ساخر سبيل كل زول يعمل حسابو الفاتح يوسف جبرا ضحكت حتى بانت نواجزى واستلقيت على ظهرى وأنا أطالع على الصفحة الأولى من «الرأي العام» الصادرة بالأمس خبراً عن تحرّك المراجع العام ووزارة العدل والبرلمان، لتقليب الملفات المتعلقة بالاعتداء على المال العام خلال الأعوام العشرة الماضية توطئة (كما يقول الخبر) لاتخاذ قرارات صارمة تضبط المال العام وتحافظ على موارد الدولة ! حيث كشف د. الفاتح عز الدين رئيس لجنة الإدارة والعمل والمظالم العامة بالبرلمان (كما يقول الخبر) عن اجتماع رباعي خلال الأسبوع الحالي يضم وزير العدل والمراجع العام ولجنة العمل والإدارة والمظالم العامة بالبرلمان ووزيرة الشؤون البرلمانية لمراجعة حسابات كل الشركات والمؤسّسات الحكومية لعشرة أعوام ماضية، وقال (عز الدين) ستتم مراجعة كل الحالات المتعلقة بالمال العام حتى التي مضى عليها وقتٌ طويلٌ، وكشف عن إتفاق مع الجهاز التنفيذي لمعالجة كل الملفات المتعلقة بالمال العام، وألاّ يترك أي شخص اعتدى على مال عام حتى إذا تم ذلك الاعتداء قبل وقت طويل. وأكد عز الدين، أن العمل في هذا الاتجاه يتم بشكل علمي، وقال: سنقدم تقريراً (مفاجئاً)، وأضاف أن تقرير المراجع العام القادم سيكشف عن تحسن نسبي، لكنه أكد أن العام المقبل سيكون لهذه التحركات أثر كبير فيما يتعلق بضبط المال العام، وكشف عن توجيهات صارمة للإدارات المالية والإدارية، وزاد: سنتابع ملفات سنكشف عنها في حينها. وأكد عز الدين أن الشفافية تخطو خطوات ثابتة وبلغة الأرقام، وأكد أنه ليست هناك أية أهداف شخصية وراء هذا الأمر، بل أن الهدف حفظ موارد الدولة، وكشف عن رصد قضايا محددة، وتابع: كل هذه الاجراءات حتى يحتاط أي شخص ويتعامل بروح المسؤولية والرقابة، وأردف: (أي زول يعمل حسابو) ! أيه المضحك في الموضوع .. حكومة وعاوزة تحافظ على المال العام ؟ أيه البيضحك ؟ فيها أيه يعنى لما (الحكومة) تقوم كل (عشر سنين) بتجميع ملفات الفساد والإعتداء على المال العام وتبدأ فى محاسبة من قاموا به؟ صحيح ممكن يكون ناس كتيرين من (الأكلو) قروش الشعب السودانى الفضل قد إنتقل إلى الدار الآخرة لكن مش مشكلة برضو ح يتحاسبو هناك وكمان حساب عسير والقروش الشالوها دى ح تكتب لكل مواطن فى ميزان حسناتو ! أيه المضحك فى الموضوع ؟ ناس بتحكم بالشرع الذى لا يعرف فى تبديد المال العام أو الإعتداء عليه (يمة أرحمينى) ويتعامل معه بكل قوة وغلظة .. طيب الناس دى لمن تشوف شغلها وكل (عشر سنين) تقوم تجيب (ملفات الإعتداء ) دى وتنظر فيها مش حقو نقول ليهم (برافو) بدلاً من أن نضحك؟ هو صحيح إنو القروش التم الإعتداء عليها دى خرجت من الدورة المالية للدولة والمواطن كان ممكن يكون محتاج يتعالج بيها أو يتعلم بيها أو أى حاجة بالشكل ده لكن ما مشكلة ما كووولها عشر سنوات و(إحتمال بالمحاسبة دى ترجع ليهو) ! وبعدين حكاية كل عشر سنين نحاسب المفسدين دى فيها حكمة بليغة يعنى زول شال ليهو مليار جنيه .. لو جيتو تانى يوم ما ح يرجعا ليك .. لكن بعد عشر سنين بيكون شغلا وبقت مليارات كتيرة ولو سألتو ح يقول ليك : مش المليار القلتوهو ده شيلوه ..تانى عاوزين منى حاجة؟ وعلى كده نكون وفرنا قصة التحقيقات والمحاكمات والتسويات والشنو ما بعرف داك! العبدلله عموما شايف إنو (الحكومة) إتوفقت تماماً فى قصة (كل عشر سنين) دى وبدلا عن كل تقرير سنوى يصدره المراجع العام وفيهو الف ألفين زول معتدى على المال العام الحكومة تلم الناس ديل كوووولهم بعد كل (عشرة تقارير) فى (باتش) واااحدة وتخلص من الموضوع (بالجملة) بدلاً عن (القطاعي) ! وبعدين يا جماعة عشر سنين فى عمر (الجريمة) شوية خلاس .. يعنى القروش بتكون قاعدة في حتتا والزول لسه بيكون ما اتصرف فيها ومعالم الجريمة كووولها بتكون موجودة كما هى .. ومسرح الجريمة ذاتو ما بيكون إتغير بس يعنى ممكن لو فى شوية شهود يكونوا إنتقلوا للرفيق الأعلى أو القروش (الإنضربت) يكون الزول عمل بيها عمارات وإتباعت على التوالى من مشترى لى مشترى لحدت ما وصلوا ستة وتمنين ألف زول ! ما مشكلة أمنا الحكومة ح تقوم فى الحالة دى تبيع العمارات دى وترجع لينا قروشنا .. ونقوم نحنا نعمل صندوق دعم للناس (الإتمقلبوا) من المتأثرين بى عملية الشراء دى ! مافى زول يقوم يفهم إنو ممكن بعد التصريح ده يقوم يبدأ يلهط ويلغف فى المال العام وإنو ما ح يتحاسب إلا بعد عشرة سنين .. لا (أمنا الحكومة) دى (مكارة) وممكن ترجع في قراراتها فى أى وكت .. وممكن تقوم تغير سياسة (كل عشرة سنين) دى وتعملا (كل خمسطاشر سنة) وأهو قالت ليكم (كل زول يعمل حسابو) !! كسرة : كل واحد يقوم يخت الكسرة البتعجبوا !! عشان كسراتنا فى الحتت دى ممكن تجيب لينا الهواء !! الرأي العام
