تقول الطرفة ان أحد الجماعة من أول أسبوع مسَّكوه الوظيفة الجديدة، اشتغل هبر بس ما كضب، يشيل ويبلع سآآآآآآكت، في فترة قليلة بني العمارة الأولى والتانية والتالتة وشركات ومش عارف إيه.. الجماعة جوهو في البيت.. هوي ياشيخ دا شنو البتعمل فيهو دا كدي بتجيب لينا الهوا وبتلفت علينا الانظار، حرام عليك شغلتك دي ما فيها أي فنيات ذي الدراب لُت لُت لُت، بتبلع ساكت، إنتا بتضرب ضربات كبيرة بتدمر اقتصاد البلد.. قال ليهم ياناس إنتو مجانين ولاَ شنو، أنا مافاهم حاجة من البتقولوهو دا، إيه الألفاظ السوقية دي: بتبلع ساكت وزي الدراب لت لت إنتو عايزين تقولو شنو.. عايزين نقول انتا نهبت أموال الدولة بطريقة غبية وما فيها اي نوع من الاحترام لا للشعب ولا للدولة، ياخي دي هنبتة عديل البسوي فيهو دا هسع تقدر تقول لينا دا كلو جبتو من وين؟ ... أيوا بقدر !!... أها جبتو من وين..؟ العمارات الشايفنها دي كلها أداني ليها الله، أنا طلبتو وأداني عندكم اعتراض علي مدَة الله، الله بدي الجنة يا «أخوان» وكان بتقدرو تسألو ربنا سبحانه وتعالى أسألوه: صحي أداني ولاَ أنا كضاب ..!! أنا في كل رمضان بتجيني ليلة القدر، أسألوها صحي جاتني ولاَ أنا كضاب ..!، بعدين هي ليلة القدر الجاتني ولاَ أنا الجيتا، يا جماعة ماترمو الناس بالباطل حرام عليكم ، دا اسمو في الإسلام قذف، وفي النهاية أنا بقول ليكم العندو أي مستند ضدي يقدمو لي أبو قناية، دا بشر شنو دا الزول ربنا يديهو يقولو ليهو: من أين لك هذا؟ أها هذا من فضل ربي تاني عندكم كلام!!!! تعريفات عصرية جداً: الولاية هي: ان تتولى امر المسلمين في الساعات الأولى من الصباح «الانقلاب» العصابة هي: أن تعصب عيونك بقطعة حتى لاترى الفساد الحقيقي الغضاضة هي: أن تغض طرفك عن مواضع فساد الكبار السلامة هي: ان تسلم إبراء الذمة لصهرك وتعمل نايم السماحة هي: ان تسمح لأهل الثقة والتمكين باستباحة المال العام الحرابة هي: ان تحارب السلطة الرابعة بالإغلاق وحجب الإعلان
