تعجبني قصيدة عبدالقادر الكتيابي (علي كيفي) والتى خرج فيها عن (النص) ليكون غريبا في كيفه. قعد فيها برة المألوف. ورقع جلبابه..ولم يصفق لاحد. المهم. ما عاوز اكلمكم عن القصيدة. ولا عن الكهربة. لكن عاوز اكتب الليلة على طريقة (علي كيفي) – عشان الموضوع يبقى ليكم واضح. ليكم وللبطيخ. والطيب ود شلخ الشجر. ح تخلوا اي حاجة – وتقولوا لي (الطيب ود شلخ الشجر) دا منو؟. ما بخصكم. على كيفي ..اقطعوا ليكم من (رأسي) دا ..ولو عندي سلطة ..اقرروا ليكم في تاريخ الشهادة السودانية. مرة في امتحان الجغرافيا ..قالوا لينا كم عدد (علب الساردين) في مدينة بورتسودان؟. نحن خلينا الاجابة فاضية – إلّا طالب واحد كتب (929) علبة. الاستاذ ..خلانا كلنا ومسك ليك الطالب دا وقال ليه في ست علب مشت وين؟. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). لو سألوني وقالوا لي نجم مباراة الهلال والاهلي مدني امس كان منو؟. ح اقول ليكم (شيبوب). ح تقعدوا تعترضوا ..وتقولوا الكلام دا ما منطقي – ح اقول ليكم اول ناس المريخ ديل وقت كان بوزعوا (جوائز المباراة) حسب مزاجهم لرفع الروح المعنوية للاعب (المحبط) كان في زول قاعد يسألهم. مرة يمنحوها اكرا. ومرة كوفي. ومرة عمر بخيت. ولا في زول بيستحقها. نحن الهلالاب – نجم مباراة الامس بين الهلال والاهلي مدني عندنا شرف الدين شيبوب. على كيفنا ..نمنحها شيبوب ..او نحجبها منو؟. ما في زول بيسألنا. ولا في زول بقدر يقول لينا حاجة. ما تقولي لي شيبوب في (شيببة القيروان)…انتوا مصدقين (الماكينة) دي. شبيبة شنو كمان؟. شبيبة على الكاردينال. ح تقولوا لي شيبوب في (تونس). ح اقول ليكم تونس دي عند الكاردينال اقرب من (شمبات). تونس علي منو لكن؟. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ولو اتكلمتوا كتير. وكلامكم كتر. الاهداف ذاتها بنقول جابها (شيبوب). وضربات الجزاء عملوها مع (شيبوب). شيبوب وكاريكا ما بيناتهم الحاجات دي. الحالة واحدة. انتوا شيبوب دا عملتوه قفز من الطابق الرابع. واتسلق مواسير الفندق. وعبر 4 مطارات بدون جواز سفر. كتيرة عليه يعني يسجل ليه هدفين. وقت قلتوا قفز من الطابق الرابع – في زول كان سألكم. اشمعنا هسع (اهدافو) بقت ليكم حارة. زمان جابوا لينا في امتحان (الانشاء)…موضوع. قالوا لينا في ورقة الامتحان اكتبوا عن (فصل الخريف). زمان كان اكتر حاجة مدهشة (الخريف). لا في واتساب ولا بيتزا. اي موضوع انشاء ..بقولوا ليك (اكتب موضوع انشائي عن الخريف). وتقعد تتجدع. اتذكر ..الناس كلها كتبت عن (فصل الخريف)..إلّا طالب واحد كتب ليك موضوع عن (منصور بشير تنقا). الاستاذ قال ليه دا شنو البتعمل فيه دا؟ …منصور بشير تنقا الجابو هنا شنو؟. الطالب قال ليه ..والجاب (الخريف) في فصل (الصيف) شنو؟…خريف شنو البنكتب ليكم عنو في الصيف. خريف زمان ..كلو بتكون فيه (مطرة) واحدة. والباقى بنتمو ب (في مطرة قريبة). الهوا دا هوا مطرة صابة في حتة. نتمو دعاش ساكت. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). لو سألوتني ..وقلت لي امس كاريكا عمل شنو في مدافع الاهلي مدنى؟. ح اقول ليكم مدافع الاهلي مدني امس بدل فانيلتو (21) مرة – اثناء سير المباراة. وح اقول ليكم …كاريكا امس عمل (موجات صوتية) للمدافع. الصورة طلعت (نضيفة). وعمل ليه (رسم قلب). الحمدلله – الصورة طلعت نضيفة. وعمل ليه (منظار). والصورة نضيفة. طيب المشكلة وين؟. المشكلة في (لجنة الاستئنافات). غايتو لو عاوزين شورتي ..المدافع دا بعد (الصور) دي ..يمشي طوالي يفتح ليه محل تصوير مستندات. ويقعد فيه. من حتتو دي يمشي على ناس ضفر ..وعلي جعفر. وعطرون ذاتو. ويقول ليهم احسن من بدري ..تشوفوا ليكم (بلد). الزول دا لو لاقكم في (السوبر) في السعودية من اول ربع ساعة السلطات السعودية ح تكشكم. ولو قابلكم كمان في قمة الممتاز ..إلّا تجيبوا (سمير فضل) يقيف ليكم حارس مرمى. الزول دا تاني إلّا حارس. انتوا تعالوا هنا بمناسبة الحارس دا ..جمال سالم دا ..كان لغاية الموسم الماضي جمال سالم. جمال سالم هسع بقى جمال زايد. الزول دا مالوا بقى (6) ضلف كدا. معقولة في حارس بالحجم دا. جمال سالم ..بيلعب بعقلية الحركات المسلحة في يوغندا…الزول دا في اي مباراة عامل ليه مشكلة. يا جمال سالم ..عاوز اسألك سؤال ..انت وبكري المدينة. في علاقة بين الفلس والاضانين الكبار. مالها اضنينكم بقت كبيرة كدا ..وقت جمال الوالي فات من المريخ. حارس كلو (اضنين). قالوا ليك الولد البيلقط الكور ..البقيف ورا القون ..امس وقت الكورة تطلع بيجري بعيد عشان يجيب الكورة…بتقوم تعتر ليه (اضنين) جمال سالم ..اقصد جمال زايد. وكان لي بكري المدينة …زولكم من (الفلسة) الضربت المريخ ..فانيلتو تقول كان شغال بيها (نقاشة). زولكم علي جعفر ..طبعا بقى زي المدرب…بعد اي مباراة مجلس المريخ واعلامه بجدد فيه (الثقة). اقول ليكم شيء في المفيد. علي جعفر دا تقابلو بيه كاريكا. او ولاءالدين. او الثعلب. او وليد الشعلة. او صلاح الجزولي ذاتو. في مستشفى او عيادة خارجية ..بطلعوه ليكم (الشفوت) ديل ما عندو اي علاقة بالكورة. او الكوتشينة. او الضمنة. او شليل وين راح. ناس كاريكا ديل ما بعيد ..لو قابلوه في (السوبر) يرخصوه ليكم (لاعب سلة). دا لو جاملوكم فيه. غايتو ..علي جعفر دا ..مفروض يضمنوه مع (انابيب) النفط. مفروض يدفعوا فيه (رسوم عبور) للاهداف. علي جعفر دا ..خلوه لينا كدا – عليكم الله. وقابلوا بيه كاريكا. وخلوا الباقى عليه. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الشيء الما لاقي ليه تفسير. ولا منطق. ولا واقع لي. اذا كاريكا بدون الجوهرة الزرقاء ما تكتمل بيعمل كدا ..وقت الجوهرة الزرقاء تكتمل بيعمل شنو؟. حالتها دي بدون (الجوهرة الزرقاء). خلاصة الكلام. الهلال بحمد الله وفضله ..حافظ على شباكه (نظيفة) وبقى (مكسيم) مطبقا لشعار الحارس مالنا ودمنا. شباك المريخ امس استقبلت هدف من مريخ الفاشر. ليبقى التميز للهلال فقط. صدارة. وشباك نظيفة. الهلال نعمة والله. كافالي يمضي بخطوات ثابتة …وبحقق في (ارقام) ان شاءالله سوف تكون قياسية. المستوى ارتفع كثيرا في مباراة الامس. وان كان لم يصل الى المستوى المطلوب كما اشار كافالي. سرتنا شهادة كافالي في (الشغيل). هذه الشهادة ..بتأكد ان كافالي شرب الهلال. وانو خطير في الاكتشافات…وبعرف يقدر لاعبيه. تألق بشه بصورة خيالية في مباراة مريخ كوستي. وتألق كاريكا بصورة خرافية امام الاهلي مدني امس. وظهر الشيخ موكورو بمستوى مدهش. وكان ابيكو في منتهى الألق. قبلهم ادهشنا عمار الدمازين. وقادم بقوة ولاءالدين. كافالي امس قدم بشه الصغير ..وهذا يعني ان المدرب عينه خطيرة. في الانتظار صهيب الثعلب. اذن نحن على موعد مع (الدهشة). ………. و ألتراس الهلال بقدم في شغل كبير ..ابداع وروعة وجمال. لا بد من العودة للحديث عن اولئك الشباب الذين يجمّلون مدرجات الهلال باروع اللوحات. الشيخ موكورو وابيكو كانوا من نجوم مباراة الامس. ولا خلاف طبعا في كاريكا. مباراة الهلال امام الاهلي شندي سوف يرتفع فيها مستوى الهلال بصورة اكبر. اجمل ما في كافالي صبره على صلاح الجزولي. الجزولي قادم ان شاءالله. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). …….. السيدة (ل).. 4 عجورات + 14 قرعة = بطيخة. وقرّط على كدا.
