مرة كدي قعدنا في عشرة ونسة مع الدكتور عبد الحليم المتعافي في مكتبو، والونسة ما شاء الله مدوِّرة، وماشة باسطة بس، قمت لي التكتلني قلتا ليهو يادكتور نحنا شايفين إنو المؤتمر الوطني زي بلع الحركة الإسلامية زُت، لاكين المؤتمر الوطني في ناس بلعتوهو زاتو بدون موية، الكلام دا عليك الله ما صاح، يعني ما لاحظتو؟!!! يازول إنتا ما نصيح، دا كلام شنو البتقول فيهو دا يا خي نحنا هسي ما صدقنا طلعنا من القطن ود الحرام دا يقصد المحور ، تقوم تجيب لينا تاني بلعو وما بلعو، الكلام دا أنا ماعندي فيهو شغلة... المتعافي قال مرة سأل واحد من أولادو قال ليهو بتعرف الطايوق، قال ليهو والله يا أبوي ما بعرفو.. المتعافي قال ليهو يا ولد كيف ما بتعرفو يا خي ما البمسحو بيهو الدوكة، الولد قال ليهو: والدوكة زاتا شنو يا أبوي... منو العوض وليهو العوض.. يا ولدي جدك محمد جزار، وأبوه إسماعيل جزار، وأبوك إنتا زاتو اللي هو أنا جزار، وبرضو ما بتعرف الطايوق!!!! بعد شويتين جا خاشي واحد شكلو كدي باكستاني والله أعلم، ولمّ ليك في المتعافي دا، أسئلة من شاكلة: حبوبتك اسمها منو، ولدوها سنة كم ؟، وجدك اسمو منو ولدوهو متين، أنا اتخيلتا المتعافي يقول ليهو عام الرمادة والاّ الفيل، لكن الحق لله المتعافي جاوب الراجل بكل تهذيب، لكن قال ليهو: أنا بقول ليك سنة كم لكن ما تسألني من شهر كم، تاني الراجل بدا يسأل: أبوك اسمو منو، زوجتك «اسمو»، والمتعافي ما قصر معاهو وجاوبو على كل هذه الأسئلة «الحُشرية»، أنا براي قلتا في نفسي عليك الله: هسع أحسن أسئلتي أنا بتاعت بلعو وما بلعو اللي إضّايق منها المتعافي ولاّ أحسن دي هسع... وأنا أشيل وأقول في نفسي الزول الحُشري دا جا من وين؟ لكن بعد شوية عرفتا إنو من استديو واشنطن بالخرطوم وجاء عشان التقط صورة من الوزير لأن الوزير زي ناوي السفر على أمريكا، وذلك عندما سأله المتعافي: إنت تابع للسفارة الأمريكية؟...أجاب بلا ثم قال تابع لإستديو واشنطن...!! هنا ضحك المتعافي وقال مازحًا عميل أمريكي يعني!!!
