بي صراحة كدا ..حكاية (الطابق الثالث) في الجوهرة. وموضوع (الدكاكين). شالوها. رجعوها. بقت ما بتغطي معانا. ولا بتقنع ليها زول. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الفيلم دا دخلناه قبل كدا. الكشافات من المانيا. من فرنسا. من انجلترا. ما بتهمنا كتير. يفكوها. يركبوها تاني. صواميلها ناقصة… صواميلها زايدة…(ما بتخصنا). عاوزين (كورة) نحن. كل الحاجات دي نحن (الهلالاب) بدون (كورة) ولا بنشتغل بيها. تركبوا ليكم كشافات (سحرية). تولع وتطفي براها. ما بتخصنا كتير. بدون (كورة) نعمل بيها شنو؟. الكشافات دي بتجيب لينا قون؟. وقت ما بتجيب قون نعمل بيها شنو؟. شاخور قال كيجاب لو بشرب البحر وما بغلب الهلال ..ما عاوزنو. ونحن بنقول نفس الشيء للكاردنيال ..كشافات ..او جوهرة بدون (كورة) ما بتنفع. ولا بتخارج. اولا الكورة. وثانيا الكورة. وثالثا. وبعد داك نشوف الجوهرة. الجوهرة الزرقاء تبقى (21) طابق …ما بنعاين ليها. تعمل ليك (اكاديمية). تخرج منها باكات (اطباء) عديل. ما بخصنا. عشان كدا الكاردينال عليه التركيز اولا واخيرا في فريق الكورة. جوهرتو دي ممكن تروح ساكت ..اذا الهلال خسر او بقى يخرج من الادوار الاولى للبطولة الافريقية. الكاردينال عليه ان يكون ذكي ..ويحسّن الفريق ويقويهو ..عشان (الجوهرة الزرقاء) يبقى عندها طعم. وعشان الناس تفرح بها ..وتحسبها (انجاز) للكاردينال. اي تراجع لفريق كورة القدم سوف يكون خصما على الجوهرة الزرقاء. الموسم الماضي ضحينا بالممتاز. والسنة دي بالبطولة الافريقية. والكاردينال الى الآن بتحدث عن الجوهرة. الحساب تقل يا ريس. اشرف الكاردينال بقوم بالكثير من الاعمال وبجتهد في كثير من الملفات…نعرف ذلك. ولكن ما معنى ذلك الاجتهاد اذا كنا بنفقد الممتاز. ونطلع من دور ال (32). الكاردينال تنقصه (الخبرة) في التعامل مع ملف المحترفين والاجهزة الفنية. سوف نظل نكرر ونعيد هذا العيب حتى يتجاوز الكاردينال نقاط ضعفه ويحقق ما يصبو له في الهلال. المكابرة والمغالطة ..لن تجعل من الكاردينال رئيس (نموذجي) للهلال. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الموضوع الآن بي صراحة ما موضوع (الجوهرة الزرقاء). ولا موضوع الدكاكين. ولا الكشافات. الحاجات دي وقت يكون تواجدها في الجرايد بتبقى عواقبها وخيمة على الهلال. على الكاردينال ان يتحرك في ملفاته المعمارية بعيدا عن الصحف والصور. انجز هذه الانجازات بعيدا عن (الشو) حتى تكبر فرحتها عند الهلالاب. قبل مباراة الهلال والاهلي الليبي زحمنا بموضوع (الكشافات) حتى ان ذلك افقد الهلال التركيز. واعلام الهلال وجمهوره ومجلس الادارة بقى منصرف كليا نحو (الكشافات) حتى ان ذلك انسانا فريق الكورة. ليعود علينا ذلك بالخروج من البطولة الافريقية من دور ال (32). الآن يستحسن وفي مصلحة الكاردينال نفسه ان ينجز ملفاته تلك بعيدا عن الاعلام. حكاية (الكسكتة) بقت ما بتجيب حاجة. الناس ممكن تقبل هذا شهر. شهرين. لكن الموضوع ما يبقى الموسم كله (كسكتة). لا بد ان يعي الكاردينال ذلك ان اراد ان يصنع له تاريخ في الهلال. ما في حاجة بتفرح الهلالاب اكتر من البطولات والانتصارات الحقيقية. سيكافا دي ولا بنغشكم بيها. ولا يتخدعوا بيها الناس. عاوزين الهلال يشارك فيها ويكمل بيها اعداده فليكن ذلك من غير تضخيم اعلامي. من غير ان يصنعوا منها بطولات وانجازات كما يفعل اعلام المريخ. اذا اراد الكاردينال ان يكون جمال الوالي اخر في الهلال هو حر…. اعلام الهلال لن يكون اعلام المريخ. يمكن ان تجد من يناصرك في ذلك. وممكن تجد من يساندك ويقتنع بما تقوم به. ذلك قد تجده في الاعلام وفي الجمهور. لكن لن يكون هناك اتفاق على الاخطاء في الهلال. ولن تكون هناك مجاملة..او مهادنة. لن نجعل من سيكافا (معجزة). لو الحكاية خلصت على (سيكافا)..وتقلصت طموحات الكاردينال واحلامه على تلك البطولة المصنوعة يبقى على الدينا سلام. ليس في سيكافا انجاز. الموضوع دا عماد الطيب ممكن يقوم بيه. وان قصدوا بها (الاعداد)..واستفادة عناصر الشباب منها – فاننا منذ الآن نراهن بان مشاركة العناصر الشابة في الهلال سوف تكون محدودة. وان شارك الهلال فيها كليا بعناصر شابة فان الهلال سوف يخسر البطولة وسوف يخرج من ادوارها الاولى وسوف ينعكس ذلك سلبا على الهلال. مجلس الهلال ما بصبر. لو صبرت الجماهير والصحافة ..المجلس ما بيصبر. الهلال الآن يفتقد لعناصر البطولة. وعناصر التقدم في البطولات الافريقية والاقليمية لأنه يفتقد للاستقرار الفني. ولأن مجلس الهلال يمكن ان يطيح بالجهاز الفني للفريق في اي وقت. بل يمكن ان يطيح الكاردينال باللاعبين اثناء الموسم. وكما اطاح المجلس بمجموعة من العناصر الوطنية في الموسم الماضي بقيادة عمر بخيت والمعز محجوب ومهند الطاهر وخليفة ..اطاح المجلس هذا الموسم بثلاثة محترفين اثناء الموسم. هذا التعامل ..لن يصنع بطولات. واذا فشل مجلس الهلال في تركيب (كشافات) ومازال الى وقتنا هذا يفاوض في موضوع (الدكاكين)..فهل يمكن له ان يصنع فريق بطولات. نتمنى ان يستفيد الكاردينال من تلك الاخطاء وان يتعلم منها بدلا من ان يصور (بطلا) في كل قراراتها. في الموسم الماضي انسحب الهلال واعتبر الكاردينال بطلا على هذا القرار. سانده جميع الاهلة في هذا القرار. وانصرف الكاردينال كليا نحو نفسه ..واصبح يكرم تارة في بورتسودان وتارة في عطبرة. ومرة في استاد الهلال. لمن صدق. للاسف الشديد كل هذه (التكريمات) اتضحت لنا الآن انها تكريمات شخصية. تكريمات تخص الكاردينال وحده ..وفي حقيقة الامر الهلال كان هو المتضرر منها. الآن خرج الهلال من دور ال (32) في البطولة الافريقية بعد الاطاحة ب (كافالي) ثم الاطاحة بثلاثة محترفين اثناء الموسم. هذه القرارات او ذلك الخروج ليس فيه بطولة للكاردينال. وليس هناك (انجازا) يحسب له في ذلك. الموضوع ما عاوز ليه (كسكتة). مطلوب من الكاردينال ان يخرج الهلال من هذا النفق ..بتسجيلات حقيقية في مايو القادم. التسجيلات تبقى لها 35 يوما ..يفترض ان يكون الكاردينال قد استفاد من تجاربه. لا نريد ان يتعاقد الهلال مع محترفين في مايو القادم يستغنى عنهم الهلال في يوليو من نفس العام. نريد محترفين على مستوى ..لهم اسمهم ومكانتهم ونجوميتهم في القارة كلها. الهلال يحتاج لثلاثة محترفين لهم ثقل في القارة السمراء. نحتاج لذلك قبل الجوهرة الزرقاء. وقبل سيكافا. لا نريد محترف يتم تجميعه في (الامارات). ما عاوزين لينا محترف يصنع في (مطار الخرطوم). محترف نتمو موية. وصور. وكسكتة. محترف يصل سرا منتصف الليل. ويلبس (الكسكتة) تاني يوم. الحاجات دي خلاص ..تاني ما بتعد علينا. نحتاج الى عناصر قوية تشكل اضافة كبيرة للهلال. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). في التسيجلات القادمة ..دعونا نقول ان (شيبوب) يمكن ان يشكل اضافة جديدة في الهلال. دعونا نقول ان شيبوب ممكن ان يبدل لغة الاعلام ويمكن ان يعيد الفرحة للهلالاب. الحكاية ما كشافات. ولا طابق ثالث. الموضوع اكبر من كدا. منشآت بدون فريق ..سوف تكون مثل (المدينة الر ياضية). لا بد ان يلحق الكاردينال نفسه بتسجيلات مايو. نبحث ان يكون للجوهرة الزرقاء طعم. عاوزين نفرح بالكشافات. ولن يكون ذلك إلّا بفريق يهز الارض. فريق قادر على ان يحسم اي مباراة في 5 دقائق. نملك عناصر شابة جيدة. نملك مواهب مبشرة. لكن كل ذلك لن يجنى منها شيئا ان فقدنا الاستقرار الاداري والفني. نحتاج الى الاستقرار الفني اولا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ……….. و مهم جدا ان ننتصر اليوم في شندي. الاستهتار او التهاون امام النيل يمكن ان يفقدنا نقاط المباراة. النيل فريق ما ساهل. وبلعب كورة. واي فريق امام الهلال بتكون عنده دوافع خاصة. خاصة ان ظروف الهلال هذه الايام محفزة للاندية التى تلعب امام الهلال. ننتظر نقاط شندي الثلاث. عشان نقلب الصفحة. ونمشى خطوة الى الامام. …….. السيدة (ل) – دموع البصل ..اصدق من دموع التماسيح. وقرّط على كدا.
