنو كمان؟. انتوا بتلعبوا على منو؟. في زول بقرأ طب بالمساء. الشعيرية بالخضرة ما سمعنا بيها إلّا عندكم. هسع عليكم الله بعد (سيكافا) دي – فرق اشرف الكاردينال من جمال الوالي يبقى شنو؟. ما في اي فرق. اتوقعوا من الكاردينال في اي لحظة (العارف عزو يستريح). بعد كدا اصلو ما بنستغرب لينا من شيء. ممكن يمشي يقعد في بيتو 6 شهور. ويرجع تاني. ممكن يستقيل. ويرجع. ح يعمل لينا في نفس حركات جمال الوالي. الغريبة الهلالاب بقوا يشكروا في (سيكافا). جابوا ليهم نفس. كمان نحن ما بنعرف سيكافا. الكلام دا قولوه لى عزام. سيمبا. وقد الصومالي. الكلام دا ما بقولوه للهلال. جرايد الهلال بقت زي (الصدى). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). المريخاب (14) سنة عايشين في الجو دا – نحن في اول سنتين – ثبتنا (الكاردينال) في مكانو. جمهور الهلال ما بقبل بالحاجات دي. كلو شيء ولا تكرار تجربة جمال الوالي في الهلال. هو نحن في المريخ تجربة جمال الوالي عاملة لينا (مغصة)…يجي الكاردينال ويطبقها لينا في الهلال. في الهلال الحاجات دي طبعا ما بتنفع. الكاردينال دا لو خليتوه على الحالة دي …ممكن بابكر سلك بكرة تشوفوه في الهلال. وكبد الحقيقة. وكابو ذاتو بيظهر. ديل ناس (سيكافا) جارية في دمهم. لو نظمتوا سيكافا مسكوا مزمل ابوالقاسم اللجنة الاعلامية. بيجيه ليكم سيكافا. يطلعها ليكم زي (كأس العالم). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الشيء الذي يؤخذ على الكاردينال انه بدأ يعتمد على (جيبه)..وبدأ ينظر على انه الشخص الوحيد الذي يدفع في الهلال. الكاردينال بقى يتكلم عن (جيبه) كتير. الكاردينال بقى يظن بما انه هو الذي يدفع كل هذه الاموال فان له ان يفعل ما يشاء ..كما يفعل جمال الوالي في المريخ. الموضوع ما كدا. فات على الكاردينال ان شعب الهلال ما زي شعب المريخ ..وان ما يفعله جمال الوالي في المريخ …الهلالاب (اسبوع) ما بصبروا عليه. احسن الحاجات تكون واضحة للكاردينال. جمال الوالي في بداياته في المريخ كان بسجل وبشطب ..وبشيل الجهاز الفني للمريخ كل (40) يوم. من بعد تعلم جمال الوالي وتخلى عن عادته في الاحلال والابدال ..واصبح يصبر على الاجهزة الفنية لذلك حدث تقدم في المريخ. الكاردينال الآن عاوز يسير على ما بدأ منه جمال الوالي ..وليس ما انتهى عنده ودي تبقى المشكلة. الكاردينال بيشطب ويسجل. وبشيل الجهاز الفني. نفس الحاجات الكان بعمل فيها جمال الوالي في سنواته الاولى في المريخ. الموضوع اخطر من ذلك. الموضوع تصووا جاب ليه (سيكافا). هي حصلت كمان. والهلالاب بقوا يتكلموا عن سيكافا. بطولة ممكن تكون اعداد للهلال. وبتساعد في بناء الفريق. سيكافا ما كعبة. ممكن تكون احتكاك. وممكن تشكل تجارب مفيدة للهلال. دا كلام الهلالاب. نفس الكلام الكانو بقولوه المريخاب في سيكافا. كمان نحن سيكافا ما بنعرفها. سيكافا دي محاولة لشغل الناس ساكت. زوبعة اعلامية ما اكتر. لا فيها فايدة ولا حاجة. تعملوها مجموعة واحدة. تعملوها مجموعتين. تعملوها عشرة. برضو ما بتنفع. ولا بتقنع ليها زول. يعني ح تولعوا الانوار. وتطفوها. وتنقلوا المباريات بالتلفزيون. وتعملوا كلمة افتتاحية للبطولة. وتسخنوا البطولة في الجرايد. الكلام دا نحن جربناه. وشفناه. حافظنو حفظ. الفيلم دا شاهدناه في المريخ. عشان كدا ما بمشي علينا في الهلال. الهلالاب ما فاضل ليهم إلّا يجيبوا همد وعبدالصمد. ومتوكل احمد علي. والله بعد كدا لو شفنا الجنيد شايل طبلتو في مباريات الهلال ما بنستغرب. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الحاجة البتخوف. وبتخلى الهلالاب يشيلوا هم. الجوهرة الزرقاء عاوزة تبقى لينا زي الطابق التاني بتاع المريخ. نفس الشيء. الصور. والتصريحات. وسيكافا. عليك الله بعد كدا يا الكاردينال خليت شنو لي جمال الوالي؟. غايتو لو بيقتوا مصرين على (سيكافا). وكان لا بد منها. سيكافا دي تلاتة طوابق في الجوهرة الزرقاء ما بتمرقكم منها. عاوزين تشاركوا في سيكافا ..اعملوا ليكم طابق اضافي في الجوهرة الزرقاء. اعملوا الطابق الرابع. ممكن بعد الطابق الرابع تشاركوا في سيكافا. تلاتة لا بتمرقكم ولا حاجة. طعموها شوية. الاحباط دا – إلّا طابق رابع – عشان الهلالاب يمرقوا منو. سيكافا براها ما بتمرقكم. لكن لو المواضيع مشت على المنوال دا …الهلال دا ألحقوه ب (ونسى) سريع. ما بنتتظر سيكافا. شوفوا ليكم قروبات تتبرع ليكم. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). …………. و عبدالمحود ابوشريعة (الخواجة) امس تابع دربي شندي الاهلي والنيل من المقصورة. عاد عبدالمحمود. عودة عبدالمحمود بعد رحلة علاج طويلة – افرحت الشنداوي واسعدتهم. عافية كورة شندي في عافية عبدالمحمود. الرشيد عثمان علي المصرف المعروف كان قد تنازل من الترشح كامين عام للاهلي شندي في الجمعية العمومية الاخيرة تقديرا لاحمدونا. غير ان الصراعات بعد ذلك نسفت المجلس المنتخب ليتم تعيين لجنة تسيير للاهلي شندي. الاهلي امس انتصر في دربي شندي على النيل بثلاثية. والهلال يواجه النيل الخميس القادم. غدا يغادر الهلال الى شندي. نتمنى ان تكرم بعثة الهلال لاعب ساردية ودرة شندي عبدالمحمود ابوشريعة. الخواجة من افضل المواهب التى قدمتها الملاعب السودانية. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). …….. السيدة (ل) – جدول سبعة قالوا فيه تغييرات. وقرّط على كدا.
